ໃນກອງປະຊຸມ ຄະນະຊີ້ນຳວຽກງານປ້ອງກັນ, ສະກັດກັ້ນໂລກລະບາດໂຄວິດ - 19 ເຊິ່ງຖືກດຳເນີນໃນຕອນບ່າຍວັນທີ 9 ກຸມພາ, ທ່ານເລຂາຄະນະພັກນະຄອນ ໂຮ່ຈີມິນ ຫງວຽນວັນເນັນ ຢັ້ງຢືນວ່າ ສະພາບການໂລກລະບາດໂຄວິດ - 19 ໃນບໍລິເວນນະຄອນ ໂຮ່ຈີມິນ ພວມມີການຜັນແປຢ່າງສັບສົນ, ມີຄວາມສ່ຽງແຜ່ລະບາດໃນຊຸມຊົນເປັນຢ່າງສູງ ຍ້ອນຍັງບໍ່ທັນກຳນົດໄດ້ແຫຼ່ງແຜ່ເຊື້ອເທື່ອ. ສະນັ້ນ, ທ່ານ ປາດຖະໜາວ່າ ໜ່ວຍງານປ້ອງກັນ, ສະກັດກັ້ນໂລກລະບາດໂຄວິດ - 19 ພິເສດ ຂອງ ກະຊວງສາທາລະນະສຸກ ຫວຽດນາມ ຈະສຶກສາຄົ້ນຄວ້າ, ແນະນຳ, ສົມທົບກັບບັນດາສະຖານທີ່ທີ່ມີຄວາມສ່ຽງສູງ ເພື່ອແນໃສ່ກວດວິໄຈ ແລະ ຊອກຫາແຫຼ່ງແຜ່ເຊື້ອຂອງໂລກລະບາດໂດຍໄວ ເພື່ອໃຫ້ນະຄອນ ໂຮ່ຈີມິນ ເປັນເຈົ້າການ ແລະ ມີວິທີການໂດຍໄວ ເພື່ອຄວບຄຸມໂລກລະບາດໄດ້ເປັນຢ່າງດີ.
ທ່ານຮອງລັດຖະມົນຕີກະຊວງສາທາລະນະສຸກ ຫງວຽນເຈື່ອງເຊີນ ກໍໃຫ້ຮູ້ວ່າ ກະຊວງສາທາລະນະສຸກ ຊີ້ນຳບັນດາຫົວໜ່ວຍສັງກັດກະຊວງ ທີ່ ປະຈຳນະຄອນໂຮ່ຈີມິນ ມານະພະຍາຍາມຢ່າງສຸດຂີດເພື່ອຊ່ວຍນະຄອນ ໂຮ່ຈີມິນ ປ້ອງກັນ ແລະ ຕ້ານໂລກລະບາດ.
ສຳລັບຈຳນວນຜູ້ຕິດເຊື້ອໃນທົ່ວປະເທດ ຫວຽດນາມ, ນັບແຕ່ເວລາ 18 ໂມງ ຂອງວັນທີ 9 ກຸມພາ ຫາເວລາ 6 ໂມງຂອງວັນທີ 10 ກຸມພາ, ຫວຽດນາມ ຢັ້ງຢືນມີກໍລະນີຕິດເຊື້ອລາຍໃໝ່ໃນຊຸມຊົນຕື່ມອີກ 1 ກໍລະນີ ຢູ່ແຂວງ ບັກຢາງ, ອັນໄດ້ຍົກຈຳນວນຜູ້ຕິດເຊື້ອຢູ່ ຫວຽດນາມ ສະສົມ 2.070 ກໍລະນີ, ໃນນັ້ນ ມີ 1.177 ກໍລະນີຕິດເຊື້ອພາຍປະເທດ ແລະ 1.474 ກໍລະນີ ປິ່ນປົວຫາຍດີ, ມີ 35 ກໍລະນີເສຍຊີວິດ.
ສ່ວນຢູ່ໃນໂລກ, ຕາມເວັບໄຊສະຖິຕິ worldometers.info ແລ້ວ, ໄລ່ຮອດເວລາ 2 ໂມງຂອງວັນທີ 10 ກຸມພາ (ຕາມເວລາ UTC), ທົ່ວໂລກມີຜູ້ຕິດເຊື້ອລວມທັງໝົດກວ່າ 107 ລ້ານຄົນ, ໃນນັ້ນ ມີຜູ້ເສຍຊີວິດກວ່າ 2 ລ້ານຄົນ.
(ແຫຼ່ງຄັດຈາກ VOV)
