ວັນທີ 16 ມັງກອນ, ທ່ານ Donald Trump, ປະທານາທິບໍດີ ອາເມລິກາ ໄດ້ສົ່ງຈົດໝາຍເຖິງທ່ານ ໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ, ເຊີນທ່ານເລຂາທິການໃຫຍ່ ໂຕເລິມ ແລະ ຫວຽດນາມ ເຂົ້າຮ່ວມສະພາສັນຕິພາບເຂດ ກາຊາ ດ້ວຍຖານະເປັນປະເທດກໍ່ຕັ້ງ, ພ້ອມກັບປະຊາຄົມສາກົນຊຸກຍູ້ມາດຕະການສັນຕິພາບແບບຍືນຍົງໃຫ້ແກ່ການປະທະກັນລະຫວ່າງ ອິດສະຣາແອັນ ແລະ ປາແລັດສະຕິນ ຢູ່ເຂດ ກາຊາ.
ເມື່ອຕອບຈົດໝາຍເຊື້ອເຊີນຂອງທ່ານປະທານາທິບໍດີ Donald Trump, ທ່ານເລຂາທິການໃຫຍ່ ໂຕເລິມ ເນັ້ນໜັກເຖິງຫຼັກໝັ້ນສະເໝີຕົ້ນສະເໝີປາຍຂອງ ຫວຽດນາມ ແມ່ນຍາມໃດກໍ່ສະໜັບສະໜູນ ແລະ ພ້ອມແລ້ວຈະປະກອບສ່ວນເຂົ້າໃນຄວາມມານະພະຍາຍາມລວມຂອງປະຊາຄົມສາກົນ ມຸ່ງໄປເຖິງການແກ້ໄຂການປະທະກັນ, ຄວາມບໍ່ລົງລອຍກັນໂດຍສັນຕິວິທີ, ສອດຄ່ອງກັບກົດໝາຍສາກົນ ແລະ ກົດບັດສະຫະປະຊາຊາດ, ເຄົາລົບສິດພື້ນຖານຂອງບັນດາຝ່າຍທີ່ກ່ຽວຂ້ອງ. ທ່ານເລຂາທິການໃຫຍ່ ໂຕເລິມ ຮັບຄຳເຊີນເຂົ້າຮ່ວມສະພາສັນຕິພາບ ແລະ ຢືນຢັນວ່າ ຫວຽດນາມ ພ້ອມແລ້ວຈະເຂົ້າຮ່ວມດ້ວຍຖານະເປັນປະເທດກໍ່ຕັ້ງຂອງສະພາສັນຕິພາບ, ພ້ອມກັບ ອາເມລິກາ ແລະ ປະຊາຄົມສາກົນປະກອບສ່ວນຢ່າງຕັ້ງໜ້າມຸ່ງໄປເຖິງມາດຕະການແກ້ໄຂຢ່າງຍາວນານ, ຮອບດ້ານໃຫ້ແກ່ວິວັດທະນາການສັນຕິພາບພາກພື້ນ ຕາເວັນອອກກາງ, ໃນນັ້ນມີເລື່ອງ ສ້າງລັດ ປາແລັດສະຕິນ ຄົງຕົວດ້ວຍສັນຕິພາບພ້ອມກັບລັດ ອິດສະຣາແອັນ.
ໃນຈົດໝາຍ, ທ່ານເລຂາທິການໃຫຍ່ ໂຕເລິມ ກໍ່ສະເໜີ ຫວຽດນາມ ແລະ ອາເມລິກາ ສືບຕໍ່ຮ່ວມມືກັນຊຸກຍູ້ການພົວພັນຄູ່ຮ່ວມມືຍຸດທະສາດຮອດດ້ານລະຫວ່າງ 2 ປະເທດໃຫ້ແທດຈິງ, ມີປະສິດທິຜົນ; ເພີ່ມທະວີການຮ່ວມມືໃນຫຼາຍຂົງເຂດທີ່ເໝາະສົມກັບຄວາມຕ້ອງການ ແລະ ບຸລິມະສິດຂອງ 2 ຝ່າຍ, ບົນພື້ນຖານເຄົາລົບເຊິ່ງກັນແລະກັນ, ຮັບປະກັນຜົນປະໂຫຍດອັນຊອບທຳຂອງແຕ່ລະປະເທດ, ປະກອບສ່ວນຢ່າງຕັ້ງໜ້າໃຫ້ແກ່ສັນຕິພາບ, ການຮ່ວມມື ແລະ ພັດທະນາຢູ່ພາກພື້ນ ກໍຄືໃນໂລກ.
