ດ້ວຍຄວາມປາດຖະໜາ ທີ່ຈະໃຫ້ເດັກໆ ມີເຄື່ອງຫຼິ້ນ ທີ່ມີລັກສະນະຫົວຄິດປະດິດສ້າງ ຈາກວັດຖຸດິບ ຂອງ ຫວຽດນາມ, ນັກຈິດຕະກອນ ຫງວຽນວັນແທັກ (ອາຍຸ 61 ປີ, ເມືອງ ກວັກອວາຍ, ຮ່າໂນ້ຍ) ໄດ້ “ຫັນ” ໄມ້ໄຜ່ ໃຫ້ກາຍເປັນເຄື່ອງຫຼິ້ນ ສິລະປະສູງ.
ໃນເຮືອນນ້ອຍຫຼັງໜຶ່ງຢູ່ຄຸ້ມຖະໜົນເກົ່າ ຮ່າໂນ້ຍ, ນັບແຕ່ອອກກິນເບ້ຍບຳນານ, ແຕ່ລະມື້, ທ່ານ ຫງວຽນວັນແທັກ ພ້ອມກັບ ພັນລະຍາ ໄດ້ຕັດ ແລະ ເຈາະໄມ້ໄຜ່ ທີ່ຊື້ມາຈາກ ກວັກອວາຍ ເພື່ອເຮັດເຄື່ອງຫຼິ້ນ ໃຫ້ຫຼານ ແລະ ມີບາງຄົນ ໄດ້ມາຖາມຊື້.
ທ່ານ ຫງວຽນວັນແທັກ ໃຫ້ຮູ້ວ່າ: “ແຕ່ກ່ອນ, ຂ້າພະເຈົ້າເຄີຍ ເປັນນັກຮຽນສິລະປະ ແລະ ໄດ້ຮັບການແນະນຳຈາກລູກຊາຍວ່າ ຄວນເຮັດເຄື່ອງຫຼິ້ນ ໃດໜຶ່ງເພື່ອໃຫ້ເປັນມິດກັບສິ່ງແວດລ້ອມ, ສະນັ້ນ, ຂ້າພະເຈົ້າ ຈຶ່ງຄິດຢາກເຮັດຜະລິດຕະພັນ ຈາກໄມ້ໄຜ່. ທຳອິດຂ້າພະເຈົ້າ ພຽງແຕ່ເຮັດໃຫ້ ຫຼານຫຼິ້ນເທົ່ານັ້ນ, ເມື່ອຂ້າພະເຈົ້າເອົາລົງທາງອິນເຕີເນັດ, ມີບາງຄົນຖາມຊື້, ຂ້າພະເຈົ້າໄດ້ສືບຕໍ່ເຮັດເຄື່ອງຫຼິ້ນເພື່ອຂາຍ”.
ທ່ານ ແທັກ ໃຫ້ຮູ້ວ່າ ການປະດິດສ້າງ ເຄື່ອງຫຼິ້ນພື້ນເມືອງ ຊະນິດໜຶ່ງ ປະກອບດ້ວຍຫຼາຍຂັ້ນຕອນ. ທໍາອິດ, ຊື້ໄມ້ໄຜ່ມາແລ້ວຕັດ ເປັນສ່ວນຕົ້ນຕໍ, ສ່ວນຍ່ອຍ ແລະ ສ່ວນປີກຍ່ອຍທີ່ກ່ຽວຂ້ອງ. ຂັ້ນຕອນຕໍ່ໄປແມ່ນຕັດ ແລະ ເຮັດໄມ້ໄຜ່ ມີຄວາມກ້ຽງ. ເມື່ອໄດ້ຜະ ລິດຕະພັນດິບ ຕາມຄວາມຕ້ອງການແລ້ວ, ທ່ານ ແທັກ ຈຶ່ງເອົາລົງໃສ່ໝໍ້ ຕົ້ມກັບ ໄຮໂດຣເຈນ ເບີອອກໄຊ ເປັນເວລາ ຫຼາຍຊົ່ວໂມງ ເພື່ອປ້ອງກັນປວກ-ມອດ.
ພາຍຫຼັງຕົ້ມແລ້ວ, ທ່ານ ແທກ ສືບຕໍ່ໃຊ້ມີດ, ເລື່ອຍ, ສີ່ວ ເພື່ອ ຕັດ, ເຈາະ ແລ້ວປະກອບໃຫ້ເປັນຮູບຮ່າງບັນດາ ສັດ ພື້ນເມືອງ. ເມື່ອໄດ້ຮັບຜະລິດຕະພັນທີ່ໜ້າພໍໃຈ, ຂັ້ນຕອນສຸດທ້າຍທີ່ ທ່ານ ແທັກ ຕ້ອງເຮັດຄື ພົ່ນສີປ້ອງກັນຄວາມຊຸ່ມຊື່ນ ກ່ອນຈະນໍາໄປຕາກແຫ້ງ. ຕາມປົກກະຕິແລ້ວ, ເຄື່ອງຫຼິ້ນແຕ່ລະແບບ ຈະໃຊ້ເວລາພຽງແຕ່ 15 - 20 ນາທີ ເທົ່ານັ້ນ.
ສິ່ງໜຶ່ງທີ່ເຮັດໃຫ້ ທ່ານ ແທັກ ມີຄວາມສົນໃຈຫຼາຍ, ແມ່ນເມື່ອເຫັນຜະລິດຕະພັນ ຂອງ ເພິ່ນໄດ້ລົງຂາຍທາງອອນລາຍ, ຫຼາຍຄົນຢູ່ບັນດາແຂວງ, ນະຄອນຕ່່່າງໆ ໄດ້ຊອກຫາມາໂຮງງານຂອງເພິ່ນ ເພື່ອຮຽນຮູ້ອາຊີບ. ຄືກັບສະເໜ່, ນັກຈິດຕະກອນ ຄົນນີ້ ໄດ້ກາຍ ເປັນແຮງບັນດານໃຈ ໃຫ້ແກ່ນັກຮຽນຫຼາຍຄົນ. ເມື່ອເຖິງລະດູພັກ ແລ້ງ, ໂຮງງານຂະໜາດນ້ອຍໄດ້ກາຍເປັນຈຸດນັດພົບ ສໍາລັບເດັກ ນ້ອຍໃນບ້ານ.
ດ້ວຍຄວາມປາດຖະໜາ ຢາກເຮັດໃຫ້ບັນດາຜະລິດຕະພັນ ເຄື່ອງຫຼິ້ນຂອງຕົນ ກາຍເປັນຂົວເຊື່ອມຕໍ່ທີ່ເປັນມິດ, ມີຜົນປະໂຫຍດທີ່ສຸດກັບໂລກຂອງເດັກນ້ອຍ ໃນຄອບຄົວ ຂອງເຂົາເຈົ້າ, ນັກຈິດຕະ ກອນ ຫງວຽນວັນແທັກ ໄດ້ເປີດບັນດາ ຫ້ອງຮຽນໃຫ້ເດັກນ້ອຍຢູ່ ຮ່າໂນ້ຍ ມາເຂົ້າຮ່ວມ ແລະ ນຳເອົາຄວາມຮູ້ນີ້ ມາໃຫ້ປະຊາຊົນບັນດາໝູ່ບ້ານຫ່າງໄກສອກຫຼີກ ຂອງ ຫວຽດນາມ.
ບົດ: VNP/ເງິນຮ່າ - ພາບ: ແຄ໋ງລອງ ແລະ ເອກະສານ - ແປໂດຍ: ຢືຟຽນ
