ດ້ວຍຄວາມຫຼົງໄຫຼ ໃນບັນດາຜະລິດຕະພັນ ສິລະປະຫັດຖະກຳ, ທ່ານ ແທງຕຸ່ງ ແລະ ນາງ ຮວ່າຍແອ໋ງ ໄດ້ສ້າງເຄື່ອງໝາຍການຄ້າ Tomato Handmade, ແມ່ນເຄື່ອງໝາຍບຸກເບີກໃນຂົງເຂດຜະ ລິດ ເຄື່ອງຫັດຖະກຳ ຫວຽດ ທີ່ຜະລິດຈາກຜ້າຄຸນນະພາບສູງ.
ເປັນ 2 ຄົນ ທີ່ຮຽນຈົບວິຊາການດ້ານການເງິນ ແລະ ສະຖາປັດຕະ ຍະກຳ, ພາຍຫຼັງທີ່ເຮັດວຽກ ຢູ່ຫຼາຍບໍລິສັດຕ່າງກັນ, ທ່ານ ແທງຕຸ່ງ ແລະ ທ່ານນາງ ຮວ່າຍແອ໋ງ ລອງເຮັດຖົງຜ້າ ແລະ ຕຸກກະຕານ້ອຍ ແລ້ວເອົາໄປຂາຍຢູ່ Ecopark ແລະ West Lake ໃນທ້າຍອາທິດ. ເມື່ອພວກເຂົາ ເຫັນລູກຄ້າຫຼາຍຄົນຊື້, ທັງສອງເລີ່ມຄິດເຖິງເລື່ອງຈະສ້າງ ຜະລິດ ຕະພັນທີ່ມີຍີ່ຫໍ້ ເປັນຂອງຕົນເອງ. ສະນັ້ນ, Tomato Handmade ໄດ້ຮັບການສ້າງຕັ້ງຂຶ້ນໂດຍທ່ານ ແທງຕຸ່ງ ແລະ ທ່ານນາງ ຮວ່າຍແອງ໋ ໃນປີ 2016.
ທ່ານ ຕຸ່ງ ໃຫ້ຮູ້ວ່າ ໄລຍະທຳອິດ, Tomato Handmade ໄດ້ສຸມໃສ່ບັນດາຜະລິດຕະພັນ ຮັບໃຊ້ການທ່ອງທ່ຽວ ເພື່ອວາງຈຳໜ່າຍຢູ່ສະໜາມບິນສາກົນ ໂນຍບ໋າຍ, ພ້ອມກັນນັ້ນ ເປີດຮ້ານອີກຫຼາຍແຫ່ງຢູ່ຖະໜົນ ຮ່າງໂບດ ແລະ ຖະໜົນ ເອົາຈ້ຽວ (ຮ່າໂນ້ຍ), ມີລູກຄ້າຕ່າງ ປະເທດ ມາເລືອກຊື້ ເປັນຈຳນວນຫຼາຍ, ສ້າງລາຍຮັບແຕ່ 20-30 ລ້ານດົ່ງຕໍ່ມື້. ແຕ່ເມື່ອພະຍາດໂຄວິດແຜ່ລະບາດ, Tomato Handmade ໄດ້ຫັນມາເປັນຜະລິດຕະພັນຂອງຂວັນ, ລູກຄ້າຕົ້ນຕໍ່ ສ່ວນຫຼາຍແມ່ນບັນດາວິສາຫະກິດ.
ເພື່ອໃຫ້ Tomato Handmade ມີລົມຫາຍໃຈ ຢູ່ໃນແຕ່ລະຜະລິດຕະພັນຂອງຕົນ, ການອອກແບບ ຈະໄດ້ນາງ ຮວ່າຍແອ໋ງ ອອກແບບດ້ວຍຕົນເອງ. ຫຼັງຈາກນັ້ນ ຈະພ້ອມກັບເພື່ອນຮ່ວມງານ ປະຕິບັດຕໍ່ ບັນດາຂັ້ນ ຕອນການສ້າງຕົວແບບ, ການຄິດໄລ່ຂະໜາດ ຂອງ ຕົວ ຢ່າງ, ແລ້ວປະຕິບັດຂັ້ນຕອນການຕັດຫຍິບ ຜະລິດຕະພັນ.
ນາງ ຮວ່າຍແອ໋ງ ກ່າວວ່າ ປັດຈຸບັນ ຜະລິດຕະພັນ Tomato Handmade ໄດ້ນຳໃຊ້ວັດຖຸດິບ ທີ່ນຳເຂົ້າຈາກ ສ ເກົາຫຼີ ແລະ ສ ອາ ເມລິກາ, 100% cotton ເພື່ອແນໃສ່ ເປັນມິດກັບສິ່ງແວດລ້ອມ. ນອກຈາກນັ້ນ, ວັດສະດຸ ທີ່ນຳໃຊ້ຍັງມີແພພື້ນເມືອງ, ແຕ່ໄດ້ເລືອກ ເຟັ້ນຈາກເຄື່ອງນຸ່ງ ເກົ່າ ຂອງຊາວເຜົ່າ ມົ້ງ ຫຼື ຂອງບັນດານາຍຊ່າງປັກແສ່ວ ຜູ້ເຖົ້າ ຢູ່ ມາຍເຈົາ (ຮ່ວາບິ່ງ). ແຕກຕ່າງກັບຜະລິດຕະພັນ Handmade ໃນສະຖານທີ່ອື່ນໆ, ບັນດາຜະລິດຕະພັນ Tomato Handmade ມັກຈະເອົາໃຈໃສ່ ເຖິງຄຸນປະໂຫຍດຂອງຜະລິດຕະພັນ. ຕົວຢ່າງ, ກະເປົ໋າເງິນ ນອກເໜືອຈາກການ ສ້າງຊ່ອງໃສ່ເງິນ ແລະ ບັດ, ການອອກແບບມັກຈະມາພ້ອມກັບສາຍຮັດມື ຫຼື ສາຍແຂນເພີ່ມເຕີມເພື່ອໃຫ້ຜູ້ໃຊ້ ນຳໃຊ້ໄດ້ຢ່າງສະດວກ.
