18/02/2020 09:09 GMT+7 Email Print Like 0

ຫວຽດນາມ ຈະມີຂໍ້ລິເລີ່ມ ແລະ ບຸລິມະສິດຫຼາຍຢ່າງໃນເສົາຄໍ້າເສດຖະກິດ ອາຊຽນ

      ໃນປີ ເປັນປະທານ ອາຊຽນ 2020, ໄປຄຽງຄູ່ກັບບັນດາເປົ້າໝາຍຍູ້ແຮງການພົວພັນຄູ່ຮ່ວມມືຂອງ ອາຊຽນ, ຫວຽດນາມ ຈະມີບັນດາຂໍ້ລິເລີ່ມ ກໍຄືບຸລິມະສິດ ເພື່ອຊຸກຍູ້ເສົາຄໍ້າເສດຖະກິດ, ຖືນີ້ແມ່ນເສົາຄໍ້າພື້ນຖານ, ເພື່ອແນໃສ່ຊຸກຍູ້ການຮ່ວມສໍາພັນ ແລະ ເຊື່ອມຕໍ່, ນໍາ ອາຊຽນ ກາຍເປັນໜຶ່ງໃນບັນດາພາກພື້ນພັດທະນາເສດຖະກິດແຖວໜ້າຂອງໂລກ.
 
      4 ເນື້ອໃນຕົ້ນຕໍກ່ຽວກັບການເຊື່ອມໂຍງເສດຖະກິດພາຍໃນກຸ່ມ ພວມໄດ້ຮັບຄວາມສົນໃຈຈາກບັນດາປະເທດ ອາຊຽນໃນປີ 2020. ນັ້ນແມ່ນ ໄລຍະກາງອາຍຸການປະຕິບັດແຜນການສັງລວມ ກໍ່ສ້າງປະຊາຄົມ ເສດຖະກິດ ອາຊຽນ ປີ 2025 ໃນສະພາບການເສດຖະກິດທົ່ວໂລກ ແລະ ພາກພື້ນ ພວມມີການປ່ຽນແປງ ແລະ ຜັນແປຫຼາຍຢ່າງທີ່ສັບສົນ, ຍາກທີ່ຈະຄາດຄະເນລ່ວງໜ້າໄດ້; ກໍ່ສ້າງຍຸດທະສາດສັງລວມຂອງ ອາຊຽນ ໃນການປະຕິວັດອຸດສາຫະກໍາ ຄັ້ງທີ 4; ຄົ້ນຄວ້າໂດຍພື້ນຖານ ກ່ຽວກັບລະບົບຄຸ້ມຄອງເອກະສານນິຕິກໍາ ພາຍໃນ ອາຊຽນ ແລະ ພິເສດແມ່ນບັນດາບຸລິມະສິດໃນເສົາຄໍ້າເສດຖະກິດ ຂອງ ອາຊຽນ ໃນປີ 2020 ໂດຍ ຫວຽດນາມ ສະເໜີ.
        ບັນດາປະເທດ ອາຊຽນ ພວມພິຈາລະນາ ແລະ ຕີລາຄາສູງການປະກອບສ່ວນຂອງຫວຽດນາມ, ພິເສດແມ່ນກ່ຽວຂ້ອງເຖິງບັນດາບຸລິມະສິດໃນເສົາຄໍ້າເສດຖະກິດຂອງ ອາຊຽນ ໃນປີ 2020 ແລະ ຖືນີ້ ແມ່ນພື້ນຖານເພ່ືອຊຸກຍູ້ການຮ່ວມມືຮອບດ້ານລະຫວ່າງບັນດາປະເທດ ອາຊຽນ ໃນຂົງເຂດເສດຖະກິດ.
