ຕອນເຊົ້າວັນທີ 18 ທັນວາ, ຢູ່ສຳນັກງານລັດຖະບານ, ທີ່ ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ເປັນປະທານກອງປະຊຸມທາງໄກສະຫຼຸບວຽກງານປີ 2024 ແລະ ຜັນຂະຫຍາຍໜ້າທີ່ຈຸດສຸມຂະແໜງວັດທະນະທຳ, ກິລາ ແລະ ທ່ອງທ່ຽວປີ 2025.
ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ຮຽກຮ້ອງໃຫ້ຂະແໜງວັດທະນະທຳ, ກິລາ ແລະ ທ່ອງທ່ຽວ ສ້າງລະບອບລະບຽບການໃຫ້ສົມບູນແບບ; ພັດທະນາປັນຍາປະດິດ, ຖືການພັດທະນາພື້ນຖານໂຄງລ່າງດີຈີຕອນເປັນສຳຄັນ; ບຳລຸງສ້າງແຫຼ່ງຊັບພະຍາກອນທີ່ມີຄຸນນະພາບສູງໃຫ້ແກ່ຂະແໜງ. ທ່ານນາຍົກລັດຖະມົນຕີ ເນັ້ນໜັກວ່າ, ປີ 2025, ຂະແໜງວັດທະນະທຳ, ກິລາ ແລະ ທ່ອງທ່ຽວຕ້ອງເພີ່ມຄວາມໄວ, ບຸກທະລຸດ້ວຍຈິນຕະນາການປ່ຽນແປງໃໝ່, ມີວິໄສທັດຍຸດທະສາດ.
“ພື້ນຖານວັດທະນະທຳຂອງຊາດ ຫວຽດນາມ ດ້ວຍບົດບາດປະຫວັດສາດນັບພັນປີ ແມ່ນກຳລັງແຮງຍືນຍົງຄົງຕົວຕະຫຼອດໄປຂອງຊາດ; ການພັດທະນາກິລາກາຍຍະກຳແມ່ນຄວາມຮຽກຮ້ອງຢ່າງພາວະວິໄສ, ຄວາມຮຽກຮ້ອງແບບບັງຄັບ, ປະກອບສ່ວນສ້າງຊາດເຂັ້ມແຂງ, ນຳມາເຊິ່ງສຸຂະພາບທີ່ດີໃຫ້ແກ່ປະຊາຊົນ. ການທ່ອງທ່ຽວແມ່ນຂະແໜງປາຍແຫຼມ. ສະນັ້ນ, ຂະແໜງວັດທະນະທຳ, ກິລາ ແລະ ທ່ອງທ່ຽວ ມີບົດບາດສຳຄັນຍິ່ງ, ສົ່ງຜົນກະທົບຢ່າງເລິກເຊິ່ງ, ກວ້າງຂວາງ, ມີລັກນະສະທົ່ວປວງຊົນ, ຮອບດ້ານ, ທົ່ວໂລກ”.
