ບັນດາວິສາຫະກິດຝະລັ່ງ ຕີລາຄາສູງສະພາບແວດລ້ອມ ແຫ່ງການລົງທຶນຂອງ ຫວຽດນາມ
(ທ່ານ ຫງວຽນງ້ອກເຊີນ ມີການໂອ້ລົມກັບບັນດາສະມາຊິກ
ຂອງສະຫະສະມາຄົມ ຝະລັ່ງ - ອາຊີ)
ຕອນຄ່ຳວັນທີ 17/02, ທ່ານ ຫງວຽນງ້ອກເຊີນ ເອກອັກຄະລັດຖະທູດ ຫວຽດນາມ ປະຈຳ ຝະລັ່ງ ມີການໂອ້ລົມກັບບັນດາສະມາຊິກຂອງສະຫະສະມາຄົມ ຝະລັ່ງ - ອາຊີ (Association France - Asie) ເພື່ອແນໃສ່ແນະນຳບັນດາຜົນງານດີເດັ່ນຂອງ ຫວຽດນາມ ພາຍຫລັງ 30 ປີແຫ່ງການປ່ຽນໃໝ່, ຜົນສຳເລັດຂອງກອງປະຊຸມໃຫຍ່ຄັ້ງທີ 12 ຂອງພັກ ແລະ ຫວນຄືນການພົວພັນ ຫວຽດນາມ - ຝະລັ່ງ. ຜູ້ຕາງໜ້າຂອງວິສາຫະກິດປະມານ 50 ແຫ່ງພ້ອມກັບນັກຮຽນຮູ້ ຝະລັ່ງ ຫລາຍຄົມໄດ້ເຂົ້າຮ່ວມການໂອ້ລົມ. ນະທີ່ນີ້, ທ່ານເອກອັກຄະລັດຖະທູດ ຫງວຽນງ້ອກເຊີນ ໄດ້ແນະນຳບັນດາຂໍ້ມູນຂ່າວໃໝ່ສຸດກ່ຽວກັບສະພາບ ຫວຽດນາມ ຄື: ສະຖຽນລະພາບດ້ານການເມືອງ, ເສດຖະກິດເຕີບໂຕຢ່າງແຮງ, ພາລະກິດຫັນເປັນອຸດສາຫະກຳ, ຫັນເປັນທັນສະໄໝ ແລະ ການເຊື່ອມໂຍງເສດຖະກິດເຂົ້າກັບສາກົນພວມໄດ້ຮັບການຍູ້ໄວ… ກ່ຽວຂ້ອງເຖິງການພົວພັນລະຫວ່າງ ຝະລັ່ງ ແລະ ຫວຽດນາມ, ທ່ານເອກອັກຄະລັດຖະທູດ ສຳຫລວດກວດຄືນການພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອລະຫວ່າງ 2 ປະເທດນັບມື້ນັບໄດ້ຮັບການປັບປຸງ ແລະ ພັດທະນາ ຜ່ານການແລກປ່ຽນບັນດາການຢ້ຽມຢາມຂັ້ນສູງ ແລະ ເພີ່ມທະວີການພົວພັນດ້ານການຄ້າ ແລະ ການລົງທຶນໃນໄລຍະຜ່ານມາ. ທ່ານເອກອັກຄະລັດຖະທູດ ກໍ່ແນະນຳກ່ຽວກັບກອງປະຊຸມໃຫຍ່ຄັ້ງທີ 12 ຂອງພັກ, ເຫດການສຳຄັນຍິ່ງຂອງພັກກອມມູນິດ ຫວຽດນາມ ທີ່ດຳເນີນໃນສະພາບພື້ນຖານເສດຖະກິດ ຫວຽດນາມ ຮັກສາລະດັບເຕີບໂຕ 6,7% ໃນປີ 2015, ເຊິ່ງແມ່ນລະດັບສູງສຸດໃນ 5 ປີຜ່ານມາ.
ເມື່ອໂອ້ລົມກັບນັກຂ່າວ VOV, ຜູ້ຕາງໜ້າບັນດາບໍລິສັດຝລັ່ງ ໄດ້ຕີລາຄາສູງສະພາບແວດລ້ອມແຫ່ງການລົງທຶນຂອງຫວຽດນາມ ແລະ ຖືວ່າ ສະພາບແວດລ້ອມນັບມື້ນັບສະດວກ ແລະ ດຶງດູດສຳລັບບັນດາວິສາຫະກິດຝລັ່ງ. ທ່ານ Jean Marie Cambaceres, ປະທານສະຫະສະມາຄົມ France – Asie, ປະທານສະພາ Harmonie Mekong, ສະມາຊິກສະພາເສດຖະກິດສັງຄົມຂອງຝລັ່ງ ຢືນຢັນວ່າ.
“ພວກຂ້າພະເຈົ້າໄດ້ຕົກລົງພ້ອມກັບສະຖານທູດຈັດຕັ້ງການໂອ້ລົມສົນທະນານີ້ ຍ້ອນຫວຽດນາມ ພວມຢູ່ໃນໄລຍະຫັນປ່ຽນທີ່ສຳຄັນ. ປະທານາທິບໍດີຝລັ່ງ ໄດ້ຢືນຢັນວ່າ ຈະມາຢ້ຽມຢາມຫວຽດນາມ ໃນປີນີ້ ແລະ ດ້ວຍບັນດາເຫດຜົນນັ້ນ, ພວກເຮົາຕົກລົງເຮັດວຽກນັ້ນ. 2 ປະເທດ ໄດ້ລົງນາມໃນສັນຍາກ່ຽວກັບການພົວພັນຄູ່ຮ່ວມມືຍຸດທະສາດ, ແຕ່ການຮ່ວມມືດ້ານການຄ້າຍັງໜ້ອຍຢູ່. ພວກເຮົາໄດ້ມີການພົວພັນຄູ່ຮ່ວມມືຍຸດທະສາດແລ້ວ, ປະຈຸບັນແມ່ນຈຸດເວລາເພື່ອຊຸກຍູ້ເພື່ອມີບັນດາໂຄງການ ແລະ ຜັນຂະຫຍາຍຢ່າງສຳເລັດຜົນ”.
ສ່ວນທ່ານນາງ Marie Beatrice Leveau, ສະມາຊິກສະພາເສດຖະກິດ, ສັງຄົມ ແລະ ສິ່ງແວດລ້ອມຝລັ່ງ ໄດ້ຖືວ່າ.
“ຫວຽດນາມ ແມ່ນສະມາຊິກສຳຄັນໃນອົງການໃຊ້ພາສາຝລັ່ງ. ພວກເຮົາຕ້ອງຄິດໄລ່ເຖິງການຊຸກຍູ້ການຮ່ວມມືດ້ານເສດຖະກິດບົນພື້ນຖານຂອບເຂດໃຊ້ພາສາຝລັ່ງ. ບັນດາວິສາຫະກິດຝລັ່ງ ຍັງບໍ່ທັນຮູ້ຈັກເຖິງຫວຽດນາມ ຢ່າງພຽງພໍ, ການຮ່ວມມືດ້ານການທ່ອງທ່ຽວໄດ້ດີແລ້ວ, ແຕ່ການຮ່ວມມືດ້ານເສດຖະກິດຍັງບໍ່ທັນໄດ້ຮັບການຊຸກຍູ້. ພວກເຮົາຕ້ອງມີຄວາມມານະພະຍາຍາມ, ຄວາມເອົາໃຈໃສ່ຢູ່ທັງ 2 ຝ່າຍ.”
(ແຫຼ່ງຄັດຈາກ VOV)