ຂ່າວສານ

ນາຍົກລັດຖະມົນຕີກຳປູເຈຍສິ້ນສຸດການຢ້ຽມຢາມຫວຽດນາມເປັນທາງການຢ່າງຈັບງາມ

23/12/2016

ທ່ານນາຍົກລັດຖະມົນຕີລາຊະອານາຈັກ ກຳປູເຈຍ Samdec Techno Hun Sen

          ຕອນບ່າຍວັນທີ 21/12, ທ່ານນາຍົກລັດຖະມົນຕີລາຊະອານາຈັກ ກຳປູເຈຍ Samdec Techno Hun Sen ພ້ອມກັບຄະນະຜູ້ແທນຂັ້ນສູງລັດຖະບານ ລາຊະອານາຈັກ ກຳປູເຈຍ ໄດ້ສິ້ນສຸດການຢ້ຽມຢາມຫວຽດນາມ ຢ່າງເປັນທາງການຕາມຄຳເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ຢ່າງຈົບງາມ. ໃນໄລຍະຢູ່ຢ້ຽມຢາມ ຫວຽດນາມ, ທ່ານນາຍົກລັດຖະມົນຕີ Samdec Techno Hun Sen ໄດ້ເຈລະຈາກັບທ່ານນາຍົກລັດຖະມນົຕີ ຫງວຽນຊວນຟຸກ, ເຂົ້າຢ້ຽມຂ່ຳນັບທ່ານເລຂາທິການໃຫຍ່ຄະນະບໍລິຫານງານສູນກາງ ພັກກອມມູນິດ ຫວຽດນາມ ຫງວຽນຟູ໋ຈ້ອງ, ທ່ານປະທານປະເທດ ເຈີ່ນດ້າຍກວາງ, ພົບປະກັບທ່ານນາງປະທານສະພາແຫ່ງຊາດ ຫງວຽນທິກິມເງິນ, ຢ້ຽມຢາມນະຄອນ ໂຮ່ຈີມິນ ແລະ ແຂວງ ດົ່ງນາຍ. ທີ່ການເຮັດວຽກ, 2 ຝ່າຍໄດ້ແລກປ່ຽນຄຳເຫັນຢ່າງເລິກເຊິ່ງ, ກ້ວາງຂວາງກ່ຽວກັບການພົວພັນມິດຕະພາບ ແລະ ການຮ່ວມມືຮອບດ້ານລະຫວ່າງ ສສ ຫວຽດນາມ ແລະ ລາຊະອານາຈັກ ກຳປູເຈຍ ແລະ ບັນດາບັນຫາສາກົນ, ພາກພື້ນເຊິ່ງຕ່າງຝ່າຍຕ່າງມີຄວາມສົນໃຈ. 2 ຝ່າຍໄດ້ເຫັນດີເປັນເອກະສັນໂດຍຖືວ່າການປັບປຸງ ແລະ ພັດທະນາການພົວພັນມິດຕະພາບ, ການຮ່ວມມື ຫວຽດນາມ - ກຳປູເຈຍ ມີຄວາມໝາຍສຳຄັນພິເສດສຳລັບ 2 ປະເທດ, ໃຫ້ຄຳໝັ້ນສັນຍາສືບຕໍ່ປັບປຸງ ແລະ ພັດທະນາການພົວພັນລະຫວ່າງ 2 ປະເທດຕາມທິດນຳ “ປະເທດບ້ານໃກ້ເຮືອນຄຽງອັນດີງາມ, ນ້ຳໃຈມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ, ເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ, ບໍ່ແຊກແຊງເຂົ້າວຽກງານພາຍໃນຂອງກັນ ແລະ ບໍ່ອະນຸຍາດໃຫ້ບໍ່ວ່າກຳລັງທີ່ເປັນປໍລະປັກໃດໆນຳໃຊ້ຜືນແຜ່ນ ດິນຂອງປະເທດຕົນເພື່ອນາບຂູ່ເຖິງຄວາມສະຫງົບຂອງປະເທດອື່ນ, ແກ້ໄຂບັນດາບັນຫາເກີດຂຶ້ນລະຫວ່າງ 2 ປະເທດດ້ວຍມາດຕະການສັນຕິພາບ. 2 ຝ່າຍເຫັນດີເປັນເອກະສັນສົມທົບກັນຈັດຕັ້ງບັນດາການເຄື່ອນໄຫວ ສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ກຳປູເຈຍ (24/6/1967 – 24/6/2017).