ພິເສດ, ຜະລິດຕະພັນ ໄດ້ຮັບການນິຍົມຊື້ຫຼາຍ ແລະ ມີລາຄາແພງທີ່ສຸດຂອງ Tomato Handmade ໃນປັດຈຸບັນ ແມ່ນຖົງທີ່ເຮັດຕາມ ສິລະປະ ການຕໍ່ແພຫຼາຍຊັ້ນໃສ່ກັນ (ຍັງເອີ້ນວ່າ quilt). ນີ້ແມ່ນ ເຕັກນິກການ ຕັດຫຍິບທີ່ງ່າຍ ແຕ່ຕ້ອງການ ຄວາມລະມັດ ລະວັງ ແລະ ຄວາມອົດທົນ. ສິ່ງທີ່ຍາກທີ່ສຸດໃນເຕັກນິກການ ຕໍ່ແພ quilting ແມ່ນຢູ່ໃນວິທີການປະສານສົມທົບ ລະຫວ່າງສີສັນ ແລະ ລວດລາຍແນວໃດໃຫ້ເໝາະສົມ, ສະແດງອອກເຖິງ ຄວາມງາມ ແລະ ຄວາມຄິດສ້າງສັນ ຂອງນາຍຊ່າງ. ຈາກຄວາມເປັນເອກະລັກຂອງຜະລິດ ຕະພັນແຕ່ລະຢ່າງ, quilting ໄດ້ກາຍເປັນວິຊາສິລະປະໜຶ່ງ ທີ່ຫຼາຍຄົນມັກ. ປັດຈຸບັນ, ລາຄາຂອງຖົງໜ່ວຍໜຶ່ງ Tomato Handmade ຈະຂາຍໃນລາຄາ 2-3 ລ້ານດົ່ງ ຂຶ້ນກັບຂະ ໜາດ ແລະ ຮູບແບບ.
ປັດຈຸບັນ, ຜະລິດຕະພັນຂອງ Tomato Handmade ມີຄວາມຫຼາກຫຼາຍຮູບແບບ, ມຸ່ງໄປເຖິງປະເພດລູກຄ້າ ແຕກຕ່າງກັນເຊັ່ນ: ຖົງ, ຖົງເປ້, ເຄື່ອງຕົກແຕ່ງເຮືອນ ຫຼື ເຄື່ອງຫິ້ຼນຂອງເດັກນ້ອຍ... ເມື່ອມາຢ້ຽມຊົມຫ້ອງວາງ ສະແດງຂອງ Tomato Handmade ຢູ່ຖະໜົນ ຮ້າດິ່ງ (ຮ່າໂນ້ຍ), ທ່ານ ສາມາດຊອກຫາໄດ້ບັນດາ ຜະລິດ ຕະພັນທີ່ໜ້າຮັກ, ນັບແຕ່ແພຮອງຈອກ, ແພປູໂຕະ ເຖິງໝອນກອດນອນ, ເຄື່ອງປະດັບ ແຟຊັ່ນ ທີ່ເຮັດດ້ວຍແພ ສຳລັບ ການຍ່າງຖະໜົນໃນວັນອາທິດ, ຊຸດຜ້າປູທີ່ນອນ ບໍ່ພຽງແຕ່ງາມເທ່ົານັ້ນ, ແຕ່ຍັງມີຄຸນນະພາບດີທີ່ສຸດອີກດ້ວຍ ຫຼື ສິ່ງສ້າງຄວາມປະທັບໃຈກວ່ານັ້ນ ແມ່ນຂອງຂວັນ ສໍາລັບເດັກນ້ອຍ.
ທ່ານ ຕຸ່ງ ໃຫ້ຮູ້ວ່າ ເມື່ອຂະແໜງທ່ອງທ່ຽວ ໄດ້ຮັບການຟື້ນຕົວຈາກການລະບາດ ໂຄວິດ-19, ແຕ່ໃນປັດຈຸບັນ, Tomato Handmade ຍັງສຸມໃສ່ໃນຜະລິດຕະພັນຮັບໃຊ້ວິສາຫະກິດເປັນຕົ້ນຕໍ ແລະ ເລີ່ມເປີດກວ້າງການຈຳໜ່າຍຜະລິດຕະພັນການແລກປ່ຽນທາງ e-commerce ຂອງ ຫວຽດນາມ ດ້ວຍບັນດາຜະລິດຕະພັນມີລາຄາ ທີ່ເໝາະສົມກັບຜູ້ບໍລິໂພກ.
ບົດ: VNP/ເງິນຮ່າ - ພາບ: ແຄ໋ງລອງ - ແປໂດຍ: ຢືຟຽນ
