13/04/2020 09:05 GMT+7 Email Print Like 0

ຫ້ອງຮຽນບໍ່ມີພົມແດນ: ມາດຕະການໃນການຮ່ຳ ຮຽນຢ່າງມີປະສິດທິຜົນໜູນຊ່ວຍນັກຮຽນຮ່ຳຮຽນໄດ້ທຸກເວລາ

      ນີ້ແມ່ນຮູບແບບການຮ່ຳຮຽນຜ່ານທາງໂທລະພາບໃນຂອບເຂດທົ່ວປະເທດ.

ສະຖານີໂທລະພາບດີຈີຕອນ VTC ໄດ້ສົມທົບກັບລະບົບການສຶກສາ Hocmai
ສ້າງລາຍການຫ້ອງຮຽນຜ່ານທາງໂທລະພາບ
(ພາບ: hocmai)
      ບໍ່ໄດ້ໄປໂຮງຮຽນຍ້ອນໂລກລະບາດໂຄວິດ-19 ເຮັດແນວໃດບັນດານັກຮຽນ ຈຶ່ງຈະໄດ້ຮ່ຳຮຽນ, ທວນຄືນບົດຮຽນ. ນັ້ນບໍ່ພຽງແຕ່ແມ່ນຄວາມເປັນຫ່ວງເປັນໄຍຂອງຜູ້ປົກຄອງເທົ່ານັ້ນ, ຫາກຍັງແມ່ນຂອງບັນດາຄູອາຈານອີກດ້ວຍ. ເພື່ອແນໃສ່ຫັນບັນດາແຜນນະໂຍບາຍຂອງລັດຖະບານໃຫ້ລະອຽດກ່ຽວກັບການສ້າງເງື່ອນໄຂໃຫ້ດີທີ່ສຸດເພື່ອຊ່ວຍເຫຼືອພວກນ້ອງນັກຮຽນໄດ້ຮ່ຳຮຽນໃນເວລາພັກໂຮງຮຽນ, ສະຖານີໂທລະພາບດີຈີຕອນ VTC ໄດ້ສົມທົບກັບລະບົບການສຶກສາ Hocmai (ແປ່ວ່າຮຽນຕະຫຼອດໄປ)  ສ້າງລາຍການຫ້ອງຮຽນຜ່ານທາງໂທລະພາບ. ນີ້ແມ່ນຮູບແບບການຮ່ຳຮຽນຜ່ານທາງໂທລະພາບໃນຂອບເຂດທົ່ວປະເທດ.
        ນັບແຕ່ວັນທີ 06 ເມສາ ເປັນຕົ້ນໄປ, ສະຖານີໂທລະພາບດີຈີຕອນ VTC ແລະ ລະບົບການສຶກສາ Hocmai ສືບຕໍ່ຮ່ວມມືກັນ ເພື່ອອອກອາກາດບັນດາບົດສອນ, ບົດທວນຄືນສອບເສັງ ໂຮງຮຽນມັດທະຍົມຕອນປາຍແຫ່ງຊາດປີ 2020 ໃນລາຍການ “ຫ້ອງຮຽນບໍ່ມີພົມແດນ”. ບັນດາບົດສອນ ຈະຊ່ວຍໃຫ້ນັກຮຽນໄດ້ ທວນຄືນຄວາມຮູ້, ວິທີການ, ທັກສະທີ່ຈຳເປັນ ເພື່ອກະກຽມໃຫ້ແກ່ການສອບເສັງຂັ້ນມັດທະຍົມຕອນປາຍແຫ່ງຊາດປີ 2020, ມຸ່ງໄປເຖິງເປົາໝາຍພິຈາລະນາຮັບຮອງການສອບເສັງ ຈົບຊັ້ນ ຜ່ານບັນດາບົດສອນທີ່ໄດ້ອອກອາກາດທາງໂທລະພາບ. ລາຍການ “ຫ້ອງຮຽນບໍ່ມີພົມແດນ” ຈະໜູນຊ່ວຍໃຫ້ນັກຮຽນສາມາດຮຽນໄດ້ໃນທຸກເວລາ ແລະ ບໍ່ວ່າຢູ່ແຫ່ງຫົນໃດ. ທ່ານ ຟານຈີ໊ ແທັງ, ຫົວໜ້າສູນປະສານງານລາຍການ, ສະຖານີໂທລະພາບດີຈີຕອນ VTC ໃຫ້ຮູ້ວ່າ.
