ວັນທີ 5 ມິຖຸນາ, ທີ່ສຸສານນັກຮົບເສຍສະຫຼະຊີວິດເພື່ອຊາດ ຫງອັກໂຮ່ຍ, ຄະນະພັກແຂວງ, ສະພາປະຊາຊົນ, ຄະນະກໍາມະການປະຊາຊົນ, ຄະນະກໍາມະການແນວໂຮມປະເທດຊາດຫວຽດນາມ ແຂວງກວ໋າງຫງາຍ ໄດ້ຈັດພິທີໄວ້ອາໄລ, ເຄົາລົບສົບ ແລະປົງອັດຖິທະຫານອາສາສະໝັກ ແລະຊ່ຽວຊານຫວຽດນາມ ທີ່ເສຍສະຫຼະຊີວິດໃນປາງສົງຄາມຢູ່ ລາວ ແລະກໍາປູເຈຍ ຈໍານວນ 16 ອັດຖິ, ເຊິ່ງໄດ້້ທ້ອນໂຮມໃນລະດູແລ້ງ 2025-2026.
ເຂົ້າຮ່ວມພິທີມີ ທ່ານນາງ ຟ້າມທິແທັງຈ່າ ເລຂາທິການສູນກາງພັກ, ຮອງນາຍົກລັດຖະມົນຕີ, ຫົວໜ້າຄະນະຊີ້ນໍາແຫ່ງຊາດ ກ່ຽວກັບການຊອກຫາ, ທ້ອນໂຮມ ແລະກໍານົດຊື່ ແລະນາມສະກຸນອັດຖິນັກຮົບເສຍສະຫຼະຊີວິດ ເພື່ອຊາດ.
ເຂົ້າຮ່ວມພິທີຍັງມີທ່ານພົນໂທ ຫງວຽນເຈື່ອງຖັ໋ງ ກໍາມະການສູນກາງພັກ, ຄະນະປະຈໍາຄະນະພັກການທະຫານສູນກາງ, ຮອງລັດຖະມົນຕີກະຊວງປ້ອງກັນປະເທດ; ບັນດາສະຫາຍກໍາມະການສູນກາງພັກ; ການນໍາຄະນະ, ກະຊວງ, ຂະແໜງການຂັ້ນສູນກາງ, ຄະນະຊີ້ນໍາແຫ່ງຊາດ...
ປະຕິບັດແຜນການລະດູແລ້ງ 2025-2026 ແລະຕອບສະໜອງບັ້ນເຄື່ອນໄຫວ “500 ວັນ ແລະຄືນຊອກຫາ, ທ້ອນໂຮມ ແລະກໍານົດຊື່ ແລະນາມສະກຸນອັດຖິນັກຮົບເສຍສະຫຼະຊີວິດເພື່ອຊາດ”, ກອງທ້ອນໂຮມອັດຖິ ກອງບັນຊາການທະຫານແຂວງກວ໋າງຫງາຍ (ກອງ K53) ໄດ້ຜັນຂະຫຍາຍການຊອກຄົ້ນ, ທ້ອນໂຮມ ແລະຈັດສົ່ງອັດຖິນັກຮົບເສຍສະຫຼະຊີວິດ ໃນບໍລິເວນ 3 ແຂວງພາກໃຕ້ຂອງລາວ ແລະແຂວງ Ratanakiri (ກໍາປູເຈຍ).
ໝາກຜົນ, ຊອກຄົ້ນ, ທ້ອນໂຮມໄດ້ 16 ອັດຖິ, ລະອຽດແມ່ນ: ຢູ່ແຂວງ Ratanakiri ຊອກຄົ້ນໄດ້ 6 ອັດຖິ; ແຂວງເຊກອງ ຊອກຄົ້ນໄດ້ 3 ອັດຖິ; ແຂວງຈໍາປາສັກ ຊອກຄົ້ນໄດ້ 1 ອັດຖິ ແລະແຂວງອັດຕະປື ຊອກຄົ້ນໄດ້ 6 ອັດຖິ.
ໃນບັນຍາກາດທີ່ເຄັ່ງຂຶມ, ສະເທືອນໃຈ, ບັນດາຜູ້ແທນ ໄດ້ຖະຫວາຍດອກໄມ້, ຈູດທູບທຽນອາໄລຫາ, ສະແດງຄວາມເຄົາລົບນັບຖື, ຄວາມຮູ້ບຸນຄຸນອັນເລິກເຊິ່ງຕໍ່ການອຸທິດສ່ວນອັນໃຫຍ່ຫຼວງຂອງວິລະຊົນນັກຮົບເສຍສະຫຼະຊີວິດ ເພື່ອພາລະກິດປົດປ່ອຍຊາດ, ປົກປັກຮັກສາປະເທດຊາດ ແລະເຮັດໜ້າທີ່ສາກົນອັນສູງສົ່ງ.
