ຕາມເວັບໄຊສະຖິຕິ worldometers.info ແລ້ວ, ໄລ່ຮອດເວລາ 1 ໂມງເຊົ້າຂອງວັນທີ 30 ມີນາ (ຕາມເວລາ UTC), ທົ່ວໂລກຢັ້ງຢືນມີຜູ້ຕິດເຊື້ອພະຍາດໂຄວິດ - 19 ກ່ວາ 128,2 ລ້ານຄົນ, ໃນນັ້ນມີຜູ້ເສຍຊີວິດ 2,8 ລ້ານຄົນ. ໃນຮອບເວລາ 24 ຊົ່ວໂມງທີ່ຜ່ານມາ, ໂລກໄດ້ຢັ້ງຢືນມີຜູ້ຕິດເຊື້ອພະຍາດໂຄວິດ - 19 ລາຍໃໝ່ຕື່ມອີກ 439.000 ຄົນ, ໃນນັ້ນ ອາເມລິກາ ມີຜູ້ຕິດເຊື້ອພະຍາດໂຄວິດ - 19ລາຍໃໝ່ສູງທີ່ສຸດ ດ້ວຍຈຳນວນ 56.500 ຄົນ, ຖັດຈາກນັ້ນແມ່ນ ອິນເດຍ, ບຣາຊິນ, ຕວັກກີ…
ຢູ່ເອີລົບ, ໂລກລະບາດສືບຕໍ່ແຜ່ລາມ. ໃນຮອບເວລາ 24 ຊົ່ວໂມງທີ່ຜ່ານມາ, ໂປໂລຍແມ່ນປະເທດໄດ້ຮັບຮູ້ຈຳນວນຜູ້ຕິດເຊື້ອພະຍາດໂຄວິດ - 19 ລາຍໃໝ່ຕື່ມອີກສູງທີ່ສຸດດ້ວຍ ຈຳນວນເກືອບ 17.000 ຄົນ, ຖັດຈາກນັ້ນແມ່ນ ອີຕາລີ, ເຢຍລະມັນ, ຝລັ່ງ.ສ່ວນຢູ່ ຫວຽດນາມ, ນັບແຕ່ເວລາ 18 ໂມງຂອງວັນທີ 29 ມີນາ ຫາ ເວລາ 6 ໂມງຂອງວັນທີ 30 ມີນາ, ຫວຽດນາມ ບໍ່ກວດພົບຜູ້ຕິດເຊື້ອພະຍາດໂຄວິດ - 19 ລາຍໃໝ່ຕື່ມອີກ. ປັດຈຸບັນ ຫວຽດນາມ ມີຜູ້ຕິດເຊື້ອພະຍາດໂຄວິດ - 19 ລວມທັງໝົດ 2.594 ຄົນ, ໃນນັ້ນມີ 35 ຄົນເສຍຊີວິດ.
ກ່ຽວກັບຄວາມຄືບໜ້າໃນການສັກວັກຊິນ, ມີຜູ້ໄດ້ຮັບການສັກວັກຊິນກັນໂຄວິດ - 19 ເກືອບ 46.500 ຄົນ ຢູ່ 19 ແຂວງ, ນະຄອນ ໃນທົ່ວປະເທດ. ບັນດາຜູ້ໄດ້ຮັບການສັກວັກຊິນ ກັນໂຄວິດ - 19 ແມ່ນພະນັກງານການແພດ, ກຳລັງເຂົ້າຮ່ວມວຽກງານປິ່ນປົວ, ປ້ອງກັນ, ສະກັດກັ້ນໂລກລະບາດໂຄວິດ - 19.
(ແຫຼ່ງຄັດຈາກ VOV)
