ຂ່າວສານ
ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ ເຂົ້າຮ່ວມກອງປະຊຸມປຶກສາຫາລືການນຳຂັ້ນສູງ ອາຊຽນ - ລັດເຊຍ
ກ່າວຄຳເຫັນທີ່ກອງປະຊຸມ, ທ່ານລັດຖະມົນຕີ ໂຕເລິມ ໄດ້ເນັ້ນໜັກວ່າ ໃນໄລຍະຈະມາເຖິງ, ບັນດາປະເທດ, ພາກພື້ນ ຄວນເພີ່ມທະວີບັນດາມາດຕະການສ້າງຄວາມໄວ້ເນື້ອເຊື່ອໃຈ, ສ້າງຊ່ອງທາງເຈລະຈາຢ່າງມີປະສິດທິຜົນ ເພື່ອແລກປ່ຽນທັດສະນະ, ແກ້ໄຂບັນດາຄວາມບໍ່ລົງລອຍກັນ, ການຂັດແຍ້ງໂດຍສັນຕິວິທີຢ່າງທັນການ ເພື່ອຊຸກຍູ້ການຮ່ວມມື ຕ່າງຝ່າຍຕ່າງມີຜົນປະໂຫຍດ, ພັດທະນາເສດຖະກິດ - ສັງຄົມແບບຍືນຍົງ. ຫວຽດນາມ ສະເໜີໃຫ້ສອງຝ່າຍ ເພີ່ມທະວີການຮ່ວມມືໃນຂອບເຂດເວທີປາໄສ ພາກພື້ນ ອາຊຽນ (ARF) ເພື່ອປັບປຸງຄວາມໄວ້ເນື້ອເຊື່ອໃຈ, ນຳການພົວພັນຄູ່ຮ່ວມມືຍຸດທະສາດ ອາຊຽນ - ລັດເຊຍ ພັດທະນາຢ່າງແທດຈິງ, ຮອບດ້ານ; ຍູ້ແຮງການຮ່ວມມືກ່ຽວກັບບັນດາບັນຫາຄວາມໝັ້ນຄົງແບບເກົ່າ ແລະ ບັນດາສິ່ງທ້າທາຍຂອງຄວາມໝັ້ນຄົງແບບໃໝ່; ເປີດກວ້າງການແບ່ງປັນຂໍ້ມູນທາງດ້ານວິຊາການລະຫວ່າງບັນດາອົງການປະຕິບັດກົດໝາຍຂອງສອງຝ່າຍ ແລະ ສ້າງກົນໄກປະສານງານ ການພົວພັນລະຫວ່າງ ອາຊຽນ - ລັດເຊຍ ໃນຂັ້ນກະຊວງ ໃນການຕໍ່ສູ້ກັບການກໍ່ການຮ້າຍ ແລະ ອາດຊະຍາກຳທີ່ມີການຈັດຕັ້ງ, ອາດຊະຍາກຳຂ້າມຊາດ.
ດ້ວຍຖານະເປັນປະທານໝູນວຽນ ອາຊຽນ ປີ 2020 ແລະ ກຳມະການບໍ່ປະຈຳການສະພາຄວາມໝັ້ນຄົງ ສປຊ ອາຍຸການ 2020 – 2021, ຫວຽດນາມ ໃຫ້ຄຳໝັ້ນສັນຍາ ຈະປະກອບສ່ວນຊຸກຍູ້ບັນດາວິວັດການເຈລະຈາ, ຮ່ວມມື ແລະ ສ້າງຄວາມໄວ້ເນື້ອເຊື່ອໃຈ ໂດຍ ອາຊຽນ ເປັນປະທານ, ຍາມໃດກໍພ້ອມແລ້ວທີ່ຈະຮ່ວມມືກັບບັນດາປະເທດໃນພາກພື້ນ ອາຊີ - ປາຊີຟິກ, ບັນດາປະເທດ ອາຊຽນ ຢ່າງແໜ້ນແຟ້ນ. ຫວຽດນາມ ເຊື່ອໝັ້ນວ່າ ບັນດາປະເທດ ອາຊຽນ ແລະ ລັດເຊຍ ຈະຢຶດໝັ້ນຕໍ່ນະໂຍບາຍຮັບປະກັນສັນຕິພາບ, ສະຖຽນລະພາບໃນພາກພື້ນເປັນສະເໝີ.
(ແຫຼ່ງຄັດຈາກ VOV)
