សិប្បករ ឡាយភូថាច (Lai Phu Thach) ស្តាររស់ឡើងវិញក្រដាសព្រះរាជក្រឹត្យតែងតាំង

01/07/2025

លាក់ខ្លួនយ៉ាងជ្រៅក្នុងច្រកតូចមួយ ស្ថិតនៅលើផ្លូវ ញ៉ឹតតាវ (Nhat Tao) (រដ្ឋធានី ហាណូយ) សិប្បករ ឡាយ ភូថាច (Lai Phu Thach) គឺជាអ្នកបន្តមុខរបរតែម្នាក់គត់នៃត្រកូល ឡាយ (Lai) ដែលនៅធ្វើការយ៉ាងឧស្សាហ៍ព្យាយាម និងល្អិតល្អន់ជារៀងរាល់ថ្ងៃ នៅលើតុតូចមួយ ដើម្បីធ្វើឡើងវិញនូវក្រដាសព្រះរាជក្រឹត្យតែងតាំងដ៏ល្បីល្បាញ ដែលបុព្វបុរសបន្សល់មក។

សិប្បករ ឡាយភូថាច (Lai Phu Thach) គឺជាសិប្បករជំនាន់ទី ២៦ នៃត្រកូល (Lai) ដែលនៅរក្សាមុខរបរធ្វើក្រដាសព្រះរាជក្រឹត្យតែងតាំង ។

ក្នុងនាមជាកូនចៅជំនាន់ទី ២៦ នៃត្រកូល ឡាយ ( Lai) លោក ឡាយភូថាច (Lai Phu Thach) មានប្រសាសន៍ថា ក្រដាសព្រះរាជក្រឹត្យតែងតាំងរបស់ត្រកូល ឡាយ (Lai) មានប្រវត្តិជាង ២០០ឆ្នាំ។ ក្រដាសប្រភេទនេះ ត្រូវបានធ្វើដោយដៃយ៉ាងប៉ិនប្រសប់របស់សិប្បករ នៃត្រកូល ឡាយ (Lai) នៅភូមិ កូអាម (Co Am) ដែលបច្ចុប្បន្នហៅថា ភូមិ ទ្រុងញ៉ា (Trung Nha)(ខណ្ឌ កូវយៃ (Cau Giay) រដ្ឋធានីហាណូយ)។ បណ្តាសិប្បករនៃត្រកូល ឡាយ (Lai) នឹងធ្វើក្រដាសព្រះរាជក្រឹត្យតែងតាំងចម្រុះពណ៌ និងមានក្បាច់រចនា បន្ទាប់មកស្តេច និងស្តេចត្រាញ់នឹងប្រើ ដើម្បីប្រកាសតែងតាំងជូនមន្ត្រីរាជការ ក្រោមឱវាទ។

លោក ឡាយភូថាច (Lai Phu Thach) បានឲ្យដឹងថា កាលនៅក្មេង លោកតែងតែអង្គុយជាមួយជីតា ទើបលោកចេះធ្វើក្រដាសនេះ។ ប៉ុន្តែ ក្នុងអំឡុងពេលសង្រ្គាម មុខរបរប្រពៃណីរបស់ត្រកូល ឡាយ (Lai) ត្រូវបានផ្អាក។ រហូតដល់ពេលដែលគាត់មានអាយុ ៦០ ឆ្នាំ ទើបគាត់ចាប់ផ្តើមធ្វើបន្ត តាមការស្នើរបស់អ្នកចាស់ទុំក្នុងត្រកូល ឡាយ (Lai) ។ ដោយការចងចាំនូវដំណាក់កាលធ្វើ និងរូបមន្ត ដែលបានរៀនពីជីតារបស់គាត់ ថែមទាំងការសាកល្បងជាច្រើនដង លោក ឡាយភូថាច (Lai Phu Thach) បានស្តារឡើងវិញប្រកបដោយជោគជ័យ នូវមុខរបរធ្វើក្រដាសព្រះរាជក្រឹត្យតែងតាំង ដែលមានគុណភាព ដូចបុព្វបុរសក្នុងត្រកូលគាត់ធ្លាប់ធ្វើ កាលពីអតីតកាល។

សិប្បករ ឡាយភូថាច (Lai Phu Thach) និងសមាជិកនៃត្រកូល ឡាយ (Lai) កំពុងព្យាយាមរក្សាមុខរបរ ដែលបុព្វបុរសបន្សល់មក។

ដើម្បីធ្វើក្រដាសព្រះរាជក្រឹត្យតែងតាំង មានស្តង់ដារ ក្រដាសត្រូវឆ្លងកាត់ដំណាក់កាលជាច្រើន ហើយហាលស្ងួតក្រដាសបីដង ដើម្បីធានាថា ក្រដាសនោះទុកបានយូរ ហើយការពារនឹងសត្វកណ្តៀរបាន។