        “ທາງສະຖານີໂທລະພາບ VTC ໄດ້ຈັດລາຍການຮ່ຳຮຽນຜ່ານທາງໂທລະພາບ ທີ່ມີຄວາມໝາຍອັນໃຫຍ່ຫຼວງ, ນັ້ນແມ່ນພາຍຫຼັງທີ່ພວກນ້ອງພັກໂຮງຮຽນຢູ່ເຮືອນເປັນເວລາດົນ, ຜ່ານລາຍການຮຽນທາງອອນລາຍນີ້ ພວກນ້ອງຈະໄດ້ຮ່ຳຮຽນ, ພົບປະ, ແລກປ່ຽນກັບບັນດາຄູອາຈານ. ສິ່ງທີ່ແຕກຕ່າງແມ່ນ ບັນດາຄູອາຈານບໍ່ໄດ້ພົບປະກັບນັກຮຽນໂດຍກົງ ແຕ່ຜ່ານທາງໂທລະພາບ ກໍ່ສາມາດຊ່ວຍໃຫ້ນັກຮຽນ ໄດ້ສະແດງຄວາມຮັກຕໍ່ໂຮງຮຽນ, ຄວາມກະຕືລືລົ້ນໃນການຮ່ຳຮຽນ. ເພາະສະນັ້ນ, ຜ່ານທາງຊ່ອງໂທລະພາບຂອງ VTC ທີ່ໄດ້ອອກອາກາດໄປໃນທົ່ວປະເທດ ໄດ້ສ້າງເງື່ອນໄຂສະດວກໃຫ້ແກ່ພວກນ້ອງນັກຮຽນ ມີເງື່ອນໄຂໄດ້ຮ່ຳຮຽນ. ສິ່ງສຳຄັນ ລາຍການຮ່ຳຮຽນນີ້ແມ່ນບໍ່ໄດ້ເສຍເງິນ. ”
        ສະຖານີໂທລະພາບ VTC ໄດ້ຮ່ວມມືພ້ອມກັບລະບົບການສຶກສາ Hocmai ຈັດຕັ້ງການຖ່າຍວີດີໂອ ແລະ ຮຽບຮຽງເນື້ອໃນບົດຮຽນ ໃຫ້ແກ່ພວກນ້ອງນັກຮຽນປີສຸດທ້າຍ. ບົດທວນຄືນ ແລະ ຄວາມຮູ້ໃໝ່ສຳລັບບັນດາວິຊາຄື: ວິຊາເລກ, ວັນນະຄະດີ, ພາສາອັງກິດ. ເນື້ອໃນບົດສອນທີ່ໄດ້ອອກອາກາດໄປນັ້ນ ແມ່ນໄດ້ຕິດພັນກັບຫົວຂໍ້ສອບເສັງຈົບຊັ້ນມັດທະຍົມຕອນປາຍ ແຫ່ງຊາດໃນ 2 – 3 ປີມໍ່ໆມານີ້ ແລະ ບັນດາຫົວບົດສອບເສັງທົດລອງຂອງປີ 2020. ອາຈານ ດັ້ງກວາງຮືງ, ຮອງຫົວໜ້າລະບົບການສຶກສາ Hocmai, ໃຫ້ຮູ້ວ່າ.
