ໃນລາຍການຢ້ຽມຢາມ ບຣາຊິນ ຢ່າງເປັນທາງການ, ຕອນເຊົ້າວັນທີ 24 ກັນຍາ (ຕາມເວລາທ້ອງຖິ່ນ), ຢູ່ນະຄອນ Sao Paulo, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ເຂົ້າຮ່ວມໂອ້ລົມສົນທະນາກັບວິສາຫະກິດ ບຣາຊິນ ເພື່ອແນໃສ່ແລກປ່ຽນ ໂອກາດຮ່ວມມື, ລົງທຶນ, ເຊື່ອມຕໍ່ການດຳເນີນທຸລະກິດ ແລະ ພ້ອມກັນສ້າງບັນດາມູນຄ່າ ແລະ ກຳລັງໜູນເຕີບໂຕໃໝ່, ເພື່ອຊຸກຍູ້, ຍົກລະດັບການພົວພັນຮ່ວມມືເສດຖະກິດ ຫວຽດນາມ - ບຣາຊິນ ທັງໃນດ້ານຄຸນນະພາບ ແລະ ກ້າວເຂົ້າສູ່ລວງເລິກໃນໄລຍະຈະມາເຖິງ.
ຕາມທ່ານນາຍົກລັດຖະມົນຕີ ແລ້ວ, ພາຍຫຼັງເກືອບ 35 ປີແຫ່ງວັນສ້າງຕັ້ງສາຍພົວພັນທາງການທູດ, ພິເສດ, ນັບແຕ່ເວລາສ້າງການພົວພັນຄູ່ຮ່ວມມືຮອບດ້ານໃນປີ 2007, ການພົວພັນຮ່ວມມື ຫວຽດນາມ - ບຣາຊິນ ສືບຕໍ່ພັດທະນາຢ່າງຕັ້ງໜ້າໃນທຸກຂົງເຂດ. ການພົວພັນດ້ານການເມືອງນັບມື້ນັບສະໜິດຕິດພັນ ແລະ ໄວ້ເນື້ອເຊື່ອໃຈ, ໃນຂະນະທີ່ການພົວພັນເສດຖະກິດ - ການຄ້າ ນັບມື້ນັບໄດ້ເພີ່ມຂຶ້ນ. ປະຈຸບັນ, ຫວຽດນາມ ແລະ ບຣາຊິນ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງກັນຢູ່ພາກພື້ນ ອາຊີຕາເວັນອອກສ່ຽງໃຕ້ ແລະ ອາເມລິກາໃຕ້, ດ້ວຍວົງເງິນການຄ້າປີ 2022 ບັນລຸລະດັບສະຖິຕິ ປະມານ 6,78 ຕື້ໂດລາສະຫະລັດ, ເພີ່ມຂຶ້ນ 6,6% ເມື່ອທຽບໃສ່ປີ 2021.
ທ່ານນາຍົກລັດຖະມົນຕີ ຖືວ່າ: ສອງປະເທດຄວນສົ່ງເສີມ ແລະ ຊຸກຍູ້ການລົງທຶນ ແລະ ການຄ້າສອງສົ້ນ, ບົນພື້ນຖານຕ່າງຝ່າຍຕ່າງມີຜົນປະໂຫຍດ; ເພີ່ມທະວີການແລກປ່ຽນບັນດາຄະນະວິສາຫະກິດໄປສຳຫຼວດ ຊອກຮູ້ຕະຫຼາດ, ໂອກາດໃນການລົງທຶນ ແລະ ເຊື່ອມຕໍ່ດຳເນີນທຸລະກິດ ເພື່ອແນໃສ່ຍົກລະດັບການພົວພັນການຄ້າ - ການລົງທຶນ ສົມກັບຄວາມສາມາດບົ່ມຊ້ອນ, ທ່າໄດ້ປຽບຂອງສອງປະເທດ.
