ຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດໄດ້ຈັດພິທີໄວ້ອາໄລປະທານປະເທດ ເຈິ່ນດ້າຍກວາງ
(ພາບ: TTXVN)
ຕອນເຊົ້າວັນທີ 24 ກັນຍາ, ສະຫະປະຊາຊາດໄດ້ລົດທຸງລົງເຄິ່ງເສົ້າເພື່ອອາໄລຫາທ່ານປະທານປະເທດຫວຽດນາມ ເຈິ່ນດ້າຍກວາງ.
ແລະກໍ່ໃນວັນດຽວກັນ, ຢູ່ສຳນັກງານຂອງຄະນະປະຕິບັດງານຂອງພະນັກງານ, ພາລະກອນບັນດາອົງການຕາງໜ້າຫວຽດນາມ ປະຈຳນິວຢອກ ໂດຍທ່ານເອກອັກຄະລັດຖະທູດຫວຽດນາມ ດັ້ງດິງກຸຍ ນຳໜ້າໄດ້ສະຫງວນເວລາ 1 ນາທີກົ້ມຫົວໄວ້ອາໄລເຖິງດວງວິນຍານປະທານປະເທດເຈິ່ນດ້າຍກວາງ.
ຕໍ່ຈາກນັ້ນ, ໃນລະຫວ່າງວັນທີ 24 – 25 ກັນຍາ, ຊາວຫວຽດນາມ, ນັກສຶກສາ, ເອກອັກຄະລັດຖະທູດ, ຜູ້ຕາງໜ້າບັນດາຄະນະປະຕິບັດງານປະຈຳສະຫະປະຊາຊາດ, ບັນດາອົງການຈັດຕັ້ງຫຼາຍຝ່າຍຢູ່ນິວຢອກ ແລະ ເຈົ້າໜ້າທີ່ທ້ອງຖິ່ນໄດ້ມາແບ່ງເບົາຄວາມເສົ້າສະຫຼົດໃຈ ແລະ ຈົດບັນທຶກໃສ່ປື້ມໄວ້ອາໄລປະທານປະເທດເຈິ່ນດ້າຍກວາງ.
ໃນຂະນະທີ່ພວມດຳເນີນກອງປະຊຸມສະມັດຊາໃຫຍ່ສະຫະປະຊາຊາດ ຄັ້ງທີ 73, ປະມຸກລັດ, ຜູ້ນຳໜ້າລັດຖະບານ ແລະ ເຈົ້າໜ້າທີ່ຂັ້ນສູງຫຼາຍທ່ານໄດ້ໄປນິວຢອກ ເພື່ອເຂົ້າຮ່ວມກອງປະຊຸມ ກໍ່ໄດ້ມາໄວ້ອາໄລທ່ານປະທານປະເທດຫວຽດນາມ ເຈິ່ນດ້າຍກວາງ. ໃນປື້ມໄວ້ອາໄລ, ບັນດາການນຳ, ບັນດາເອກອັກຄະລັດຖະທູດ, ຫົວໜ້າຄະນະຜູ້ແທນ, ບັນດາເຈົ້າໜ້າທີ່ການທູດຂັ້ນສູງ ໄດ້ສະແດງຄວາມເຫັນອົກເຫັນໃຈ ແລະ ສົ່ງຄຳແບ່ງເບົາເສົ້າສະຫຼົດໃຈມາຍັງລັດຖະບານ ແລະ ປະຊາຊົນຫວຽດນາມ ຕໍ່ການຈາກໄປຂອງທ່ານປະທານປະເທດ ເຈິ່ນດ້າຍກວາງ.
ແລະກໍ່ໃນຕອນເຊົ້າວັນທີ 26 ກັນຍາ, ສະຖານທູດຫວຽດນາມ ປະຈຳອົດສະຕາລີ, ສະຖານກົງສູນໃຫຍ່ຫວຽດນາມ ປະຈຳຊິດນີ, ສະຖານກົງສູນໃຫຍ່ຫວຽດນາມ ປະຈຳ Perth ແລະ ສະຖານທູດຫວຽດນາມ ປະຈຳ ນິວຊີແລນ ແລະ ສະຫະພັນລັດເຊຍ ກໍ່ໄດ້ຈັດພິທີໄວ້ອາໄລທ່ານປະທານປະເທດເຈິ່ນດ້າຍກວາງ, ເຊິ່ງໄດ້ມີບັນດາຄະນະທູຕານຸທູດ ແລະ ປະຊາຄົມຊາວຫວຽດນາມ ອາໄສຢູ່ຕ່າງປະເທດມາໄວ້ອາໄລປະທານປະເທດ ເຈິ່ນດ້າຍກວາງ.
ຕອນເຊົ້າວັນທີ 26 ກັນຍາ, ບັນດາສຳນັກງານຫ້ອງການໃນທົ່ວປະເທດລາວ ກໍ່ໄດ້ລົດທຸງລົງເຄິ່ງເສົາໄວ້ທຸກລະດັບຊາດເພື່ອອາໄລຫາປະທານປະເທດຫວຽດນາມ ເຈິ່ນດ້າຍກວາງ. ນີ້ແມ່ນພິທີໄວ້ອາໄລພິເສດເຊິ່ງນັບແຕ່ກອນມາຮອດປະຈຸບັນ ລາວ ພຽງແຕ່ນຳໃຊ້ໃນການພົວພັນລະຫວ່າງລາວ - ຫວຽດນາມ ເທົ່ານັ້ນ.
(ແຫຼ່ງຄັດຈາກ VOV)
