ມີເລື່ອງເລົ່າເກົ່າໆ ເລົ່າວ່າ ເສືອປ່າ ຫຼື ເອີ້ນວ່າ “ພະຍາ ແຫ່ງພົງໄພ” ຍັງມີອີກຊື່ໜຶ່ງວ່າ ທ່ານ “ສາມສິບ” ເພາະ ທຸກຄັ້ງ ທີ່ຄົນລ່າສັດນີ້ໄດ້ ຈະໄດ້ເຈົ້າຊີວິດ ໃຫ້ລາງວັນ ເປັນເງິນສາມສິບເຟື້ອງ ເພາະກຳຈັດໄດ້ ສັດຮ້າຍໂຕໜຶ່ງ ໃຫ້ຄົນມະນຸດ.
ໃນໂອກາດຕົ້ນປີເສືອ, ພວກຂ້າພະເຈົ້າໄດ້ມາຍັງ ສູນຊ່ວຍເຫຼືອສັດປ່າ ຮ່າໂນ້ຍ (ຕາແສງ ຕຽນເຢືອກ, ເມືອງ ຊອກເຊີນ, ຮ່າໂນ້ຍ) ເຊິ່ງແມ່ນຫົວໜ່ວຍຂຶ້ນກັບ ພະແນກກະສິກຳ ແລະ ພັດທະນາຊົນນະບົດ ຮ່າໂນ້ຍ ເພື່ອຊອກຫາເອກະສານໃຫ້ບົດຂຽນ ກ່ຽວກັບ ທ່ານ “ສາມສິບ”. ໄດ້ຮັບ ການສ້າງຕັ້ງໃນປີ 1996, ເປັນເວລາກວ່າ 25 ປີ ເຮັດໜ້າທີ່ ເປັນສູນຮັບເອົາ, ເບິ່ງແຍງ ແລະ ຄຸ້ມຄອງສັດປ່າ ທີ່ກ່ຽວພັນ ເຖິງຄະດີຕ່າງໆ. ທ່ານ ເລືອງຊວນຮົ່ງ - ຫົວໜ້າສູນ ແບ່ງປັນວ່າ: “ພວກຂ້າພະເຈົ້າຮັບຜິດຊອບ ການຮັບເອົາສັດ ທີ່ຍຶດໄດ້ຈາກຄະດີ ກ່ຽວພັນເຖິງ ການລ່າສັດປ່າ, ຂົນສົ່ງ ແລະ ຮັກສາສັດປ່າ ຜິດກົດໝາຍ, ໃນນັ້ນ ມີສັດທີ່ມີຄ່າຫາຍາກ ຫຼາຍຊະນິດ ມີຊື່ໃນປຶ້ມແດງ. ພາຍຫຼັງ ເຈົ້າໜ້າທີ່ ສຳເລັດ ວຽກງານ ຂອງເຂົາເຈົ້າແລ້ວ, ພວກຂ້າພະເຈົ້າ ຈະດຳເນີນ ການກວດກາ ແລະ ນຳສັດປ່າມາຍັງທາງສູນ ເພື່ອການ ເບິ່ງແຍງດູແລ ເຖິງເມື່ອມີແຈ້ງການໃໝ່ຈາກເຈົ້າໜ້າທີ່”.
ຢູ່ທີ່ນີ້ ມີສັດປ່າຫຼາຍຊະນິດ, ພິເສດມີເສືອ ອິນດູຈີນ ດ້ວຍຈຳນວນ 36 ໂຕ. ທ່ານ ຮົ່ງໄດ້ກ່າວວ່າ, ສຳລັບພະນັກງານຢູ່ສູນນີ້, ເສືອແຕ່ລະໂຕເວົ້າສະເພາະ ແລະ ສັດເວົ້າລວມ ລ້ວນແຕ່ແມ່ນ "ລູກຄ້າ" ພິເສດ. ເສືອຢູ່ສູນ ໄດ້ຮັບການເບິ່ງແຍງດູແລຢ່າງລະມັດລະວັງ ຈາກ ບັນດາພະນັກງານ, ແຕ່ລະຄາບໄດ້ກິນຊີ້ນ, ກະດູກ ຫຼື ໄກ່ 5 ກິໂລຂຶ້ນກັບມື້. ນ້ຳໜັກຂອງພວກມັນແມ່ນປະມານ 1 ຮ້ອຍກິໂລ ສຳລັບເສືອເພດແມ່ ແລະ 3 ຮ້ອຍກິໂລ ສຳລັບເສືອໂຕຜູ້, ແຕ່ລະມື້ ພະນັກງານ ຈະທຳຄວາມ ສະອາດຄອກເສືອ ເພື່ອຮັບປະກັນດ້ານອະນາໄມ ແລະ ເສືອໄດ້ອອກກຳລັງກາຍ, ອາບແດດ ຕາມກຳນົດເວລາ ຢູ່ຄອກນອກ. ທາງສູນຍັງມີພະນັກງານຊາວ ອັງກິດ ຄົນໜຶ່ງຊື່ວ່າ Henry ໄດ້ ເຮັດວຽກຢູ່ທີ່ນີ້ ເປັນເວລາ 7 ປີ, ເປັນຊ່ຽວຊານໃນການຄົ້ນຄວ້າ ແລະ ອອກແບບຄອກ ໃຫ້ເໝາະສົມ ກັບອາຈີນຈຳເພາະຂອງເສືອ ກໍ່ຄືສັດອື່ນໆ ຢູ່ທີ່ນີ້.
