ທ່ານນາງ ຫງວຽນທິກິມເງິນ ແລະ ທ່ານ U Than Htay
ວັນທີ 20 ທັນວາ, ຢູ່ສຳນັກງານສະພາແຫ່ງຊາດຫວຽດນາມ, ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ໄດ້ມີການຕ້ອນຮັບ ແລະ ພົບປະສັງສັນກັບ ທ່ານປະທານ U Than Htay ພ້ອມດ້ວຍຄະນະຜູ້ແທນຂັ້ນສູງພັກສາມັກຄີ ແລະ ພັດທະນາ ສະຫະພາບ ມຽນມາ (USDP) ເຊິ່ງພວມມີການຢ້ຽມຢາມຢູ່ຫວຽດນາມ.
ທີ່ການຕ້ອນຮັບ, ທ່ານນາງ ຫງວຽນທິກິມເງິນ ສະເໜີໃຫ້ທ່ານ U Than Htay ແລະ ພັກ USDP ເສີມຂະຫຍາຍບົດບາດ ເພື່ອແນໃສ່ສືບຕໍ່ປະກອບສ່ວນເຂົ້າໃນການເພີ່ມທະວີການຮ່ວມມືລະຫວ່າງບັນດາອົງການນິຕິບັນຍັດສອງປະເທດ, ໂດຍສະເພາະແມ່ນການຕິດຕາມກວດກາ ການປະຕິບັດບັນດາຂໍ້ຕົກລົງວ່າດ້ວຍການຮ່ວມມື ເຊິ່ງລັດຖະບານສອງປະເທດ ໄດ້ລົງນາມນຳກັນ, ເພື່ອແນໃສ່ນຳການພົວພັນຮ່ວມມືໃນທຸກຂົງເຂດ ລະຫວ່າງຫວຽດນາມ - ມຽນມາ ນັບມື້ນັບພັດທະນາຢ່າງມີປະສິດທິຜົນ ແລະ ແທດຈິງ.
ສ່ວນທ່ານ U Than Htay, ປະທານພັກສາມັກຄີ ແລະ ພັດທະນາ ສະຫະພາບ ມຽນມາ ໄດ້ເນັ້ນໜັກວ່າ: ໂດຍເປັນປະເທດບ້ານໃກ້ເຮືອນຄຽງນອນໃນພາກພື້ນດຽວກັນ, ສອງປະເທດ ໄດ້ແບ່ງປັນທັດສະນະຄ້າຍຄືກັນຫຼາຍຢ່າງ, ພ້ອມກັນນັ້ນ, ທ່ານໄດ້ຢັ້ງຢືນວ່າ ພັກສາມັກຄີ ແລະ ພັດທະນາ ສະຫະພາບ ມຽນມາ ຈະສືບຕໍ່ປະກອບສ່ວນເຂົ້າໃນການເພີ່ມທະວີການພົວພັນລະຫວ່າງບັນດາສະມາຊິກລັດຖະສະພາ ມຽນມາ ແລະ ຫວຽດນາມ ກໍຄື ໃນການເຄື່ອນໄຫວຮ່ວມມືລະຫວ່າງບັນດາອົງການນິຕິບັນຍັດສອງປະເທດ.
ໃນໄລຍະເວລາຢ້ຽມຢາມຫວຽດນາມ, ຄະນະພັກສາມັກຄີ ແລະ ພັດທະນາສະຫະພາບ ມຽນມາ ກໍມີການພົບປະແລກປ່ຽນກັບການນຳ ຄະນະຈັດຕັ້ງສູນກາງ, ການນຳຄະນະກຳມະການກວດກາສູນກາງ ແລະ ສະມາຄົມມິດຕະພາບ ຫວຽດນາມ - ມຽນມາ; ຢ້ຽມຢາມແຂວງກວາງນິງ ແລະ ຮາກຖານເສດຖະກິດ, ວັດທະນະທຳບາງແຫ່ງຢູ່ ຫວຽດນາມ.
ແຫຼ່ງຄັດຈາກ VOV)
