រដូវទាំងបួននៅវាលស្រែវៀតណាម
លាតសន្ធឹងពីតំបន់វាលទំនាបរហូតដល់តំបន់ឆ្នេរសមុទ្រ ចាប់ពីវាលស្រែទុំលឿងរហូតដល់វាលស្រែអំបិលពណ៌សក្បុស ឬថ្នាលផ្កាដែលមានពណ៌ឆើតឆាយ វាលស្រែវៀតណាម គឺជាផ្ទាំងគំនូរដ៏រស់រវើកនៃពលកម្ម និងកម្លាំងជីវិត។ ឆ្លងកាត់រដូវទាំងបួន និទាឃរដូវ គិម្ហរដូវ សរទរដូវ និងសិសិរដូវ វាលស្រែនីមួយៗសុទ្ធតែនាំមកនូវសម្រស់ដោយឡែកមួយ ដែលបង្ហាញពីភាពឧស្សាហ៍ព្យាយាម និងការច្នៃប្រតិដ្ឋ នៃប្រជាកសិករវៀតណាម។
នៅលើដែនដីរាងអក្សរ S វាលស្រែ គឺជាលំហដែលផ្សារភ្ជាប់យ៉ាងជិតស្និទ្ធ ជាមួយជីវភាពរស់នៅ និងវប្បធម៌របស់ប្រជាជនវៀតណាម។ វាមិនត្រឹមតែជាកន្លែងផលិតកសិកម្មប៉ុណ្ណោះទេ ថែមទាំងជានិមិត្តរូបនៃជីវជាតិ នៃចង្វាក់ជីវិតឧស្សាហ៍ពលកម្ម ដែលបានសន្សំសំចៃឆ្លងកាត់ជាច្រើនជំនាន់។
រៀងរាល់រដូវក្នុងឆ្នាំ វាលស្រែតែងតែគ្រងលើខ្លួននូវមុខមាត់ប្លែកពីគ្នា។ នានិទាឃរដូវ (រដូវផ្ការីក) សួនផ្កាទាំងឡាយរីកស្គុះស្គាយ ក្នុងពណ៌លឿងនៃផ្កាវាយោឡេតា និងពណ៌ស្រស់ឆើតឆាយនៃផ្កាអង្គាសីល នាំមកនូវបរិយាកាសស្រស់បំព្រង។ នេះក៏ជាពេលវេលា ដែលប្រជាជនមមាញឹកថែទាំផ្កា ស្រោចទឹក តាក់តែងមែក ដើម្បីបម្រើតម្រូវការទីផ្សារ ជាពិសេសគឺក្នុងឱកាសបុណ្យចូលឆ្នាំថ្មីប្រពៃណីជាតិ។ សួនផ្កាទាំងឡាយ បានក្លាយជាអាសយដ្ឋានទេសចរណ៍ដ៏ទាក់ទាញ រួមចំណែកបង្កើនប្រាក់ចំណុលបន្ថែមសម្រាប់ប្រជាជន។
គិម្ហរដូវ (រដូវក្តៅ) នៅតាមតំបន់ជនបទជាច្រើន ចម្ការពោត និងដំណាំពណ៌ខៀវស្រងាត់ លាតសន្ធឹងនៅក្រោមពន្លឺថ្ងៃ។ ថ្នាលពោតខ្ពស់ៗ ដុះលាយឡំនឹងសណ្តែក ដំឡូង សណ្តែកដី បង្កើតបានជាតុងពណ៌សម្បូរបែបដ៏រស់រវើក នៃរដូវប្រមូលផល។ នេះជាចន្លោះពេល ដែលប្រជាកសិករថែទាំ ជ្រោយដី ដើម្បីត្រៀមលក្ខណៈសម្រាប់រដូវប្រមូលផល។
ខណៈពេលសរទរដូវ (រដូវស្លឹកឈើជ្រុះ) ឈានចូលមកដល់ វាលស្រែស្ថិតក្នុងរដូវកាលដែលស្អាតបំផុត។ វាលស្រែទុំលឿងលាតសន្ធឹងដូចជាសមុទ្រស្រូវដែលគ្មានទីបញ្ចប់។ ចាប់តាំងពីព្រលឹមស្រាងៗ ប្រជាកសិករបានចុះទៅវាលស្រែដើម្បីប្រមូលផល។ សំឡេងកណ្ដៀវកាត់ស្រូវ លាយឡំនឹងសំឡេងម៉ាស៊ីនច្រូតកាត់ បន្លឺឡើងពាសពេញវាលស្រែ បង្កើតបានជាចង្វាក់ពលកម្មដ៏គគ្រឹកគគ្រេង។ ចង្កោមកួរស្រូវទុំឱនក្បាល ជាលទ្ធផលនៃការថែទាំយ៉ាងយកចិត្តទុកដាក់អស់រយៈពេលជាច្រើនខែ។
នៅតាមតំបន់ឆ្នេរសមុទ្រ ដូចជាខេត្តក្វាងនិញ (Quang Ninh) ក្វាងង៉ាយ (Quang Ngai) ឬកាម៉ៅ (Ca Mau) រដូវប្រាំងគឺជារដូវកាលនៃវាលស្រែអំបិលទៅវិញ។ នៅក្រោមពន្លឺថ្ងៃដ៏ក្តៅហួតហែង ទឹកសមុទ្របានភាយចំហាយ បន្សល់ទុកនូវស្រទាប់អំបិលពណ៌ស ភ្លឺថ្លា គ្របដណ្តប់ពេញផ្ទៃដី។ រូបភាពអ្នកធ្វើអំបិល ឧស្សាហ៍ព្យាយាមប្រមូលអំបិល ក្រោមពន្លឺអរុណរះ បង្កើតបានជាសម្រស់ពលកម្មដ៏ប្លែកភ្នែកនៃតំបន់សមុទ្រវៀតណាម។
មិនត្រឹមតែនាំមកនូវតម្លៃសេដ្ឋកិច្ចប៉ុណ្ណោះទេ វាលស្រែចម្ការទាំងឡាយនៅជាផ្នែកមួយ នៃទេសភាពវប្បធម៌ដ៏វិសេសវិសាលផងដែរ។ ពណ៌លឿងនៃស្រូវទុំ ពណ៌ខៀវនៃពោតនិងដំណាំ ពណ៌សនៃវាលស្រែអំបិល រហូតដល់ពណ៌ចម្រុះនៃសួនផ្កា ទាំងអស់នោះ បានរួមបញ្ចូលគ្នាក្លាយជាផ្ទាំងគំនូររដូវកាលទាំងបួនដ៏រស់រវើក។ នោះគឺជាបទភ្លេងប្រគំដោយធូរណីមេឃា និងមនុស្សជាតិ ដែលឆ្លុះបញ្ចាំងយ៉ាងច្បាស់ អំពីកម្លាំងជីវិតដ៏រឹងមាំចីរកាល នៃជនបទវៀតណាម៕
អត្ថបទ៖ ប៊ិចវ៉ឹន រូបថត៖ កាសែតរូបភាពវៀតណាម
ប្រែសម្រួល៖ រីកើង