ເສີມຂະຫຍາຍບົດບາດ, ການປະກອບສ່ວນຂອງຊາວຫວຽດນາມ ອາໄສຢູ່ຕ່າງປະເທດ ໃນວຽກງານປ້ອງກັນ, ຕ້ານໂລກລະບາດໂຄວິດ - 19
ວັນທີ 27 ສິງຫາ, ຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ຈັດກອງປະຊຸມທາງໄກ ກັບບັນດາກຳມະການຄະນະກຳມະການສູນກາງແນວໂຮມປະເທດຊາດ ຫວຽດນາມ ຊຸດທີ IX ແລະ ບາງອົງການຈັດຕັ້ງ, ສະມາຄົມ, ຄະນະຊາວຫວຽດນາມ ອາໄສຢູ່ຕ່າງປະເທດ.
ທີ່ກອງປະຊຸມ, ທ່ານ ໂດ໋ວັນຈຽນ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ໄດ້ຮັບຮູ້, ຕີລາຄາສູງບັນດາກຳມະການຄະນະກຳມະການ, ປະຊາຄົມຊາວຫວຽດນາມ, ບັນດາສະມາຄົມ, ຄະນະຊາວຫວຽດນາມ ອາໄສຢູ່ຕ່າງ ປະເທດ ທີ່ໄດ້ສະຫງວນບັນດານ້ຳໃຈຄວາມຮັກແພງ, ຄວາມຮັບຜິດຊອບ ຕໍ່ບ້ານເກີດເມືອງນອນ, ໃນນັ້ນຕ້ອງເວົ້າເຖິງບັນດາການປະກອບສ່ວນກ່ຽວກັບພູມປັນຍາ, ເຫື່ອແຮງ, ວັດຖຸເພື່ອພັດທະນາເສດຖະກິດໃຫ້ແກ່ປະເທດຊາດ, ພິເສດແມ່ນການສະໜັບສະໜູນຂອງຊາວຫວຽດນາມອາໄສຢູ່ຕ່າງປະເທດ ໃນວຽກງານປ້ອງກັນ, ຕ້ານໂລກລະບາດໂຄວິດ - 19. ທ່ານ ໂດ໋ວັນຈຽນ ມີຄວາມປາດຖະໜາວ່າ ໃນໄລຍະຈະມາເຖິງ, ບັນດາກຳມະການຂອງ ຄະນະກຳມະການສູນກາງແນວໂຮມປະເທດຊາດ ຫວຽດນາມ ສືບຕໍ່ກຳແໜ້ນສະພາບການ, ແນວຄິດຈິດໃຈ, ຄວາມມຸ່ງມາດປາດຖະໜາຂອງ ຊາວຫວຽດນາມ ອາໄສຢູ່ຕ່າງປະເທດ ເພື່ອສ່ອງແສງ, ສະເໜີແນະໄປຍັງ ພັກ, ລັດ ແລະ ແນວໂຮມປະເທດຊາດ, ຂົນຂວາຍຊາວຫວຽດນາມ ອາໄສຢູ່ຕ່າງປະເທດ ຕອບສະໜອງບັນດາຂະບວນການແຂ່ງຂັນຮັກຊາດ, ຄຳຮຽກຮ້ອງຂອງທ່ານເລຂາທິການໃຫຍ່ ຫງວຽນຝູຈ້ອງ, ຄະນະປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ກ່ຽວກັບການປ້ອງກັນ, ຕ້ານໂລກລະບາດໂຄວິດ - 19, ຈັດຕັ້ງຫຼາຍການເຄື່ອນໄຫວທີ່ແທດຈິງ ໃນປະຊາຄົມ ເພື່ອແນໃສ່ປັບປຸງຢ່າງແໜ້ນແຟ້ນກຸ່ມກ້ອນມະຫາສາມັກຄີທົ່ວປວງຊົນທັງຊາດ.
(ແຫຼ່ງຄັດຈາກ VOV)