ໂດຍໄດ້ຮັບຄຳເຊື້ອເຊີນຂອງກະຊວງປ້ອງກັນປະເທດ ມາເລເຊຍ, ຄະນະຜູ້ແທນຂັ້ນສູງກະຊວງປ້ອງກັນປະເທດ ຫວຽດນາມ ໂດຍທ່ານ ພົນໂທ ຫງວຽນເຈື່ອງຖັງ, ຮອງລັດຖະມົນຕີກະຊວງປ້ອງກັນປະເທດເປັນຫົວໜ້າຄະນະ, ໄດ້ເຂົ້າຮ່ວມງານວາງສະແດງປ້ອງກັນຊາດ ອາຊີ ແລະ ຄວາມໝັ້ນຄົງແຫ່ງຊາດ ອາຊີ (DSA) ຄັ້ງທີ 19, ຈັດຂຶ້ນຢູ່ ມາເລເຊຍ.
ຄະນະຜູ້ແທນ ຫວຽດນາມ ເຂົ້າຮ່ວມພິທີໄຂງານວາງສະແດງ (ພາບ: ກະຊວງປ້ອງກັນປະເທດ)
ງານວາງສະແດງປ້ອງກັນຊາດ ອາຊີ DSA 2026 ໄດ້ດຳເນີນແຕ່ວັນທີ 20 – 23 ເມສາ, ໂດຍມີການເຂົ້າຮ່ວມຂອງກອງທັບ 60 ປະເທດ, ໃນນັ້ນ ມີ 38 ປະເທດເຂົ້າຮ່ວມງານວາງສະແດງ ແລະ ບໍລິສັດ, ກຸ່ມບໍລິສັດອຸດສາຫະກຳປ້ອງກັນຊາດປະມານ 1.400 ແຫ່ງຂອງ ໂລກ.
ທ່ານພົນໂທ ຫງວຽນເຈື່ອງຖັງ ພົບປະກັບທ່ານ Adly Bin Zahari ຮອງລັດຖະມົນຕີກະຊວງປ້ອງກັນປະເທດ ມາເລເຊຍ (ພາບ: ກະຊວງປ້ອງກັນປະເທດ)
ໃນຂອບເຂດການຢ້ຽມຢາມ, ເຮັດວຽກ ແລະ ເຂົ້າຮ່ວມງານວາງສະແດງປ້ອງກັນຊາດ ອາຊີ ແລະ ຄວາມໝັ້ນຄົງແຫ່ງຊາດ ອາຊີ (DSA) ຄັ້ງທີ 19 ຢູ່ ມາເລເຊຍ, ຕອນບ່າຍວັນທີ 20 ເມສາ, ທ່ານພົນໂທ ຫງວຽນເຈື່ອງຖັງ ໄດ້ພົບປະກັບທ່ານ Adly Bin Zahari ຮອງລັດຖະມົນຕີກະຊວງປ້ອງກັນປະເທດ ມາເລເຊຍ. ສອງຝ່າຍເຫັນດີຊຸກຍູ້ການຮ່ວມມືດ້ານປ້ອງກັນຊາດສອງຝ່າຍໃຫ້ນັບມື້ນັບຮອບດ້ານ, ແທດຈິງ, ລົງນາມໃນບົດບັນທຶກຄວາມເຂົ້າໃຈລະຫວ່າງລັດຖະບານສອງປະເທດກ່ຽວກັບການປະຕິບັດກົດໝາຍ ແລະ ຊອກຫາຜູ້ປະສົບເຄາະຮ້າຍຢູ່ທະເລໂດຍໄວ; ຂໍ້ຕົກລົງສ້າງຕັ້ງກົນໄກລາດຕະເວນຮ່ວມຢູ່ທະເລ ແລະ ຊ່ອງທາງຕິດຕໍ່ພົວພັນລະຫວ່າງກອງທັບເຮືອສອງປະເທດ, ສົມທົບກັນແລກປ່ຽນຂໍ້ມູນຂ່າວສານ, ປະຕິບັດກົດໝາຍ, ຊ່ວຍເຫຼືອກ່ຳປັ່ນຫາປາ ແລະ ຊາວປະມົງຂອງກັນທີ່ປະສົບເຫດຮ້າຍຢູ່ທະເລ, ກໍຄືມີການປະພຶດມະນຸດສະທຳສຳລັບກ່ຳປັ່ນຫາປາ ແລະ ຊາວປະມົງ, ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສ, ກົນໄກຫຼາຍຝ່າຍ.
(ແຫຼ່ງຄັດຈາກ VOV)