ພິທີລົງນາມບົດບັນທຶກຊ່ວຍຈຳການຮ່ວມມືລະຫວ່າງສອງກະຊວງ
(ພາບ: TTXVN)
ເອກະສານສະບັບດັ່ງກ່າວ ແມ່ນປະຖົມປັດໄຈ ເພື່ອໃຫ້ສອງກະຊວງ ຊຸກຍູ້ການພົວພັນ ເພື່ອແນໃສ່ການເພີ່ມທະວີການຮ່ວມມື ດ້ານເຕັກນິກໃນການປົກປັກຮັກສາສິ່ງແວດລ້ອມ, ການຄຸ້ມຄອງສິ່ງແວດລ້ອມ, ທີ່ດິນ ແລະ ທະເລ ດ້ວຍບັນດາເນື້ອໃນຄື ການຄຸ້ມຄອງຄວາມສ່ຽງ, ການຮັບມືກັບການປ່ຽນແປງຂອງດິນຟ້າອາກາດ…. ພາຍຫຼັງພິທີລົງນາມ, ສອງຝ່າຍຈະດຳເນີນການສ້າງແຜນການປະຕິບັດຮ່ວມ ເພື່ອຜັນຂະຫຍາຍການປະຕິບັດ ໂດຍໄວ.
ທີ່ພິທີລົງນາມ, ທ່ານ ເລກົງແທ່ງ ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຫວຽດນາມ ສະເໜີໃຫ້ ອີຕາລີ ສືບຕໍ່ໜູນຊ່ວຍຫວຽດນາມປະຕິບັດໂຄງການ “ເພີ່ມທະວີລະບົບພະຍາກອນອາກາດ, ກ່າວເຕືອນໄພນ້ຳຖ້ວມຢູ່ຫວຽດນາມ - ໄລຍະ II” ໃຫ້ແກ່ເຂດທາງທິດໃຕ້ພາກກາງ ແລະ ກຳນົດທິດຮັກສາ, ເປີດກວ້າງໝາກຜົນທີ່ບັນລຸໄດ້ ອອກສູ່ບັນດາເຂດຕ່າງໆຂອງຫວຽດນາມ, ພິຈາລະນາໜູນຊ່ວຍຫວຽດນາມສ້າງນະໂຍບາຍ ກ່ຽວກັບການຕີລາຄາຜົນກະທົບຂອງການປ່ຽນແປງຂອງດິນຟ້າອາກາດ, ໄພພິບັດທຳມະຊາດຕໍ່ປະຊາຄົມ. ທ່ານ Francesco La Camera, ຫົວໜ້າກົມຮັບຜິດຊອບຂະແໜງການພັດທະນາແບບຍືນຍົງ, ພະລັງງານ ແລະດິນຟ້າອາກາດ, ກະຊວງສິ່ງແວດລ້ອມ, ທີ່ດິນ ແລະ ທະເລ ອີຕາລີ ໃຫ້ຮູ້ວ່າ: ອີຕາລີ ພ້ອມແລ້ວທີ່ຈະຮ່ວມມືກັບກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຫວຽດນາມ ໃນບັນດາຂົງເຂດຄື: ການປ່ຽນແປງຂອງດິນຟ້າອາກາດ; ການຄຸ້ມຄອງສິ່ງເສດເຫຼືອ; ສົມທົບກັນ ເພື່ອໃຫ້ບັນດາວິສາຫະກິດອີຕາລີເຂົ້າຮ່ວມການຮ່ວມມືກັບຫວຽດນາມ.
(ແຫຼ່ງຄັດຈາກ VOV)
