23/05/2019 09:18 GMT+7 Email Print Like 0

ທ່ານນາຍົກລັດຖະມົນຕີ ຫງວຽນຊວັນຟຸກ ຕອບສໍາພາດຕໍ່ສໍານັກຂ່າວສານ ລັດເຊຍ TASS

ເນື່ອງໃນໂອກາດການຢ້ຽມຢາມ ສະຫະພັນ ລັດເຊຍ ຢ່າງເປັນທາງການ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ໄດ້ມີການຕອບສໍາພາດຕໍ່ນັກຂ່າວສໍານັກຂ່າວສານ ລັດເຊຍ TASS.

ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ພ້ອມດ້ວຍພັນລະຍາ ໄປຮອດ ມົດສະກູ ສືບຕໍ່ຢ້ຽມຢາມ ລັດເຊຍ  ຢ່າງເປັນທາງການ (ພາບ: TTXVN) 

ເມື່ອຕີລາຄາກ່ຽວກັບການພັດທະນາການພົວພັນມິດຕະພາບທີ່ເປັນມູນເຊື້ອລະຫວ່່າງ ຫວຽດນາມ ແລະ ລັດເຊຍ ໃນບັນດາຂົງເຂດການເມືອງ, ສັງຄົມ, ເສດຖະກິດ, ການຄ້າໃນໄລຍະຜ່ານມາ, ທ່ານນາຍົກລັດຖະມົນຕີ ຫງວຽນຊວັນຟຸກ ໄດ້ເນັ້ນໜັກວ່າ ການພົວພັນມິດຕະພາບທີ່ເປັນມູນເຊື້ອ ແລະ ຄູ່ຮ່ວມມືຍຸດທະສາດຮອບດ້ານລະຫວ່າງ ຫວຽດນາມ - ລັດເຊຍ ພວມພັດທະນາຢ່າງຕັ້ງໜ້າ ແລະ ນັບມື້ນັບດີຂຶ້ນ. ໃນນັ້ນ, ການພົວພັນດ້ານການເມືອງມີຄວາມໄວ້ເນື້ອເຊື່ອໃຈສູງສຸດ ດ້ວຍບັນດາການພົບປະແລກປ່ຽນຄະນະຜູ້ແທນຄັ້ງຕ່າງໆ. ສອງປະເທດ ຈະຈັດຕັ້ງປີ ຫວຽດນາມ - ລັດເຊຍ, ລັດເຊຍ - ຫວຽດນາມ ໃນປີ 2019 – 2020 ເນື່ອງໃນໂອກາດສະເຫຼີມສະຫຼອງ 25 ປີ ແຫ່ງວັນລົງນາມໃນສົນທິສັນຍາກ່ຽວກັບບັນດາຫຼັກການພື້ນຖານຂອງການພົວພັນມິດຕະພາບ ຫວຽດນາມ - ລັດເຊຍ (1994 – 2019) ແລະ 70 ປີ ແຫ່ງວັນສ້າງຕັ້ງການພົວພັນທາງການທູດ (1950 – 2020). ກ່ຽວກັບດ້ານເສດຖະກິດ, ສົນທິສັນຍາການຄ້າເສລີ ລະຫວ່າງ ຫວຽດນາມ ແລະ ສະຫະພັນເສດຖະກິດ ອາຊີ - ເອີຣົບ ມີຜົນສັກສິດ ໄດ້ຊ່ວຍສ້າງການຫັນປ່ຽນຢ່າງຕັ້ງໜ້າໃນການຮ່ວມມືດ້ານເສດຖະກິດ - ການຄ້າລະຫວ່າງ ຫວຽດນາມ ແລະ ສະຫະພັນລັດເຊຍ. ການລົງທຶນ, ຮ່ວມມືໃນຫຼາຍຂົງເຂດລະຫວ່າງສອງປະເທດ ກໍ່ສືບຕໍ່ໄດ້ຮັບການເປີດກວ້າງ.

        ທ່ານນາຍົກລັດຖະມົນຕີ ຫງວຽນຊວັນຟຸກ ກໍໃຫ້ຮູ້ວ່າ ໃນການຢ້ຽມຢາມຄັ້ງນີ້, ທ່ານຈະພ້ອມກັບທ່ານນາຍົກລັດຖະມົນຕີລັດເຊຍ Dmitri Medvedev ກວດກາຄືນສະພາບການພົວພັນລະຫວ່າງສອງປະເທດໃນໄລຍະຜ່ານມາ, ໃນນັ້ນມີການຜັນຂະຫຍາຍບັນດາຂໍ້ຕົກລົງລະຫວ່າງການນໍາຂັ້ນສູງສອງປະເທດ; ແລກປ່ຽນທິດທາງ ແລະ ມາດຕະການລະອຽດ ເພື່ອແນໃສ່ແກ້ໄຂສິ່ງທີ່ຕິດຄັດ, ຊຸກຍູ້ການຮ່ວມມືລະຫວ່າງ ຫວຽດນາມ ແລະ ລັດເຊຍ ໃນທຸກຂົງເຂດ ໃນນັ້ນມີຂົງເຂດພະລັງງານ ແລະ ເຕັກນິກການທະຫານ. 

(ແຫຼ່ງຄັດຈາກ VOV)