ວັນທີ 28 ພະຈິກ, ໜັງສືພິມເອກະລາດ ຊຶ່ງແມ່ນເວັບໄຊໄຈ້ແຍກດ້ານການເມືອງ, ສະຖານະການສາກົນຂອງ ສະຫະພັນ ລັດເຊຍ ໄດ້ລົງບົດຂຽນຂອງ ນັກຂຽນ Grigory Trofimchuk, ນັກຊ່ຽວຊານວິເຄາະການເມືອງສາກົນ, ດ້ວຍຫົວຂໍ້ “ມິດສະຫານຢ່າງແທ້ຈິງ”, ໃນນັ້ນໄດ້ຕີລາຄາສູງ ການພົວພັນຄູ່ຮ່ວມມືຍຸດທະສາດຢ່າງຮອບດ້ານ ລະຫວ່າງ ຫວຽດນາມ - ສະຫະພັນ ລັດເຊຍ, ກໍ່ຄືຄວາມໝາຍຂອງການເດີນທາງໄປຢ້ຽມຢາມສະຫະພັນລັດເຊຍ ຢ່າງເປັນທາງການຂອງທ່ານປະທານປະເທດ ຫງວຽນຊວັນຟຸກ ໃນລະຫວ່າງວັນທີ 29 ພະຈິກ - 2 ທັນວາ. ບົດຂຽນໄດ້ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືທີ່ມີຄວາມໄວ້ເນື້ອເຊື່ອໃຈ ຂອງ ສະຫະພັນ ລັດເຊຍ ບໍ່ພຽງແຕ່ໃນຍຸກສະໄໝສະຫະພາບ ໂຊຫວຽດ ເມື່ອກ່ອນເທົ່ານັ້ນ ຫາກຍັງໃນປັດຈຸບັນອີກດ້ວຍ. ລັດເຊຍ ແລະ ຫວຽດນາມ ມີທັດສະນະດຽວກັນ ກ່ຽວກັບຫຼາຍບັນຫາສາກົນ, ສິ່ງທີ່ເປັນໜ້າສົນໃຈນັ້ນແມ່ນ ທັງສອງປະເທດລ້ວນແຕ່ສະໜັບສະໜູນລະບົບຄວາມເປັນລະບຽບຮຽບຮ້ອຍຂອງໂລກຫຼາຍແງ່ມູນ, ໃນນັ້ນມີຫຼັກການແກ້ໄຂການປະທະກັນຄັ້ງໃຫຍ່ໃນທົ່ວໂລກ ດ້ວຍມາດຕະການການທູດ, ສັນຕິພາບ, ບົນພື້ນຖານເຄົາລົບກົດໝາຍສາກົນ.
ກ່ຽວກັບການຮ່ວມມືດ້ານເສດຖະກິດ - ການຄ້າ, ບົດຂຽນ ໄດ້ເນັ້ນໜັ້ກວ່າ ປີ 2015, ສະຫະພັນເສດຖະກິດ ອາຊີ - ເອີລົບ (EAEU) ແລະ ຫວຽດນາມ ໄດ້ລົງນາມສົນທິສັນຍາກ່ຽວກັບພາກພື້ນການຄ້າເສລີ, ຜ່ານນັ້ນໄດ້ນຳສະຫະສະມາຄົມເສດຖະກິດນີ້ ຂຶ້ນສູ່ລະດັບສູງໃໝ່, ບໍ່ພຽງແຕ່ອະນຸຍາດໃຫ້ເປີດກວ້າງການແລກປ່ຽນການຄ້າສອງຝ່າຍເທົ່ານັ້ນ, ຫາກຍັງຊ່ວຍເປີດກວ້າງຂອບເຂດ ອາຊີ - ເອີລົບ ໄປຍັງພາກພື້ນ ອາຊີຕາເວັນອອກສ່ຽງໃຕ້ ອີກດ້ວຍ. ນັກຂຽນໄດ້ຢັ້ງຢືນວ່າ ຫວຽດນາມ ແມ່ນໜຶ່ງໃນບັນດາປະເທດນຳໜ້າສຳຄັນຂອງ ພາກພື້ນ ອາຊີ - ປາຊີຟິກ, ໂດຍແມ່ນສະຖານທີ່ຈຸດສຸມຂອງການເຕີບໂຕເສດຖະກິດ - ການເງິນທົ່ວໂລກ.
(ແຫຼ່ງຄັດຈາກ VOV)
