ຂ່າວສານ
ທ່ານນາຍົກລັດຖະມົນຕີຫວຽດນາມ ຟ້າມມິນຈິງ ມາຮອດນະຄອນຫຼວງໂຕກຽວ, ເລີ່ມຕົ້ນການຢ້ຽມຢາມຍີ່ປຸ່ນ ຢ່າງເປັນທາງການ
ຕອນຄ່ຳວັນທີ 22 ພະຈິກ, ຕາມເວລາທ້ອງຖິ່ນ, ເຮືອບິນສົ່ງທ່ານນາຍົກລັດຖະມົນຕີ ຟ້າມມິນຈິງ ແລະ ຄະນະຜູ້ແທນຂັ້ນສູງຫວຽດນາມ ໄດ້ລົງຈອດຢູ່ສະໜາມບິນ Haneda ທີ່ນະຄອນຫຼວງໂຕກຽວ, ເລີ່ມຕົ້ນການຢ້ຽມຢາມຍີ່ປຸ່ນ ຢ່າງເປັນທາງການ ຕາມຄຳເຊີນຂອງທ່ານນາຍົກລັດຖະມົນຕີຍີ່ປຸ່ນ Kishida Fumio.
ມາຕ້ອນຮັບທ່ານນາຍົກລັດຖະມົນຕີ ຟ້າມມິນຈິງ ແລະ ຄະນະຜູ້ແທນຂັ້ນສູງຫວຽດນາມ ຢູ່ສະໜາມບິນ ຝ່າຍຍີ່ປຸ່ນ ມີທ່ານຮອງລັດຖະມົນຕີການຕ່າງປະເທດ Miyake Shingo; ທ່ານນາງ Shino Mitsuko ຫົວໜ້າກຸ່ມພິທີການ, ກະຊວງການທ່ານປະເທດ, ທ່ານນາງ Yamada Takio. ເອກອັກຄະລັດຖະທູດຍີ່ປຸ່ນ ປະຈຳຫວຽດນາມ. ຝ່າຍຫວຽດນາມ ມີທ່ານເອກອັກຄະລັດຖະທູດຫວຽດນາມ ປະຈຳຍີ່ປຸ່ນ ຫວູ້ຮົ່ງນາມ ແລະ ຊາວຫວຽດນາມ ອາໄສຢູ່ຍີ່ປຸ່ນ.ຄາດວ່າ ໃນການຢ້ຽມຢາມຍີ່ປຸ່ນ ຢ່າງເປັນທາງການແຕ່ວັນທີ 22-25 ພະຈິກ, ທ່ານນາຍົກລັດຖະມົນຕີ ຟ້າມມິນຈິງ ຈະພົບປະເຈລະຈາກັບທ່ານນາຍົກລັດຖະມົນຕີຍີ່ປຸ່ນ Kishida Fumio. ພົບປະກັບທ່ານປະທານສະພາສູງ ແລະ ສະພາຕ່ຳຍີ່ປຸ່ນ; ພົບປະກັບທ່ານປະທານພັກກອມມູນິດຍີ່ປຸ່ນ, ສະຫະພາບສະມາຊິກລັດຖະສະພາມິດຕະພາບຍີ່ປຸ່ນ-ຫວຽດນາມ; ບັນດາອະດີດການນຳຍິ່ປຸ່ນ.
ທ່ານນາຍົກລັດຖະມົນຕີຫວຽດນາມ ຟ້າມມິນຈິງ ກໍ່ຈະເຂົ້າຮ່ວມ ແລະ ກ່າວຄຳປາໄສຢູ່ກອງປະຊຸມສົ່ງເສີມການລົງທຶນຢູ່ຍີ່ປຸ່ນ; ໂອ້ລົມສົນທະນາກັບສະຫະພັນວິສາຫະກິດຍີ່ປຸ່ນ (Keidanren); ຕ້ອນຮັບການນຳອົງການຮ່ວມມືສາກົນຍີ່ປຸ່ນ (JICA) ແລະ ບັນດາວິສາຫະກິດແຖວໜ້າຂອງຍີ່ປຸ່ນ.
ໃນການຢ້ຽມຢາມຄັ້ງນີ້, ທ່ານນາຍົກລັດຖະມົນຕີຫວຽດນາມ ຟ້າມມິນຈິງ ກໍ່ຈະສະຫງວນເວລາພົບປະກັບປະຊາຄົມ ຊາວຫວຽດນາມ ອາໄສຢູ່ຍີ່ປຸ່ນ ອີກດ້ວຍ.
(ແຫຼ່ງຄັດຈາກ VOV)
