ໃນຈົດໝາຍ, ທ່ານເລຂາທິການໃຫຍ່, ປະທານປະເທດ ລາວ ສະແດງຄວາມເຊື່ອໝັ້ນວ່າ ທ່ານປະທານປະເທດ ເລືອງເກືອງ ພ້ອມກັບບັນດາການນຳພັກ, ລັດ ຫວຽດນາມ ຈະນຳພາປະເທດ ແລະ ປະຊາຊົນ ຫວຽດນາມ ສືບຕໍ່ຍາດໄດ້ບັນດາຜົນງານໃໝ່, ໃຫຍ່ຫຼວງກວ່າໃນພາລະກິດແຫ່ງການປ່ຽນແປງໃໝ່ ເພື່ອແນໃສ່ບັນລຸໄດ້ເປົ້າໝາຍກາຍເປັນປະເທດ ອຸດສາຫະກຳຕາມທິດທັນສະໄໝ, ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ. ທ່ານເລຂາທິການໃຫຍ່, ປະທານປະເທດ ລາວ ປາດຖະໜາຢາກຮ່ວມມືຢ່າງແໜ້ນແຟ້ນກັບທ່ານປະທານປະເທດ ເລືອງເກືອງ ເພື່ອແນໃສ່ສືບຕໍ່ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ, ມູນເຊື້ອອັນດີງາມລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ລາວ - ຫວຽດນາມ ໃຫ້ນັບມື້ນັບພັດທະນາ ແລະ ແຕກດອກອອກຜົນ, ນຳມາເຊິ່ງຜົນປະໂຫຍດອັນແທດຈິງໃຫ້ແກ່ປະຊາຊົນສອງປະເທດກໍຄືເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ພາກພື້ນ ແລະ ໃນໂລກ.
ກໍໃນວັນດຽວກັນ, ໃນສື່ສັງຄົມອອນໄລ Instagram, ແຕກບັນຊີຂອງຕົນ, ທ່ານNicolas Maduro Moros ປະທານພັກສັງຄົມນິຍົມເອກະພາບ (PSUV), ທ່ານປະທານາທິບໍດີ ເວເນຊູເອລາ ກໍໄດ້ສະແດງຄວາມຊົມເຊີຍທ່ານ ເລືອງເກືອງ ພ້ອມທັງຢັ້ງຢືນວ່າ ຈະສືບຕໍ່ມານະພະຍາຍາມປັບປຸງ ແລະ ເພີ່ມທະວີການພົວພັນລະຫວ່າງສອງປະເທດ ເວເລຊູເອລາ - ຫວຽດນາມ”.
ກໍໃນວັນດຽວກັນ, ທ່ານປະທານພັກແນວໂຮມປົດປ່ອຍຊາດ Sandino (FSLN), ທ່ານປະທານາທິບໍດີ Nicaragua Daniel Ortega ແລະ ທ່ານຮອງປະທານາທິບໍດີ Nicaragua Rosario Murillo ກໍໄດ້ຊົມເຊີຍທ່ານປະທານປະເທດ ເລືອງເກືອງ ເຊັ່ນດຽວກັນ.