        ການເຊື່ອມໂຍງເສດຖະກິດ ອາຊຽນ ແມ່ນພື້ນຖານ
        ບັນດາຂໍ້ລິເລີ່ມ ແລະ ບຸລິມະສິດກ່ຽວກັບການກໍ່ສ້າງເສົາຄໍ້າເສດຖະກິດ ອາຊຽນ ໃນປີ ເປັນປະທານ ອາຊຽນ 2020 ຈະສະແດງບົດບາດເປັນເຈົ້າການ ແລະ ຕັ້ງໜ້າຂອງຫວຽດນາມ, ພ້ອມທັງສະແດງໃຫ້ເຫັນທັດສະນະສະເໝີຕົ້ນສະເໝີປາຍຂອງຫວຽດນາມ ໃນການເຊື່ອມໂຍງເຂົ້າກັບເສດຖະກິດສາກົນ, ຖື ອາຊຽນ ເປັນບຸລິມະສິດຈຸດສຸມແຖວໜ້າ. ປີ 1996, ເມື່ອຫວຽດນາມ ຫາກໍເຂົ້າຮ່ວມກຸ່ມການຄ້າເສລີ ອາຊຽນ (AFTA), ການຄ້າສອງສົ້ນຂອງຫວຽດນາມ ກັບບັນດາປະເທດພາຍໃນກຸ່ມ ພຽງແຕ່ບັນລຸ ປະມານເກືອບ 6 ຕື້ USD ເທົ່ານັ້ນ, ແຕ່ໄລ່ມາຮອດປັດຈຸບັນ, ຕົວເລກດັ່ງກ່າວ ໄດ້ເພີ່ມຂຶ້ນເຖິງຫຼາຍກວ່າ 10 ເທົ່າ, ເຊິ່ງບັນລຸປະມານຫຼາຍກວ່າ 60 ຕື້  USD. ເມື່ອຕີລາຄາກ່ຽວກັບຄວາມສໍາຄັນຂອງການເຊື່່ອມໂຍງເສດຖະກິດ ອາຊຽນ ໃນວິວັດທະນາການເຊື່ອມໂຍງເຂົ້າກັບສາກົນຂອງຫວຽດນາມ, ທ່ານລັດຖະມົນຕີກະຊວງການຄ້າ ແລະ ອຸດສາຫະກໍາຫວຽດນາມ ເຈິ່ນຕ໊ວນແອັງ ຢັ້ງຢືນວ່າ:
        “ການຮ່ວມມືຂອງພວກເຮົາກັບ ອາຊຽນ ແມ່ນບັນດາບາດກ້າວເດີນທໍາອິດ. ຄວາມສາມາດບົ່ມຊ້ອນຂອງຫວຽດນາມໃນການສໍາຜັດກັບເສດຖະກິດຂອງພາກພື້ນ ແລະ ບັນດາພາກພື້ນອື່ນໃນໂລກ ຜ່ານບົດບາດຂອງ ອາຊຽນ ແມ່ນໄດ້ຮັບການຢັ້ງຢືນຢ່າງແຮງ. ການຮ່ວມມືຂອງຫວຽດນາມ ກັບ ອາຊຽນ ໃນທຸກຂົງເຂດ ແລະ ແງ່ມູມ, ໃນນັ້ນ ຖື ເສດຖະກິດແມ່ນເສົາຄໍ້າສໍາຄັນ ໄດ້ນໍາມາເຊິ່ງທີ່ຕັ້ງບົດບາດສໍາຄັນທີີ່ສຸດໃຫ້ແກ່ຫວຽດນາມ ຄືໃນປັດຈຸບັນ, ນັບທັງດ້ານການເມືອງ, ການພົວພັນຕ່າງປະເທດ ກໍຄືເສດຖະກິດ”.
        ການເຊື່ອມໂຍງເຂົ້າກັບເສດຖະກິດ ອາຊຽນ ບໍ່ພຽງແຕ່ນໍາມາເຊິ່ງບັນດາກາລະໂອກາດເພີ່ມທະວີການຊຸກຍູ້ຮ່ວມມືດ້ານການຄ້າກັບໂລກເທົ່ານັ້ນ, ຫາກຍັງປະກອບສ່ວນຢ່າງຕັ້ງໜ້າ ແລະ ມີຄວາມໝາຍໃຫ້ແກ່ການສ້າງໂຄງປະກອບພື້ນຖານເສດຖະກິດຂອງຫວຽດນາມ ຄືນໃໝ່, ສືບຕໍ່ປ່ຽນແປງໃໝ່ຮູບແບບການເຕີບໂຕກໍຄື ຕິດພັນກັບການສ້າງລັດແຫ່ງນິຕິບັນຍັດ, ບົນພື້ນຖານຂອງພື້ນຖານເສດຖະກິດການຕະຫຼາດຕາມກໍານົດທິດສັງຄົມນິຍົມ. 

