សេចក្តីថ្លែងការណ៍រួមបានបញ្ជាក់ថា ដោយឈរលើមូលដ្ឋាននៃភាពជាដៃគូយុទ្ធសាស្ត្រលើគ្រប់ជ្រុងជ្រោយដែលបានចុះហត្ថលេខាក្នុងខែតុលា ឆ្នាំ ២០២៤ ក្នុងអំឡុងដំណើរទស្សនកិច្ចជាផ្លូវការនៅសាធារណរដ្ឋបារាំងរបស់អគ្គលេខាបក្ស លោក តូ ឡឹម វៀតណាមនិងបារាំងបានអះអាងជាថ្មីនូវបំណងចង់ធ្វើឱ្យស៊ីជម្រៅនូវភាពជាដៃគូដ៏គួរឱ្យទុកចិត្ត ដើម្បីបង្កើនឯករាជ្យ ស្វ័យភាព និងការអភិវឌ្ឍនៃភាគីនីមួយៗ។ ប្រទេសទាំងពីរបានឯកភាពបង្កើនប្រសិទ្ធភាពនៃកិច្ចសហប្រតិបត្តិការនិងយន្តការសន្ទនា ឈរលើស្មារតីគោរពធម្មនុញ្ញអង្គការសហប្រជាជាតិ និងគោលការណ៍របស់ខ្លួន ដោយមានបំណងរួមគ្នាធានាស្ថិរភាព និងវិបុលភាពនៃសណ្តាប់ធ្នាប់ពិភពលោក ក៏ដូចជាការប្តេជ្ញាចិត្តក្នុងការនាំចេញដំណោះស្រាយប្រកបដោយមហិច្ឆិតា និងធ្វើការរួមគ្នាដើម្បីដោះស្រាយបញ្ហាប្រឈមជាសាកល។
ក្រៅពីជំរុញកិច្ចសហប្រតិបត្តិការលើវិស័យការពារជាតិ សន្តិសុខ អប់រំ និងសុខាភិបាល វៀតណាមនិងបារាំងបានឯកភាពពង្រឹងកិច្ចសហប្រតិបត្តិការលើវិស័យយុទ្ធសាស្ត្រ។ បារាំងជួយបណ្តុះបណ្តាលធនធានមនុស្សប្រកប ដោយគុណភាពខ្ពស់សម្រាប់វៀតណាមក្នុងវិស័យបញ្ញាសិប្បនិមិត្ត (AI); គាំទ្រវៀតណាមក្នុងការអនុវត្តក្របខណ្ឌច្បាប់ ដើម្បីប្រយុទ្ធប្រឆាំងនឹងការនេសាទខុសច្បាប់ គ្មានរបាយការណ៍ និងគ្មានការគ្រប់គ្រង (IUU)។
សេចក្តីថ្លែងការណ៍រួមក៏បានសង្កត់ធ្ងន់ថា វៀតណាមនិងបារាំងគាំទ្រការពង្រឹងទំនាក់ទំនងរវាងវៀតណាមនិងសហភាពអឺរ៉ុប (EU) ក៏ដូចជាភាពជាដៃគូអភិវឌ្ឍន៍អាស៊ាន-បារាំង និងដៃគូយុទ្ធសាស្ត្រអាស៊ាន-សហភាពអឺរ៉ុប។ ភាគីទាំងពីរបានអះអាងជាថ្មីនូវការប្តេជ្ញាចិត្តក្នុងការរក្សាសន្តិភាព សន្តិសុខ និងស្ថិរភាពនៅសមុទ្រខាងកើត ក៏ដូចជាការប្តេជ្ញាចិត្តគោរពពេញលេញចំពោះអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ (UNCLOS)។ ភាគីទាំងពីរក៏បានឯកភាពគ្នាលើបញ្ហាអន្តរជាតិដែលមានការយកចិត្តទុកដាក់ដូចគ្នា៕
