យោងតាមសៀវភៅប្រវត្តិសាស្ត្របានកត់ត្រាថា តំបន់ទឹកដី Go Cong កាលពីមុនគឺជាតំបន់ព្រៃរហោស្ថាន ដែលមានមនុស្សតិចតួចរស់នៅ។ នៅពាក់កណ្តាលសតវត្សទី ១៨ មានបុរសម្នាក់ឈ្មោះ Tran Van Hue មកទីនេះ ដើម្បីបង្កើតអាជីពនិងគាស់រានដីថ្មី។ ជាបណ្ដើរៗ ប្រជាជនមកពីគ្រប់ទិសទី បានប្រមូលផ្តុំនៅទីនេះកាន់តែច្រើនឡើងៗ ហើយតម្រូវការទិញលក់និងជួញដូរទំនិញក៏បានកើនឡើងផងដែរ។ ដូច្នេះ នៅឆ្នាំ ១៨១៥ លោក Tran Van Hue បានបង្កើតផ្សារដំបូងនៅទីនេះ ដែលមានឈ្មោះថា Vinh Loi ប៉ុន្តែអ្នកស្រុកធ្វាប់ហៅថាផ្សារ Giong។ លោក Truong Quoc Huy រស់នៅនិងជួញដូរនៅផ្សារ Giong បាននិយាយថា៖ “ផ្សារនេះបើកនៅលើផ្ទៃដីរបស់លោក Hue។ លោកមានផ្ទៃដីធំទូលាយណាស់ ហើយលោកបានអនុញ្ញាតឲ្យប្រជុំផ្សារនៅទីនេះ។ បន្ទាប់មក ផ្សារនេះត្រូវបានពង្រីកជាបណ្ដើរៗ ទើបគេហៅថាផ្សារ Giong លោក Hue”។
បើទោះបីមានអាយុកាលជាង ៧០ ឆ្នាំក៏ដោយ ប៉ុន្តែលោក Vo Thanh Suong ជាអ្នករស់នៅផ្សារ Giong នៅតែចងចាំគ្រប់ជ្រុងនៃផ្សារ Giong អ្នកណាលក់អ្វី នៅកន្លែងណា គឺលោកចាំទាំងអស់។ “កាលពីមុន គេដំឡើងជួរសសរធំៗ ហើយអ្នកណាលក់អីក៏អង្គុយលក់នៅក្នុងផ្សារនោះ។ សម្រាប់អ្នកលក់ក្រណាត់ មានតូបរៀបចំក្រណាត់ខាងលើ ហើយពេលយប់គេវេចក្រណាត់យកទៅផ្ទះវិញ។ ចំណែកឯអ្នកលក់នំ បបរ និងទំនិញផ្សេងៗចេញមកលក់នៅពេលយប់។ ក្នុងជ្រុងខាងក្រោមមានស្រ្តីពីរនាក់លក់នំសណ្តែកបណ្តុះ។ ឆ្ងាយបន្តិចទៀត គឺមានលោកយាយលក់នំអាកោ។ ខាងមុខ ជាស្ត្រីម្នាក់លក់បាយសាច់ជ្រូកអាំង។ នៅខាងក្រោយមានហាងលក់បបរមួយ ហើយនៅក្បែរនោះមានស្ត្រីលក់បាយដំណើបម្នាក់”។
តាមជំនឿតាំងពីបុរាណថា ដើម្បីឱ្យមានជីវភាពធូរធារនិងសម្បូរសប្បាយ គឺអាស្រ័យដោយមានព្រះអាទិទេពប្រទានពរជ័យ នាំមកនូវអាកាសធាតុអំណោយផល និងរដូវប្រមូលផលល្អ។ ហើយលោក Tran Van Hue បានជួសជុលនិងកែលំអ ប្រាសាទដែលមានស្រាប់ ទៅជាសាលាភូមិ Vinh Loi សម្រាប់គោរពបូជាអ្នកតាភូមិ។ ចាប់តាំងពីពេលនោះមក មនុស្សមកពីគ្រប់ទីកន្លែងបានមកទីនេះដើម្បីតាំងលំនៅនិងបង្កើតអាជីព។ លោក Vo Thanh Suong ប្រជាជនរស់នៅផ្សារ Giong បានឲ្យដឹងថា៖ “កាលពីមុន នៅទីនេះមានមនុស្សកកកុញណាស់ នៅពេលយប់ នៅក្នុងសាលាភូមិតែងតែរៀបចំការបញ្ចាំងខ្សែភាពយន្តឱ្យអ្នកស្រុកមើល។ ថ្ងៃណាក៏មានការបញ្ចាំងភាពយន្ត ហើយក៏មានការច្រៀងចម្រៀង Boi ចាក់អាប៉ោងនិងខ្លាខ្លោកផងដែរ។ ពិធីបុណ្យនៅទីនេះក៏ល្បីល្បាញណាស់។ ប្រជាជនមកពី My Tho, Cho Gao, Go Cong Dong ក៏មកចូលរួមផងដែរ”។
នៅពេលនិយាយអំពីផ្សារ Giong មិនអាចមិននិយាយដល់ប្រភេទនំដ៏ល្បីល្បាញមួយនៅទូទាំងតំបន់ដីសណ្ដទន្លេ Cuu Long គឺនំសណ្តែកបណ្តុះ។ នំប្រភេទនេះគឺមានសាច់ជ្រូក បង្គា សណ្តែកបណ្តុះ ម្សៅអង្ករ ម្សៅសណ្តែកសៀង ។ ប្រភេទនំបែបសាមញ្ញនេះ បានក្លាយជាមុខម្ហូបពិសេសរបស់តំបន់ Go Cong។ អ្នកស្រី Phan Thi Kim Dung អ្នកលក់នំសណ្តែកបណ្តុះនៅផ្សារ Giong បានឲ្យដឹងថា៖ “នំសណ្តែកបណ្តុះ គឺជាមុខម្ហូបពិសេសក្នុងស្រុក។ នៅថ្ងៃបុណ្យទាននានា យើងធ្វើនំមិនគ្រប់គ្រាន់សម្រាប់លក់ទេ។ ពេលទៅធ្វើការ គេទិញនំប៉័ងមកហូបជាមួយនំសណ្តែកបណ្តុះ។ នំនេះ អាចញ៉ាំជាមួយបាយ ជ្រលក់ទឹកស៊ីអ៊ីវក៏បាន ហើយក៏អាចញ៉ាំជាមួយនំបញ្ចុកនិងស្ពៃផងដែរ”។
សម្រាប់ប្រជាជន Go Cong និយាយដោយឡែក និងប្រជាជន Tien Giang និយាយរួម ផ្សារ Giong មិនត្រឹមតែជាកន្លែងជួញដូរកសិផល និងម្ហូបអាហារសម្រាប់ជីវភាពប្រចាំថ្ងៃប៉ុណ្ណោះទេ ប៉ុន្តែវាក៏ជាកន្លែងផ្លាស់ប្តូរវប្បធម៌របស់ប្រជាជននៅភាគខាងត្បូងផងដែរ។ ផ្សារ Giong គឺជានិមិត្តសញ្ញាវប្បធម៌របស់សហគមន៍ប្រជាជននៅ Go Cong ដែលរួមចំណែកដល់អត្តសញ្ញាណពិសេសដោយឡែករបស់ទឹកដីនេះ៕
