ນະທີ່ນີ້, ທ່ານປະທານປະເທດ ຫງວຽນຊວັນຟຸກ ເນັ້ນໜັກວ່າ: ສາຍພົວພັນບໍລິສຸດຜຸດຜ່ອງລະຫວ່າງສອງພັກ, ສອງລັດ ໄດ້ກາຍເປັນສາຍພົວພັນທີ່ເປັນແບບຢ່າງ ແລະ ຫາຍາກໃນໂລກ ແລະ ສອງປະເທດ ຄວນຊຸກຍູ້ການຮ່ວມມືຢ່າງແຮງກວ່າອີກໃນໄລຍະຈະມາເຖິງ:
“ກ່ອນອື່ນໝົດ, ສືບທອດມູນເຊື້ອປະຕິວັດອັນສະຫງ່າອົງອາດ ແລະ ບັນດາຜົນງານແຫ່ງການຮ່ວມມືໃນໄລຍະຜ່ານມາ, ພວກເຮົາເຂົ້າໃຈວ່າ ເສົາຄ້ຳສາຍພົວພັນດ້ານການເມືອງ ຈະສືບຕໍ່ກຳນົດທິດສັງລວມສາຍພົວພັນແບບພິເສດ ຫວຽດນາມ - ລາວ ໃນໄລຍະຈະມາເຖິງ. ໂດຍສືບທອດມູນເຊື້ອປະຕິວັດອັນໝັ້ນຄົງ, ສາຍພົວພັນດ້ານການເມືອງຂອງສອງປະເທດ ຈະໄດ້ຮັບການເຍືອງທາງຊີ້ທິດຈາກແນວຄິດຂອງຜູ້ນຳຜູ້ຍິງໃຫຍ່ສອງທ່ານ ຄື ປະທານໂຮ່ຈີມິນ ແລະ ປະທານ ໄກສອນ ພົມວິຫານ, ນັ້ນແມ່ນການໝູນໃຊ້ລັດທິ ມາກ - ເລນິນເຂົ້າໃນສະພາບການຕົວຈິງຂອງແຕ່ລະປະເທດຢ່າງມີຫົວຄິດປະດິດສ້າງ, ມຸ່ງໄປເຖິງເປົ້າໝາຍເອກະລາດແຫ່ງຊາດ ແລະ ສັງຄົມນິຍົມ, ກາຍເປັນປະເທດຮັ່ງມີເຂັ້ມແຂວງ, ປະຊາຊົນກິນອີ່ມນຸ່ງອຸ່ນ ແລະ ມີຄວາມຜາສຸກ. ປັດຈຸບັນ, ແນວຄິດຂອງຜູ້ນຳຍິ່ງໃຫຍ່ທີ່ແສນເຄົາລົບຮັກທັງສອງທ່ານຂອງພວກເຮົານັ້ນ ແມ່ນເຂັມຊີ້ທິດໃຫ້ສອງປະເທດພວກເຮົາ ຍາມໃດກໍຖະໜຸຖະໜອມ ແລະ ເສີມຂະຫຍາຍມູນເຊື້ອສາຍພົວພັນບໍລິສຸດຜຸດຜ່ອງ, ສະໜິດສະໜົມ ມີໜຶ່ງບໍ່ມີສອງໃນໂລກນີ້, ສືບຕໍ່ປັບປຸງຄວາມໄວ້ເນື້ອເຊື່ອໃຈດ້ານການເມືອງ - ຍຸດທະສາດ, ເພື່ອພ້ອມກັນແບກຫາບພາລະກິດປະຫວັດສາດ ປົກປັກຮັກສາຜົນງານປະຕິວັດ, ສ້າງສາ ແລະ ພັດທະນາປະເທດຊາດ ມຸ່ງໄປສູ່ເປົ້າໝາຍສັງຄົມນິຍົມ, ຮັກສາສາຍພົວພັນແບບພິເສດ ລະຫວ່າງ ລາວ - ຫວຽດນາມ ໃຫ້ໝັ້ນຄົງຂະໜົງແກ່ນໄປຊົ່ວກາລະນານ.”
ທ່ານປະທານປະເທດຫວຽດນາມ ຫງວຽນຊວັນຟຸກ ທີ່ກອງປະຊຸມສະພາແຫ່ງຊາດລາວ ຊຸດທີ IX (ພາບ:VOV)
ກ່ອນໜ້ານັ້ນ, ທ່ານປະທານປະເທດຫວຽດນາມ ຫງວຽນຊວັນຟຸກ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງພັກ, ລັດ ຫວຽດນາມ ໄດ້ວາງພວງມາລາຢູ່ອະນຸສາວະລີອາໄລຫານັກຮົບນິລະນາມ ແລະ ພົບປະທ່ານປະທານປະເທດ ລາວ ໄຊສົມພອນ ພົມວິຫານ. ໃນການພົບປະຄັ້ງນີ້, ທ່ານປະທານປະເທດ ຫງວຽນຊວັນຟຸກ ໄດ້ສະແດງຄວາມສະໜັບສະໜູນຕໍ່ເລື່ອງສະພາແຫ່ງຊາດສອງປະເທດເພີ່ມທະວີການສົມທົບກັນຕິດຕາມກວດກາ ເພື່ອປະກອບສ່ວນເຂົ້າໃນການຜັນຂະຫຍາຍຂໍ້ຕົກລົງສະບັບຕ່າງໆເຊິ່ງສອງຝ່າຍໄດ້ລົງນາມກັນຢ່າງມີປະສິດທິຜົນ; ເພີ່ມທະວີ, ແບ່ງປັນປະສົບການ, ໂດຍສະເພາະແມ່ນການສ້າງລະບອບລະບຽບການ, ລະບົບກົດໝາຍໃຫ້ສົມບູນແບບ ແລະ ຕິດຕາມກວດກາການເຄື່ອນໄຫວຂອງບັນດາອົງການແຫ່ງລັດຢ່າງເຂັ້ມງວດ; ຈັດຕັ້ງການແລກ່ປຽນບົດຮຽນ, ປະສົບການ, ກອງປະຊຸມ, ກອງປະຊຸມສຳມະນາຕາມຫົວເລື່ອງສະເພາະ ດ້ວຍຮູບການຕ່າງໆຢ່າງມີໄຫວພິບ; ສືບຕໍ່ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນແລະກັນຢູ່ບັນດາເວທີປາໄສລັດຖະສະພາພາກພື້ນ ແລະ ສາກົນ; ສົມທົບກັນຢ່າງກົມກຽວ ແລະ ມີປະສິດທິຜົນໃນບັນດາບັນຫາພາກພື້ນ ແລະ ສາກົນ ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ.
(ແຫຼ່ງຄັດຈາກ VOV)
