ແຈ້ງການສະເໜີບັນດາກະຊວງ, ອົງການທຽບເທົ່າ ກະຊວງ, ນະຄອນຫລວງ ວຽງຈັນ ແລະ ບັນດາແຂວງ, ນະຄອນໃນທົ່ວປະເທດ ລາວ ລົດທຸງລົງເຄິ່ງເສົາຢູ່ສຳນັກງານ, ຫ້ອງການເລີ່ມແຕ່ເວລາ 6 ໂມງເຊົ້າວັນທີ 26 ກັນຍາ ເຖິງ 18 ໂມງວັນທີ 27 ກັນຍາ, ພ້ອມທັງ ຢຸດຕິທຸກການເຄື່ອນໄຫວລະຫຼິ້ນ, ບັນເທິງໃນໄລຍະເວລາດັ່ງກ່າວຢູ່ທົ່ວປະເທດ.
ແຈ້ງການກໍ່ໃຫ້ຮູ້ວ່າ: ບັນດາກະຊວງ, ຂະແໜງການ, ບັນດາແຂວງ…ສາມາດຈັດສົ່ງຄະນະຜູ້ແທນໄປໄວ້ອາໄລ ແລະ ຂຽນໃສ່ປື້ມໄວ້ອາໄລອະດີດປະທານປະເທດ ເຈິ່ນດ້າຍກວາງ ທີ່ສະຖານທູດ ຫວຽດນາມ ຢູ່ນະຄອນຫລວງ ວຽງຈັນ ແລະ ຢູ່ບັນດາສະຖານກົງສູນໃຫຍ່ຂອງ ຫວຽດນາມ ຢູ່ພາກເໜືອ, ພາກໃຕ້, ພາກກາງ ລາວ ໃນລະຫວ່າງວັນທີ 26 – 27 ກັນຍາ.
ວັນທີ 24 ກັນຍາ, ຢູ່ສະຖານທູດຫວຽດນາມທີ່ກຳປູເຈຍ, ທ່ານຮອງນາຍົກລັດຖະມົນຕີ, ລັດຖະມົນຕີກະຊວງພະລາດຊະວັງກຳປູເຈຍ ສົມເດັດ ກົງຊາມອອນ ໄດ້ມອບຈົດໝາຍສະແດງການແບ່ງເບົາຄວາມເສົ້າສະຫລົດໃຈຂອງກະສັດກຳປູເຈຍສິຫະໂມນີເມື່ອໄດ້ຮັບຊາບຂ່າວທ່ານປະທານປະເທດຫວຽດນາມ ເຈີນດ້າຍກວາງ ໄດ້ເຖິງແກ່ມໍລະນະກຳ. ກະສັດກຳປູເຈຍສິຫະໂມນີ ໄດ້ຝາກຄຳແບ່ງເບົາຄວາມເສົ້າສະຫລົດໃຈ ແລະ ຄວາມໂສກເສົ້າເສຍດາຍມາຍັງຄອບຄົວຂອງທ່ານປະທານປະເທດຫວຽດນາມ ເຈີນດ້າຍກວາງ ແລະ ປະຊາຊົນຫວຽດນາມຍ້ອນການສູນເສຍຢ່າງໃຫຍ່ຫຼວງນີ້.
ຕອນເຊົ້າວັນດຽວກັນ, ທ່ານນາຍົກລັດຖະມົນຕີໄທ ປຣະຢຸດ ຈັນໂອຈາ ໄດ້ໄປຍັງສະຖານທູດຫວຽດນາມປະຈຳໄທທີ່ບາງກອກເພື່ອໄວ້ອາໄລ ແລະ ຈົດບັນທຶກໃສ່ປຶ້ມໄວ້ອາໄລທ່ານປະທານປະເທດຫວຽດນາມ ເຈີນດ້າຍກວາງ. ແຕ່ວັນທີ 24 ຫາວັນທີ 26 ກັນຍາ, ບັນດາອົງການ, ສຳນັກງານ, ຫ້ອງການຕ່າງໆຢູ່ໄທ ລ້ວນແຕ່ລົດທຸງລົງເຄິ່ງເສົາເພື່ອໄວ້ທຸກອາໄລຫາເຖິງທ່ານປະທານປະເທດຫວຽດນາມ ເຈີນດ້າຍກວາງ. ທ່ານນາຍົກລັດຖະມົນຕີໄທ ແລະ ລັດຖະມົນຕີການຕ່າງປະເທດໄທກໍໄດ້ ສົ່ງໂທລະເລກແບ່ງເບົາຄວາມເສົ້າສະຫຼົດໃຈຕໍ່ການເຖິງແກ່ ມໍລະນະກຳຂອງທ່ານປະທານປະເທດເຈິ່ນດ້າຍກວາງ ເຖິງທ່ານນາຍົກ ລັດຖະມົນຕີ ຫງວຽນຊວນຟຸກ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຝ້າມບິງມິນເຊັ່ນດຽວກັນ.
ກ່ອນໜ້ານັ້ນ, ໃນວັນທີ 21 ກັນຍາ, ທ່ານນາຍົກລັດຖະມົນຕີຈີນ ຫຼີເຄີຊຽງ ກໍ່ໄດ້ຝາກໂທລະເລກແບ່ງເບົາຄວາມເສົ້າສະຫຼົດໃຈຕໍ່ການເຖິງແກ່ມໍລະນະກຳຂອງທ່ານປະທານປະເທດ ເຈິ່ນດ້າຍກວາງ ເຖິງທ່ານນາຍົກລັດຖະມົນຕີ ຫງວຽນຊວນຟຸກ.
(ແຫຼ່ງຄັດຈາກ VOV)
