ຕອນເຊົ້າວັນທີ 5 ກັນຍາ, ຫຼາຍແຂວງ, ນະຄອນ ໃນທົ່ວປະເທດຫວຽດນາມ ໄດ້ຈັດຕັ້ງພິທີໄຂສົກຮຽນໃໝ່ 2021 – 2022 ດ້ວຍຫຼາຍຮູບການທີ່ແຕກຕ່າງກັນ, ມີໄຫວພິບ ແລະ ສອດຄ່ອງກັບສະພາບການຂອງທ້ອງຖິ່ນ ແລະ ສະພາບໂລກລະບາດ. ໃນຈົດໝາຍຝາກເຖິງຂະແໜງສຶກສາ ເນື່ອງໃນໂອກາດໄຂສົກຮຽນໃໝ່ 2021 – 2022, ທ່ານປະທານປະເທດຫວຽດນາມ ຫງວຽນຊວັນຟຸກ ຢັ້ງຢືນວ່າ ຂະແໜງສຶກສາພວມປະເຊີນໜ້າກັບສິ່ງທ້າທາຍທີ່ໃຫຍ່ຫຼວງຈາກໂລກລະບາດໂຄວິດ - 19. ຕັດສິນໃຈໃຫ້ສົກຮຽນປີ 2021 – 2022 ແລະ ໄກກວ່ານັ້ນແມ່ນບໍ່ປະໃຫ້ນັກຮຽນຄົນໃດ, ພິເສດແມ່ນພວກນ້ອງນັກຮຽນທີ່ຢູ່ເຂດເກີດໂລກລະບາດ, ເຂດຫ່າງໄກສອກຫຼີກ, ຜູ້ປະສົບກັບຄວາມຫຍຸ້ງຍາກ ຖືກພາດໂອກາດຮ່ຳຮຽນ ຍ້ອນໂລກລະບາດ ແລະ ບໍ່ປະໃຫ້ພື້ນຖານການສຶກສາຂອງ ຫວຽດນາມ ຍ້ອນໂລກລະບາດ ທີ່ບໍ່ສາມາດປະຕິບັດສຳເລັດຄຳໝັ້ນສັນຍາ, ບົດບາດສຳຄັນ ແລະ ພາລະກິດຂອງຕົນຕໍ່ປະເທດຊາດ ແລະ ປະຊາຊົນ.
ນ້ອງ ຟານເລແອັງຕ໊ວນ, ນັກຮຽນ ມໍ 7, ໂຮງຮຽນ ມັດທະຍົມຕອນປາຍ ບຸ່ຍຫືວເຫງຍະ (ເກີ່ນເທີ) ໄດ້ເຂົ້າຮ່ວມພິທີໄຂສົກຮຽນໃໝ່ຜ່ານສື່ສັງຄົມ ຢູທູບ ແບ່ງປັນວ່າ:
“ພິທີໄຂສົກຮຽນໃໝ່ປີນີ້, ນ້ອງ ພ້ອມດ້ວຍຄອບຄົວໄດ້ເຂົ້າຮ່ວມ ແລະ ຮັບຊົມຜ່ານການຖ່າຍທອດສົດ ສະນັ້ນກໍຮູ້ສຶກປອດໄພກວ່າ. ຜ່ານການຖ່າຍທອດສົດພິທີໄຂສົກຮຽນໃໝ່ນີ້ ນ້ອງກໍຮູ້ສຶກສາວ່າ ສົກຮຽນໃໝ່ໄດ້ເລີ່ມຕົ້ນແລ້ວ ແລະ ນ້ອງຂໍໝັ້ນໝາຍຈະຮຽນໃຫ້ດີ, ເສັງໄດ້ຄະແນນດີ ທີ່ນ້ອງປາດຖະໜາ”.
ຕອນເຊົ້າວັນທີ 5 ກັນຍາ, 5 ແຂວງເຂດພູດອຍທາງທິດຕາເວັນຕົກສ່ຽງເໜືອ ຫວຽດນາມ ຄື ເຊີນລາ, ດ້ຽນບຽນ, ລາຍເຈົາ, ລ່າວກາຍ ແລະ ອຽນບ໋າຍ ໄດ້ພ້ອມກັນຈັດຕັ້ງພິທີໄຂສົກຮຽນໃໝ່ຕາມຫຼາຍຮູບການທີ່ແຕກຕ່າງກັນ ນັບທັງການຈັດພິທີໄຂໂດຍກົງ ຕະຫຼອດຮອດແບບທາງໄກ. ນ້ອງ ຈິ່ງຊານຊານ, ນັກຮຽນ ປໍ 5, ໂຮງຮຽນປະຖົມ ກິມດົ່ງ, ນະຄອນ ອຽນບ໋າຍ, ແບ່ງປັນວ່າ:
“ໃນຂະນະທີ່ຢູ່ຫຼາຍແຂວງອື່ນ, ໝູ່ເພື່ອນມາໂຮງຮຽນບໍ່ໄດ້ ຍ້ອນໂລກລະບາດໂຄວິດ - 19, ແຕ່ນ້ອງຍັງໄດ້ເຂົ້າຮ່ວມພິທີໄຂສົກຮຽນໃໝ່ເປັນປົກກະຕິຄືແນວນີ້, ນ້ອງຮູ້ສຶກວ່າ ຕົນເອງໂຊກດີຫຼາຍ ແລະ ສິ່ງດັ່ງກ່າວ ກໍເປັນຄວາມສະດວກໃຫ້ແກ່ການຮຽນຂອງນ້ອງທີ່ສຸດ”.
ສົກຮຽນ 2021 – 2022, ຫວຽດນາມ ມີນັກຮຽນ, ນັກສຶກສາກວ່າ 24 ລ້ານຄົນ ໄດ້ກ້າວເຂົ້າສູ່ສົກຮຽນໃໝ່. ກະຊວງສຶກສາ ແລະ ບຳລຸງສ້າງ ຫວຽດນາມ ໄດ້ກຳນົດວ່າ ນີ້ແມ່ນສົກຮຽນທີ່ປະສົບກັບຄວາມຫຍຸ້ງຍາກຫຼາຍຢ່າງ ແລະ ທົ່ວຂະແໜງສຶກສາ ຕ້ອງຮັບມືຢ່າງມີໄຫວພິບ.
