21/12/2021 20:29 GMT+7 Email Print Like 0

ຍົກສູງຄວາມຮັບຮູ້ກ່ຽວກັບທີ່ຕັ້ງ, ບົດບາດ, ຄວາມສຳຄັນຂອງວຽກງານກໍ່ສ້າງ ແລະ ປະຕິບັດກົດໝາຍ

      ໃນໄລຍະຈະມາເຖິງ, ຕ້ອງສຸມແຫຼ່ງກຳລັງປະຕິບັດໜ້າທີ່ຈຸດສຸມຂອງປີ 2022; ຍົກສູງຄວາມຮັບຮູ້ກ່ຽວກັບທີ່ຕັ້ງບົດບາດ, ຄວາມສຳຄັນຂອງວຽກງານກໍ່ສ້າງ ແລະ ປະຕິບັດກົດໝາຍ; ໃກ້ຊິດຕິດແທດກັບແນວທາງ, ແຜນນະໂຍບາຍຂອງພັກ, ສະພາບການຕົວຈິງ. 
 
ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: TTXVN)
      ວັນທີ 21 ທັນວາ, ກະຊວງຍຸຕິທຳ ຫວຽດນາມ ໄດ້ຈັດຕັ້ງກອງປະຊຸມທົ່ວປະເທດກ່ຽວກັບການຜັນຂະຫຍາຍວຽກງານຍຸຕິທຳປີ 2022 ຕາມຮູບແບບທາງໄກເຊື່ອມຕໍ່ກັບ 63 ແຂວງ, ນະຄອນ. ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ຖືວ່າ: ໃນໄລຍະຈະມາເຖິງ, ຕ້ອງສຸມແຫຼ່ງກຳລັງປະຕິບັດໜ້າທີ່ຈຸດສຸມຂອງປີ 2022; ຍົກສູງຄວາມຮັບຮູ້ກ່ຽວກັບທີ່ຕັ້ງບົດບາດ, ຄວາມສຳຄັນຂອງວຽກງານກໍ່ສ້າງ ແລະ ປະຕິບັດກົດໝາຍ; ໃກ້ຊິດຕິດແທດກັບແນວທາງ, ແຜນນະໂຍບາຍຂອງພັກ, ສະພາບການຕົວຈິງ. ສ້າງກົງຈັກໃຫ້ກະທັດລັດ, ເຄື່ອນໄຫວຢ່າງມີປະສິດທິຜົນ, ຕິດພັນກັບການສ້າງໂຄງປະກອບ, ຍົກສູງຄຸນນະພາບຂອງຖັນແຖວພະນັກງານ, ລັດຖະກອນ; ຍູ້ແຮງການປະຕິຮູບລະບຽບການບໍລິຫານ, ຍົກສູງກຳລັງຄວາມສາມາດຮັບໃຊ້ປະຊາຊົນ. ທ່ານກ່າວວ່າ:
            “ຂະແໜງຍຸຕິທຳຕ້ອງເປັນເຈົ້າການຍູ້ແຮງວຽກງານປ້ອງກັນ, ຕ້ານການສໍ້ລາດບັງຫຼວງ, ປະກົດການຫຍໍ້ທໍ້, ການສະແຫວງຫາຜົນປະໂຫຍດເປັນກຸ່ມນັບແຕ່ເວລາສ້າງລະບອບລະບຽບການໃຫ້ຫຼາຍກວ່າອີກ. ຕ້ອງຖືຜົນປະໂຫຍດແຫ່ງຊາດ, ຜົນປະໂຫຍດສ່ວນລວມແມ່ນເໜືອກວ່າສິ່ງໃດໝົດ, ກ່ອນອື່ນໝົດ, ເພື່ອປະກອບສ່ວນເຂົ້າໃນການສ້າງລັດແຫ່ງອຳນາດນິຕິບັນຍັດສັງຄົມນິຍົມຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ”.  
            ທີ່ກອງປະຊຸມ, ທ່ານນາຍົກລັດຖະມົນຕີ ຟ້າມມິງຈິງ ໄດ້ປະດັບຫຼຽນໄຊແຮງງານຊັ້ນໜຶ່ງ, ຊັ້ນສອງ, ຊັ້ນສາມ ແລະ ມອບໃບຍ້ອງຍໍຂອງນາຍົກລັດຖະມົນຕີ ໃຫ້ແກ່ໝູ່ຄະນະ, ສ່ວນບຸກຄົນທີ່ມີຜົນງານດີເດັ່ນໃນການຊີ້ນຳ, ຈັດຕັ້ງຜັນຂະຫຍາຍປະຕິບັດໜ້າທີ່ການເມືອງຂອງປະເທດ, ຂອງຂະແໜງການທີ່ໄດ້ຮັບມອບໝາຍ, ປະກອບສ່ວນເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ.
(ແຫຼ່ງຄັດຈາກ VOV)