ດ້ວຍທ່າອ່ຽງຫັນເປັນທົ່ວໂລກ ແລະ ເຊື່ອມໂຍງກັບ ເສດຖະກິດຕະຫຼາດຢ່າງກວ້າງຂວາງ, ວຽກງານ ປົກປັກຮັກສາຊີວະນາໆ ພັນ, ຄວາມສົມດູນ ຂອງ ລະບົບນິເວດ, ການປົກປັກຮັກສາສິ່ງແວດລ້ອມເວົ້າລວມ, ການປົກປັກຮັກສາບັນດາປະເພດສັດປ່າເວົ້າສະເພາະ, ວຽກງານຊ່ວຍເຫຼືອ, ອະນຸລັກ ແລະ ຂະຫຍາຍແນວພັນສັດປ່ານັບມື້ນັບກາຍເປັນຮີບດ່ວນ. ຕໍ່ໜ້າສະພາບການດັ່ງກ່າວ, ການຈັດຕັ້ງ ແລະ ດຳເນີນງານ ຂອງສູນແມ່ນຈຳເປັນ, ເພື່ອຮັບໃຊ້ໃຫ້ແກ່ວຽກງານຊ່ວຍເຫຼືອສັດປ່າຂອງ ຮ່າໂນ້ຍ ເວົ້າສະເພາະ ແລະ ຫວຽດນາມ ເວົ້າລວມ.
ບົດ ແລະ ພາບ: ເຈິ່ນແທງຢາງ/VNP
ສູນຊ່ວຍເຫຼືອສັດປ່າ ຮ່າໂນ້ຍ (ຕາແສງ ຕຽນເຢືອກ, ເມືອງຊອກເຊີນ, ຮ່າໂນ້ຍ) ແມ່ນໜ່ວຍງານຂຶ້ນກັບກະຊວງກະສິກຳ ແລະ ພັດທະນາຊົນນະບົດ ຮ່າໂນ້ຍ.
ເສືອ 36 ໂຕ ໄດ້ຮັບການເບິ່ງແຍງດູແລ ຈາກພະນັກງານ ຂອງສູນ.
ພະນັກງານອະນາໄມຄອກເສືອ.
ພະນັກງານສູນຊ່ວຍເຫຼືອສັດປ່າ ຮ່າໂນ້ຍ ກະກຽມ ອາຫານໃຫ້ເສືອ.
ເມື່ອເຂົ້າມາຍັງສູນຊ່ວຍເຫຼືອສັດປ່າຮ່າໂນ້ຍ, ເສືອຈະຕ້ອງໃຊ້ເວລາປະມານ 2-3 ເດືອນ ເພື່ອທຳຄວາມ ລື້ງເຄືຍ ກັບສະພາບແວດລ້ອມໃໝ່.
ເຖິງວ່າຈະຖືກກັກຂັງໄວ້, ແຕ່ເສືອຢູ່ທີ່ນີ້ ກໍບໍ່ໄດ້ສູນເສຍ ສັນຊາດຕະຍານທຳມະຊາດຂອງມັນ.
ໂດຍໄດ້ຮັບການເບິ່ງແຍງດູແລໃນສະພາບທີ່ດີ ຢູ່ສູນຊ່ວຍເຫຼືອສັດປ່າ ຮ່າໂນ້ຍ, ເສືອໃນສູນມີສຸຂະພາບທີ່ໝັ້ນຄົງ.
ເສືອໄດ້ອອກກໍາລັງກາຍໃນເຂດຄອກຢູ່ກາງແຈ້ງ ຢູ່ສູນ.
ເສືອໄດ້ທຳຄວາມລື້ງເຄືຍກັບສະພາບເຄິ່ງທຳມະຊາດໃນເຂດຄອກຢູ່ກາງແຈ້ງ ຢູ່ສູນຊ່ວຍເຫຼືອສັດປ່າ ຮ່າໂນ້ຍ.
ທ່ານ ເລືອງຊວນຮົ່ງ (ເສື້ອແວັສສີຟ້າ) ຜູ້ອຳນວຍການສູນພວມປຶກສາຫາລື ກັບທ່ານ Henry (ຊາວອັ ງກິດ) ກ່ຽວກັບການອອກແບບຄອກເສືອ.
ທ່ານ "ສາມສິບ".