(ພາບປະກອບ: tapchitaichinh.vn
      ບັນດາກຳນົດທິດບຸລິມະສິດລະອຽດ
        ດ້ວຍ 2 ເນື້ອໃນໃນຫົວຂໍ້ຂອງປີ 2020 ແມ່ນ ຫວຽດນາມກໍ່ໄດ້ມີການກຳນົດທິດບັນດາເປົ້າໝາຍບຸລິມະສິດຢ່າງລະອຽດ. ໃນສະພາບການ ການປະຕິວັດອຸດສາຫະກຳ 4.0, ເສດຖະກິດ ດີຈີຕອນ, ລັດທິອາລັກຂາການຄ້າພຽງລຳພັງຝ່າຍດຽວພວມເປັນບັນດາສິ່ງທ້າທາຍອັນໃຫຍ່ຫຼວງໃຫ້ແກ່ລະບົບການຄ້າຫຼາຍຝ່າຍ ບົນພື້ນຖານກົດໝາຍ, ໃນນັ້ນ ມີບັນດາຂອບເຂດຂອງ ກຸ່ມ AFTA, ບັນຫາແມ່ນເຮັດແນວໃດເພື່ອເພີ່ມທະວີຄວາມສາມາດໃນການຮັບມືຂອງ ອາຊຽນ, ເພີ່ມທະວີການເຊື່ອມຕໍ່ໃນການດຳເນີນທຸລະກິດແບບປະດິດຄິດສ້າງ, ໃນການຄ້າເອເລັກໂຕນິກ, ລົບລ້າງບັນດາສິ່ງກີດຂວາງໃນການເຫັນເປັນການຄ້າເສລີ… ແມ່ນໜຶ່ງໃນບັນດາບຸລິມະສິດຈຸດສຸມຂອງ ປີ ປະທານອາຊຽນ 2020. ທ່ານ ເຈິ່ນຕ໊ວນແອັງ ລັດຖະມົນຕີກະຊວງອຸດສາຫະກຳ ແລະ ການຄ້າ ເນັ້ນໜັກວ່າ:
        ສິ່ງທ້າທາຍທັງໝົດໃນປັດຈຸບັນຮຽກຮ້ອງໃຫ້ພວກເຮົາຕ້ອງມີບົດບາດຂອງປະທານອາຊຽນທີ່ມີກຳລັງຢ່າງພຽງພໍເພື່ອກຳແໜ້ນ, ບໍລິຫານ ແລະ ເພື່ອພ້ອມກັບບັນດາປະເທດອາຊຽນຢັ້ງຢືນອີກຄັ້ງໜຶ່ງຢູ່ລະດັບໃໝ່, ສະພາບການໃໝ່, ດ້ວຍການເຊື່ອມຕໍ່, ຮ່ວມສຳພັນ. ຕ້ອງເຮັດແນວໃດເພື່ອຮັບປະກັນໄດ້ຄວາມອາດສາມາດໃນການຮັບມື ກັບບັນດາການຜັນແປໃໝ່ ແລະ ສືບຕໍ່ສ້າງບັນດາພະລັງຊີວິດໃໝ່ໃຫ້ແກ່ອາຊຽນ, ກໍ່ຄືໃຫ້ແກ່ບັນດາຂອບການຮ່ວມມືຂອງ ອາຊຽນ ແລະ ບັນດາຄູ່ຮ່ວມມື.
        ໃນຖານະເປັນປະທານຂອງ ອາຊຽນ 2020, ປີນີ້ ຫວຽດນາມ ມີຂໍ້ລິ້ເລີ່ມ 16 – 17 ຂໍ້ ທີ່ຜັນຂະຫຍາຍ ໃນຂົງເຂດທັງໝົດຄື: ເສດຖະກິດ, ການຄ້າ, ການລົງທຶນ, ເຕັກໂນໂລຢີ… ພ້ອມກັບບັນດາສົນທິສັນຍາການຄ້າເສລີ (FTA) ທີ່ມີຢູ່ແລ້ວລະຫວ່າງ ອາຊຽນ ກັບບັນດາຄູ່ຮ່ວມມືໃນໂລກ, ສັນຍາຄູ່ຮ່ວມມືຮອບດ້ານເສດຖະກິດໃນພາກພື້ນ (RCEP) ເຊິ່ງ ອາຊຽນຄາດວ່າ ຈະລົງນາມໃນປີນີ້, ການຮ່ວມມືເສດຖະກິດ ອາຊຽນ ປີ 2020 ແນ່ນອນວ່າ ຈະນຳມາເຊິ່ງບັນດາໝາກຜົນໃໝ່.
 (ແຫຼ່ງຄັດຈາກ VOV)