ທ່ານ ມາຍຕ໊ຽນຢຸງ ລັດຖະມົນຕີ, ຫົວໜ້າຫ້ອງວ່າການລັດຖະບານ (ພາບ: VGP)
ຕາມທ່ານ ມາຍຕ໊ຽນຢຸງ ລັດຖະມົນຕີ, ຫົວໜ້າຫ້ອງວ່າການລັດຖະບານແລ້ວ, ປີ 2019 ຜ່ານໄປໄດ້ 8 ເດືອນ ສະພາບການເຕີີບໂຕເສດຖະກິດໂລກພັດທະນາຢ່າງຊັກຊ້າ ແລະ ການຄ້າທົ່ວໂລກຖືກຊຸດໂຊມ. ເຖິງວ່າຖືກຜົນກະທົບບໍ່ດີຈາກເສດຖະກິດທົ່ວໂລກກໍ່ຕາມ, ແຕ່ຫຼາຍອົງການຈັດຕັ້ງສາກົນຍັງມີການຕີລາຄາຢ່າງຕັ້ງໜ້າກ່ຽວກັບແງ່ຫວັງຂອງເສດຖະກິດຫວຽດນາມໃນປີ 2019. ທ່ານລັດຖະມົນຕີ ມາຍຕ໊ຽນຢຸງ ໃຫ້ຮູ້ວ່າ:
“ອາດຈະຢັ້ງຢືນໄດ້ວ່າ ການເຕີບໂຕຂອງເສດຖະກິດຫວຽດນາມ ໃກ້ຈະບັນລຸລະດັບສູງຕາມເປົ້າໝາຍສູ້ຊົນຂອງປີ 2019 ແມ່ນ 6,6 – 6,8% ເຊິ່ງສະພາແຫ່ງຊາດຫວຽດນາມໄດ້ມອບໝາຍໃຫ້. ດັດຊະນີລາຄາໃຊ້ຈ່າຍສະເລ່ຍ 8 ເດືອນຂອງປີ 2019 ເພີ່ມຂ້ຶນ 2,57% ເມື່ອທຽບໃສ່ໄລຍະດຽວກັນຂອງປີກາຍ, ນີ້ແມ່ນລະດັບເພີ່ມຂຶ້ນສະເລ່ຍ 8 ເດືອນ ຕໍ່າທີ່ສຸດໃນ 3 ປີ ມານີ້. ການເກັບງົບປະມານແຫ່ງລັດບັນລຸໄດ້ລະດັບປານກາງ ອັນໄດ້ສະແດງໃຫ້ເຫັນຄວາມສາມາດຕົວຈິງຂອງພື້ນຖານເສດຖະກິດຫວຽດນາມ, ພິເສດແມ່ນການເກັບງົບປະມານສູູນກາງເພີ່ມຂຶ້ນລື່ນກາຍແຜນງົບປະມານ ຢ່າງຕໍ່ເນື່ອງພາຍໃນ 3 ປີ”.ເພື່ອສືບຕໍ່ເພີ່ມເຕີມກໍາລັງຄວາມສາມາດບົ່ມຊ້ອນໃຫ້ແກ່ພື້ນຖານເສດຖະກິດນັ້ນ, ຕ້ອງສືບຕໍ່ສ້າງກົນໄກບຸກທະລຸເພື່ອດຶງດູດນັກລົງທຶນ, ທີ່ກອງປະຊຸມສະໄໝສາມັນເທື່ອທີ 8 ສະພາແຫ່ງຊາດຊຸດທີ 14 ເຊິ່ງຈະຈັດຂຶ້ນໃນເດືອນຕຸລາ 2019 ນີ້, ລັດຖະບານ ຈະຍື່ນສະເໜີຮ່າງກົດໝາຍວ່າດ້ວຍລົງທຶນຕາມຮູບການຄູ່ຮ່ວມມືພາກລັດ - ເອກະຊົນ (PPP). ສະພາແຫ່ງຊາດຈະປະກອບຄໍາເຫັນໃສ່ຮ່າງກົດໝາຍສະບັບດັ່ງກ່າວ ແລະ ຄາດວ່າຈະໄດ້ຮັບຮອງເອົາໃນກອງປະຊຸມສະໄໝສາມັນເທື່ອທີ 9, ຄາດວ່າຈະຈັດຂຶ້ນໃນເດືອນພຶດສະພາ 2020.
(ແຫຼ່ງຄັດຈາກ VOV)
