ຊຸກຍູ້ການຮ່ວມມືດ້ານປ້ອງກັນຊາດ ອາຊຽນ ໃນກົນໄກ ອາຊຽນ ເປີດກວ້າງ
ກອງປະຊຸມອອນລາຍ ກຸ່ມປະຕິບັດງານເຈົ້າໜ້າທີ່ປ້ອງກັນຊາດຂັ້ນສູງ ອາຊຽນ ເປີດກວ້າງ (ADSOM+ WG), ຖືກດຳເນີນໃນຕອນເຊົ້າວັນທີ 18 ພະຈິກ, ພາຍໃຕ້ການເປັນປະທານຂອງທ່ານພົນຕີ ຫວູຈ໊ຽນທັ໊ງ, ຫົວໜ້າກົມພົວພັນຕ່າງປະເທດ, ກະຊວງປ້ອງກັນປະເທດ ຫວຽດນາມ ຫົວໜ້າກຸ່ມປະຕິບັດງານເຈົ້າໜ້າທີ່ປ້ອງກັນປະເທດຂັ້ນສູງ ອາຊຽນ ຫວຽດນາມ.
ທ່ານພົນຕີ ຫວູຈ໊ຽນທັ໊ງ, ຫົວໜ້າກົມພົວພັນຕ່າງປະເທດ, ກະຊວງປ້ອງກັນປະເທດ ຫວຽດນາມ ເປັນປະທານກອງປະຊຸມ (ພາບ: qdnd.vn)
ກົນໄກຮ່ວມມືດ້ານປ້ອງກັນຊາດ ອາຊຽນ ເປີດກວ້າງ ລວມມີ 10 ປະເທດສະມາຊິກ ອາຊຽນ ແລະ 8 ປະເທດ ຄູ່ຮ່ວມມື ເຊິ່ງລວມມີ: ລັດເຊຍ, ຈີນ, ອາເມລິກາ, ຍີ່ປຸ່ນ, ສ.ເກົາຫຼີ, ອົດສະຕາລີ, ນິວຊີແລນ ແລະ ອິນເດຍ. ທີ່ກອງປະຊຸມ, ຜູ້ຕາງໜ້າບັນດາປະເທດກໍໄດ້ປຶກສາຫາລືຢ່າງລະອຽດ ແລະ ເຫັນດີເປັນເອກະພາບກ່ຽວກັບເນື້ອໃນເອກະສານສະບັບຕ່າງໆ ເປັນຕົ້ນແມ່ນ ຖະແຫຼງການຮ່ວມຮ່າໂນ້ຍ ກ່ຽວກັບກອງປະຊຸມລັດຖະມົນຕີກະຊວງປ້ອງກັນປະເທດເປີດກວ້າງ ADMM+ ຄັ້ງທີ 7 ເຊິ່ງຄາດວ່າຈະດຳເນີນໃນເດືອນທັນວາ ຈະມາເຖິງ. ພ້ອມກັນນັ້ນ, ຜູ້ຕາງໜ້າບັນດາປະເທດເປີດກວ້າງຄື ອາເມລິກາ, ຈີນ, ລັດເຊຍ ສືບຕໍ່ຕີລາຄາສູງບົດບາດເປັນໃຈກາງຂອງ ອາຊຽນ ຕໍ່ບັນດາສິ່ງທ້າທາຍທີ່ຫາກໍເກີດຂຶ້ນ ແລະ ຢັ້ງຢືນວ່າ ໃນໄລຍະຜ່ານມາ, ອາຊຽນໄດ້ປະກອບສ່ວນຢ່າງຕັ້ງໜ້າເຂົ້າໃນສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ.
(ແຫຼ່ງຄັດຈາກ VOV)