        “ປະຈຸບັນ, ບັນດາລາຍການໃນລະບົບ Hocmai ໄດ້ສຸມໃສ່ໃຫ້ແກ່ນັກຮຽນສາມັນ ນັບແຕ່ຫ້ອງປໍ1 ຫາຫ້ອງມໍ 7 ດ້ວຍບັນດາວິຊາຮຽນຕົ້ນຕໍ. ຊ້ຳບໍ່ໜຳໃນແຕ່ລະວິຊາຮຽນ ພວກຂ້າພະເຈົ້າຍັງມີບັນດາລາຍການສະເພາະໃຫ້ແກ່ແຕ່ລະກຸ່ມເປົ້າໝາຍ, ແຕ່ລະຄວາມຕ້ອງການທີ່ແຕກຕ່າງກັນ, ນັບແຕ່ການສອນຄວາມຮູ້, ທວນຄືນບົດຮຽນລົງເລິກວິຊາ ຕະຫຼອດຮອດການຍົກສູງຄວາມຮູ້ອື່ນໆ…”
        ດ້ວຍເວລາອອກອາກາດ ແຕ່ລະວິຊາຄາດວ່າແມ່ນ 30 ນາທີ , ສ່ວນບົດສອນ ແມ່ນປະມານ 45 – 60 ນາທີ. ບັນດາບົດສອນທີ່ທາງ VTC ເອົາອອກອາກາດໄປນັ້ນ ລ້ວນແຕ່ແມ່ນບັນດາຄູອາຈານທ່ີມີປະສົບການ ໃນການ ສິດສອນໂດຍກົງ ແລະ ທາງອອນລາຍ ຢູ່ໃນເວັບໄຊ Hocmai.com. ທ່ານ ຟ້າມຢາງລິງ, ຜູ້ອຳນວຍການໃຫຍ່ລະບົບການສຶກສາ Hocmai, ແບ່ງປັນວ່າ.
        “ສຳລັບລາຍການໂທລະພາບຂອງ VTC ນັ້ນ, Hocmai ໄດ້ສ້າງຊ່ອງຖາມ-ຕອບ  ແລະ ຊ່ອງຕອບຮັບທາງອອນລາຍ ເພື່ອໃຫ້ຮູບແບບນີ້ ໄດ້ໜູນຊ່ວຍຮູບແບບການຮໍ່າຮຽນທາງໂທລະພາບທີ່ຂາດການຕອບຮັບໃຫ້ສົມບູນ. ນັກຮຽນສາມາດເຮັດບົດຝຶກຫັດພາຍຫຼັງຮຽນຈົບແຕ່ລະຊົ່ວໂມງ ຄືດັ່ງຮຽນຢູ່ໂຮງຮຽນ ແລະ ນັກຮຽນສາມາດສອບຖາມ, ມີການຕອບຮັບ, ພົວພັນກັບຜູ້ທີ່ເຂົ້າຮ່ວມການຮ່ຳຮຽນຜ່ານທາງໂທລະພາບນີ້.”
        ບັນດາວິຊາຮຽນຕ່າງໆເຊິ່ງຄາດວ່າຈະອອກອາກາດ ແມ່ນ: ວິຊາເລກ, ວັນນະຄະດີ, ພາສາອັງກິດ, ຟິຊິກສາດ, ເຄມີສາດ, ປະຫວັດສາດ… ແຕ່ລະວິຊາແມ່ນສອນຜ່ານທາງສະຖານີໂທລະພາບ VTC ເລີ່ມແຕ່ເວລາ 9 ໂມງ - 21 ໂມງ, ໃນຊ່ອງ VTC 8 ແລະ VTC 11. ນັກຮຽນກໍ່ສາມາດຮຽນຜ່ານໂປຼແກຼມ OTTVTC ແລະ ເວັບໄຊ: Protal.vtc.gov.vn. ໃນໄລຍະນີ້, ສະຖານີໂທລະພາບ VTC ລະບົບການສຶກສາ Hocmai ຈະສືບຕໍ່ຄົ້ນຄວ້າ, ປ່ຽນແປງໂຄງປະກອບຂອງລາຍການ ເພື່ອໃຫ້ເໝາະສົມກັບຄວາມຕ້ອງການຂອງຜູ້ປົກຄອງ ແລະ ນັກຮຽນໃນທົ່ວປະເທດ.
 (ແຫຼ່ງຄັດຈາກ VOV)