ຂ່າວສານ
ທ່ານນາຍົກລັດຖະມົນຕີ ຟ້າມມິງຈິງ: ຈັດໃຫ້ປະຊາຊົນຕ້ອນຮັບບຸນປີໃໝ່ຢ່າງເບີກບານມ່ວນຊື່ນ, ປອດໄພ, ປອດໃສຈົບງາມ ແລະ ປະຢັດ
ຕອນເຊົ້າວັນທີ 25 ມັງກອນ, ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ແລະ ຄະນະປະຕິບັດງານຂອງສູນກາງ ໄດ້ລົງຢ້ຽມຢາມ ແລະ ອວຍພອນບຸນເຕັດ, ພົບປະສັງສັນກັບສະມາຊິກສະໂມສອນ ຮ່າມຣົ່ງ, ເຊິ່ງເປັນບ່ອນເຕົ້າໂຮມພະນັກງານປະຕິວັດຜູ້ອາວຸໂສ, ພະນັກງານຂັ້ນກາງ, ຂັ້ນສູງຂອງພັກ, ອຳນາດການປົກຄອງ, ກຳລັງປະກອບອາວຸດ ທີ່ໄດ້ພັກກິນເບ້ຍບຳນານໃນບໍລິເວນນະຄອນ ແທັງຮວ໊າ; ມອບຂອງຂວັນໃຫ້ຄອບຄົວເປົ້າໝາຍນະໂຍບາຍ, ຄອບຄົວທຸກຍາກ, ສະມາຊິກກຳມະບານ, ກຳມະກອນ, ແຮງງານທຸກຍາກ, ຜູ້ປະສົບກັບຄວາມຫຍຸ້ງຍາກ, ຜູ້ຖືກຜົນກະທົບຢ່າງໜັກໜ່ວງຈາກໂລກລະບາດໂຄວິດ - 19 ຢູ່ເຂດອຸດສາຫະກຳ ເຫຼມົນ.
ທ່ານນາຍົກລັດຖະມົນຕີ ຟ້າມມິງຈິງ ເນັ້ນໜັກວ່າ ປີ 2022, ບັນດາໜ້າທີ່ຈຸດສຸມແມ່ນສືບຕໍ່ປະຕິບັດບັ້ນສັກວັກຊິນກັນພະຍາດໂຄວິດ - 19 ຢ່າງວ່ອງໄວກວ່າອີກ, ຜັນຂະຫຍາຍໂຄງການສັງລວມທັງປ້ອງກັນໂລກລະບາດ, ໂຄງການຟື້ນຟູ ແລະ ພັດທະນາເສດຖະກິດສັງຄົມ, ປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ຮັກສາສະຖຽນລະພາບດ້ານການເມືອງ, ຄວາມໝັ້ນຄົງ, ຄວາມປອດໄພໃຫ້ແກ່ປະຊາຊົນໃຫ້ມີປະສິດທິຜົນ… ພ້ອມດຽວກັນນັ້ນ, ເອົາໃຈໃສ່ເຖິງວຽກງານກໍ່ສ້າງເຮືອນຢູ່ໃຫ້ແກ່ກຳມະກອນຫຼາຍກວ່າອີກ. ທ່ານນາຍົກລັດຖະມົນຕີ ສະເໜີໃຫ້ອົງຄະນະພັກ, ອຳນາດການປົກຄອງທຸກຂັ້ນ ແລະ ອົງການຕ່າງໆ ຈົ່ງມີຄວາມເອົາໃຈໃສ່ໃຫ້ເປັນຢ່າງດີເພື່ອໃຫ້ປະຊາຊົນ ແລະ ຜູ້ອອກແຮງງານໄດ້ຕ້ອນຮັບບຸນເຕັດຢ່າງເບີກບານມ່ວນຊື່ນ, ປອດໄພ, ປອດໃສ, ປະຢັດ ແລະ ເຕັມໄປດ້ວຍຄວາມຮັກແພງ.
(ແຫຼ່ງຄັດຈາກ VOV)
