(ທ່ານປະທານປະເທດ ຫວຽດນາມ ເລືອງເກື່ອງ)

ວັນທີ 26 ພະຈິກ, ຄະນະຜູ້ຕາງໜ້າ ຫວຽດນາມ ປະຈຳ ສະຫະປະຊາຊາດໄດ້ເຂົ້າຮ່ວມພິທີສະເຫຼີມສະຫຼອງວັນສາກົນສາມັກຄີກັບປະຊາຊົນ ປາແລັດສະຕິນ (29 ພະຈິກ).

ໃນສານສົ່ງເຖິງທ່ານເລຂາທິການໃຫຍ່ ແລະ ປະທານສະມັດຊາໃຫຍ່ສະຫະປະຊາຊາດ ເນື່ອງໃນໂອກາດວັນສາກົນສາມັກຄີກັບປະຊາຊົນ ປາແລັດສະຕິນ, ທ່ານປະທານປະເທດ ຫວຽດນາມ ເລືອງເກື່ອງ ໄດ້ຢືນຢັນຄືນໃໝ່ຫຼັກໝັ້ນຢືດໝັ້ນຂອງ ຫວຽດນາມ ແມ່ນສະໜັບສະໜູນການແກ້ໄຂບັນຫາ ປາແລັດສະຕິນ ໂດຍສັນຕິວິທີ ບົນພື້ນຖານເຄົາລົບກົດໝາຍສາກົນ ແລະ ບັນດາມະຕິກ່ຽວຂ້ອງຂອງສະຫະປະຊາຊາດ, ຮັບປະກັນຜົນປະໂຫຍດອັນຊອບທຳຂອງບັນດາຝ່າຍທີ່ກ່ຽວຂ້ອງ, ພິເສດແມ່ນບັນດາສິດຊົນຊາດທີ່ບໍ່ອາດແຕະຕ້ອງໄດ້ຂອງປະຊາຊົນ ປາແລັດສະຕິນ, ໃນນັ້ນ ມີສິດໄດ້ສ້າງຕັ້ງລັດ ປາແລັດສະຕິນ ເອກະລາດ, ມີອະທິປະໄຕ, ດຳລົງຊີວິດໂດຍສັນຕິສຸກ ແລະ ມີຄວາມໝັ້ນຄົງຢູ່ຂ້າງລັດ ອິດສະຣາແອັນ.

ທ່ານປະທານປະເທດ ຢືນຢັນວ່າ, ລັດ ແລະ ປະຊາຊົນ ຫວຽດນາມ ສະໜັບສະໜູນຢ່າງແຮງພາລະກິດຕໍ່ສູ້ເປັນທຳ ເພື່ອເອກະລາດ ແລະ ເສລີພາບຂອງປະຊາຊົນ ປາແລັດສະຕິນ ແລະ ພ້ອມແລ້ວຈະເຂົ້າຮ່ວມບັນດາຄວາມມານະພະຍາຍາມລວມຂອງປະຊາຄົມສາກົນ ເພື່ອແນໃສ່ປະກອບສ່ວນຮັບປະກັນສັນຕິພາບ, ຄວາມໝັ້ນຄົງ, ສະຖຽນລະພາບຢູ່ພາກພື້ນ ແລະ ໃນໂລກ.