
ໃນກອງປະຊຸມສະໄໝສາມັນເທື່ອທີ 11, ສະພາແຫ່ງຊາດຫວຽດນາມ ຊຸດທີ XIV ຈະດຳເນີນການບູລະນະຫຼາຍຕຳແໜ່ງຂອງລັດໃຫ້ສົມບູນ, ໃນນັ້ນ ມີການເລືອກຕັ້ງປະທານປະເທດ, ນາຍົກລັດຖະມົນຕີ ແລະ ປະທານສະພາແຫ່ງຊາດ. ຄາດວ່າ ເວລາເຮັດວຽກຂອງ ກອງປະຊຸມສະໄໝສາມັນເທື່ອສຸດທ້າຍຂອງ ສະພາແຫ່ງຊາດ ຊຸດທີ XIV ແມ່ນ 12 ວັນ, ເຊິ່ງຈະໄຂຂຶ້ນໃນວັນທີ 24 ມີນາ ແລະ ອັດລົງໃນວັນທີ 8 ເມສາ.
ໃນນັ້ນ, ເວລາສ່ວນຫຼາຍໃນກອງປະຊຸມຄັ້ງນີ້ ແມ່ນປະຕິບັດວຽກງານບຸກຄະລາກອນ. ສະພາແຫ່ງຊາດ ຈະປະກອບຄຳເຫັນຕໍ່ບົດລາຍງານວຽກງານອາຍຸການຊຸດທີ XIV ຂອງ ສະພາແຫ່ງຊາດ; ອາຍຸການ 2016 – 2021 ຂອງ ປະທານປະເທດ, ລັດຖະບານ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ອົງການກວດສອບແຫ່ງລັດ. ໄປຄຽງຄູ່ກັນນັ້ນ ແມ່ນພິຈາລະນະຮັບຮອງເອົາມະຕິກອງປະຊຸມສະໄໝສາມັນເທື່ອທີ 11, ສະພາແຫ່ງຊາດຊຸດທີ XIV.
(ແຫຼ່ງຄັດຈາກ VOV)