       ກ່ຽວກັບບັນຫາຊາຍແດນ, ສອງຝ່າຍເຫັນດີເປັນເອກະສັນມອບໃຫ້ຄະນະກຳມະການປະສົມຂີດເສັ້ນຊາຍແດນ ປັກຫຼັກໝາຍຊາຍແດນສອງປະເທດ ສົມທົບກັນແກ້ໄຂດ້ວຍບັນດາມາດຕະການຍຸຕິທຳ, ເໝາະສົມ, ເພື່ອແນໃສ່ປະຕິບັດສຳເລັດວຽກງານຂີດເສັ້ນຊາຍແດນ ປັກຫຼັກໝາຍຊາຍແດນທາງບົກໂດຍໄວ ກໍ່ຄືແກ້ໄຂບັນດາບັນຫາທີ່ເກີດຂຶ້ນຢູ່ຕາມເຂດຊາຍແດນ. ສອງຝ່າຍຊົມເຊີຍເລື່ອງສອງປະເທດຮ່ວມມືກັນເປັນຢ່າງດີໃນບັນດາເວທີຫຼາຍຝ່າຍໄລຍະຜ່ານມາ. ສອງຝ່າຍໃຫ້ຄຳໝັ້ນສັນຍາສົມທົບກັນ, ພ້ອມກັນມານະພະຍາຍາມປະຕິບັດຖະແຫຼງການກ່ຽວກັບການປະພືດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ບັນລຸກົດແຫ່ງການປະພືດກ່ຽວກັບທະເລຕາເວັນອອກ (COC) ໂດຍໄວ. ສອງຝ່າຍກໍ່ໃຫ້ຄຳໝັ້ນສັນຍາສືບຕໍ່ຮ່ວມມືກັນຢ່າງແໜ້ນແຟ້ນກັບບັນດາປະເທດພາຄີອື່ນໆໃນບັນດາຂອບເຂດຂອງກຳມາທິການແມ່ນ້ຳຂອງສາກົນ ເພື່ອແນໃສ່ຮັບປະກັນການຄຸ້ມຄອງ ແລະ ນຳໃຊ້ຊັບພະຍາກອນນ້ຳຢູ່ເຂດລຸ່ມແມ່ນ້ຳຂອງຢ່າງໝັ້ນຄົງຕາມທຳນຽມສາກົນ, ເພື່ອຜົນປະໂຫຍດຢ່າງກົມກຽວຂອງບັນດາປະເທດແຄມແມ່ນ້ຳ ແລະ ເພື່ອຄາດໝາຍພັດທະນາຢ່າງໝັ້ນຄົງໃນພາກພື້ນ.
      ເນື່ອງໃນໂອກາດນີ້, ນາຍົກລັດຖະມົນຕີທັງສອງປະເທດໄດ້ເປັນສັກຂີພິຍານພິທີ ລົງນາມໃນເອກະສານຮ່ວມມື 3 ສະບັບເຊິ່ງລວມມີ: ສັນຍາຊ່ວຍເຫຼືອກັນດ້ານນິຕິທຳກ່ຽວກັບອາຍາລະຫວ່າງ ຫວຽດນາມ ແລະ ກຳປູເຈຍ, ສັນຍາກ່ຽວກັບການມອບສົ່ງຜູ້ຖືກຕັດສິນຈຳຄຸກລະຫວ່າງ ຫວຽດນາມ ແລະ ກຳປູເຈຍ, ແລະ ຂໍ້ຕົກລົງຮ່ວມມືລະຫວ່າງຄະນະກຳມະການຊົນເຜົ່າ ລະຫວ່າງຄະນະກຳມະການຊົນເຜົ່າ ຫວຽດນາມ ກັບກະຊວງພິທີການ ແລະ ສາສະໜາ ລາຊະອານາຈັກ ກຳປູເຈຍ.

(ແຫຼ່ງຄັດຈາກ VOV)