លោក ថាច (Thach) បាននិយាយថា ដើម្បីធ្វើក្រដាសព្រះរាជក្រឹត្យតែងតាំង គឺយើងត្រូវធ្វើក្រដាសយ៉ (do) មុន (ក្រដាសប្រពៃណីមួយប្រភេទ ដែលប្រើប្រាស់សម្រាប់ការគូររូបភាពប្រជាប្រិយ) ។ ដើម្បីធ្វើក្រដាសយ៉ (do) មានស្ដង់ដារ សិប្បករត្រូវតែបកសំបកឈើយ៉ (do) រួចត្រាំក្នុងទឹកកំបោររាវ ហើយយកទៅចំហ៊ុយ។ បន្ទាប់មក គេបុករហូតដល់ពេលណាម៉ដ្ឋដូចភក់ ទើបយកទៅធ្វើជាក្រដាស។ នៅពេលដែលក្រដាសបានសម្រេចរួចរាល់ សិប្បករប្រើកាវ ដើម្បីតភ្ជាប់ក្រដាសជាមួយគ្នា និងមានប្រវែងជាង ១ ម៉ែត្រ ហើយយកទៅហាលឱ្យស្ងួត។ បន្ទាប់មក សិប្បករបន្តប្រើកាវម្តងទៀត ដើម្បីការពារនឹងសត្វកណ្តៀវ រួចហាលឱ្យស្ងួតថែមម្តងទៀត។ ក្រោយពីមក ត្រូវជ្រលក់ពណ៌ក្រដាស ដែលធ្វើពីផ្កា Styphnolobium japonicum បន្តហាលឱ្យស្ងួត ដើម្បីធ្វើដំណាក់កាលបន្តទៀត។ ធ្វើក្រដាសប្រភេទនេះ ត្រូវប្រើអង្រែវាយរហូតទាល់តែក្រដាសស្វិត រលីង មិនមានស្នាមរដិបរដុបទៀត ទើបយកទៅគូរបាន។

ក្រដាសព្រះរាជក្រឹត្យតែងតាំង បានរក្សាទុកនៅក្នុងផ្ទះ
សក្ការៈបូជានៃត្រកូលឡាយ (Lai)។

ដើម្បីគូរលើព្រះរាជក្រឹត្យតែងតាំង នោះគឺវិធីសាស្ត្រសម្ងាត់របស់ត្រកូលឡាយ (Lai) ។ លោក ថាច (Thach) ធ្លាប់ប្រើទឹកថ្នាំពិសេសមានភាពភ្ជាប់សម្រាប់គូរ ទើបជាប់ទៅនឹងក្រដាស។ លោកថាច (Thach) បន្តថា កន្លងមកបុព្វបុរសនៃត្រកូលឡាយ (Lai) តែងគូរដោយមាសនិងប្រាក់។ ជាធម្មតាមាន ៣ នាក់គូរ រួមមានម្នាក់គូរគោលកណ្ដាល និង ២ នាក់គូរនៅសងខាង។ ប៉ុន្តែឥឡូវនេះមានតែគាត់គូរដោយម្នាក់ឯង។

លោកថាច (Thach) នឹងធ្វើក្រដាសព្រះរាជក្រឹត្យតែងតាំងពណ៌លឿង និងគូររូបនាគ និងសត្វពិសិដ្ឋទាំងបួន (នាគ ម៉ុងសាយ អណ្តើក ហ្សង)។ រីឯខ្លឹមសារនៅលើក្រដាសព្រះរាជក្រឹត្យតែងតាំង ត្រូវបានសរសេរតាមសំណើរបស់ស្តេចនៃសម័យមួយអង្គៗដោយឡែក។ លំបាក និងនឿតហត់ ដើម្បីរក្សាមុខរបរប្រពៃណីរបស់ត្រកូលគឺយ៉ាងនោះ ប៉ុន្តែក្នុងសម័យសេដ្ឋកិច្ចទីផ្សារ ក្រដាសព្រះរាជក្រឹត្យតែងតាំង មួយថ្ងៃកាន់តែមិនត្រូវការប្រើប្រាស់ ដូច្នេះចំនួនអតិថជនដែលបញ្ជាទិញក្រដាសប្រភេទនេះពីលោក ថាច (Thach) អាចរាប់បាននៅលើម្រាមដៃ។ អតិថិជនភាគច្រើនរបស់គាត់គឺជាគណៈកម្មការគ្រប់គ្រងវត្ត ដែលមានព្រះរាជក្រឹត្យតែងតាំង តែត្រូវខូចខាត គេនាំមក ដើម្បីគាត់ធ្វើថ្មីឡើងវិញប៉ុណ្ណោះ។

លោក ឡាយភូធី (Lai Phu Thi) ដែលជាកូនចៅនៃត្រកូលឡាយ (Lai) ម្នាក់បាននិយាយថា “មុខរបរនេះ ទូទាំងប្រកូលឡាយ (Lai) មានតែលោក ថាច (Thach) ប៉ុណ្ណោះដែលអាចធ្វើបាន ។ តែសោកស្ដាយណាស់ រហូតមកដល់ពេលនេះ មិនទាន់មានកូនចៅជំនាន់ក្រោយក្នុងប្រកូលឡាយ (Lai) ដើម្បីប្រគល់បន្ត និងរក្សាបានមុខរបរនេះឡើយ”។ រឿងរ៉ាវរបស់យើងខ្ញុំជាមួយលោក ថាច (Thach) បានបញ្ចប់នាពេលថ្ងៃត្រង់ ប៉ុន្តែរាល់សម្តី និងក្រសែភ្នែករបស់លោកថាច (Thach) ខណៈពេលនិយាយអំពីការរក្សាមុខរបរប្រពៃណីនេះរបស់ត្រកូលឡាយ (Lai) គឺពោរពេញទៅដោយការព្រួយបារម្ភ ដោយមិនទាន់មាននរណាម្នាក់បន្តវេនមុខរបរនេះ៕

អត្ថបទ៖ ង៉ឹនហា

រូបថត៖ ខាញឡុង

VNP

ប្រែសម្រួលដោយង្វៀនយ៉ាង

សិប្បករ ឡាយភូថាច (Lai Phu Thach) ស្តាររស់ឡើងវិញក្រដាសព្រះរាជក្រឹត្យតែងតាំង

អត្ថបទផ្សេងទៀត