ທ່າກຳປັ່ນສາກົນ ກາຍແມັບ-ທິຫວາຍ (ບ່າເຣ້ຍ-ຫວຸ໊ງເຕົ່າ), ແມ່ນໜຶ່ງໃນ 2 ທ່າກໍາປັ່ນພິເສດ ຂອງ ຫວຽດນາມ ໃນປັດຈຸບັນ (ພ້ອມກັບທ່າກຳປັ່ນສາກົນ ຫາຍຟ່ອງ), ສວມບົດບາດເປັນທ່າກຳປັ່ນເຊື່ອມຕໍ່ການພົວພັນການຄ້າທາງນ້ຳຂອງບັນດາແຂວງພາກໃຕ້ ແລະ ເປັນທ່າກຳປັ່ນຂົນສົ່ງສາກົນ ມີສະມັດຖະພາບສູງ, ຊ່ວຍຫຼຸດຜ່ອນເວລາຂົນສົ່ງສິນຄ້ານຳເຂົ້າ ແລະ ສົ່ງອອກລະຫວ່າງ ຫວຽດນາມ ກັບບັນດາປະເທດໃນໂລກ.
ຕັ້ງຢູ່ປາກແມ່ນ້ຳ ທິຫວາຍ ແລະ ແມ່ນໍ້າ ກາຍແມັບ, ທ່າກຳປັ່ນສາກົນ ກາຍແມັບ-ທິຫວາຍ ແມ່ນກຸ່ມທ່າກຳປັ່ນທະເລນ້ຳເລິກຢູ່ເທດສະບານ ຝູ໋ໝີ, ແຂວງ ບ່າເຣ້ຍ-ຫວຸ໊ງເຕົ່າ ມີຄວາມຍາວທັງໝົດກວ່າ 14 ກມ. ໄດ້ເປີດນຳໃຊ້ຢ່າງເປັນທາງການໃນເດືອນ ມັງກອນ ປີ 2011, ທ່າກຳປັ່ນ ກາຍແມັບ-ທິຫວາຍ ສາມາດສະໜອງໃຫ້ລູກຄ້າດ້ວຍການບໍລິການທ່າກຳປັ່ນ ຂົນສົ່ງ ຕູ້ຄອນເທນເນີ ທີ່ໄດ້ມາດຕະຖານສາກົນ.
ດ້ວຍຊ່ອງທາງເດີນຂອງ ກໍາປັ່ນ ມີຄວາມເລິກ 14 ມ, ຄວາມເລິກ ຂອງ ເຂດທ່າກຳປັ່ນ 16,8 ມ ແລະ ບ່ອນລ້ຽວກໍາປັ່ນກວ້າງ 500 ມ, ທ່າກຳປັ່ນ ແຫ່ງນີ້ ກາຍເປັນສະຖານທີ່ສະດວກໃນການຂົນສົ່ງສິນຄ້າ ລະຫວ່າງ ຫວຽດນາມ ກັບບັນດາປະເທດໃນໂລກ, ໂດຍສະເພາະແມ່ນເໝາະກັບການບໍລິການກໍາປັ່ນ ຂະໜາດໃຫຍ່ ບັນທຸກໄດ້ເຖິງ 160.000 ໂຕນ (ເທົ່າກັບ 14.000 ຕູ້ຄອນເທນເນີ).
ດ້ວຍພື້ນຖານໂຄງລ່າງ ແລະ ອຸປະກອນທີ່ທັນສະໄໝ, ລວມເຖິງທ່າທຽບກໍາປັ່ນ 03 ທ່າ ມີຄວາມຍາວ 890 ມ, ທ່າຈອດກໍາປັ່ນ 03 ທ່າ ຍາວ 270 ມ, ເດີ່ນວາງ ຕູ້ຄອນເທນເນີ ກວ້າງ 55 ເຮັກ ຕາ, ສາມາດບັນຈຸ ຕູ້ຄອນເທນເນີ ໄດ້ເກືອບ 51.500 ຕູ້, ເຄນຍົກ ຢູ່ເທິງຝັ່ງ STS 10 ເຄນ, ເຄນຍົກ ຢູ່ເດີ່ນວາງ ຕູ້ຄອນເທນເນີ 22 ເຄນ, ເຄນຍົກຮັບໃຊ້ເຮືອທ້ອງ ແບນ 03 ເຄນ, ລົດຂົນ ສົ່ງ ຕູ້ຄອນເທນເນີ 76 ຄັນ, ລົດຍົກສິນຄ້າ 05 ຄັນ ແລະ ລົດຍົກ ຕູ້ຄອນເທນເນີ ເປົ່າ 05 ຄັນ, ທ່າກໍາປັ່ນ ສາມາດຮັບກຳປັ່ນທີ່ທັນສະໄໝ ທີ່ສຸດໃນໂລກໃນປັດຈຸບັນ, ຊ່ວຍຫຼຸດຜ່ອນເວລາຂົນ ສົ່ງສິນຄ້ານໍາເຂົ້າ ແລະ ສົ່ງອອກ ລະຫວ່າງພາກໃຕ້ ກັບປະເທດ ອື່ນໆ ແທນທີ່ຈະຕ້ອງຜ່ານແດນຢູ່ ສິງກະໂປ ຄືເມື່ອກ່ອນ.
ຮັບຮູ້ໄດ້ທ່າແຮງບົ່ມຊ້ອນອັນໃຫຍ່ຫຼວງ ຂອງ ທ່າກຳປັ່ນ ກາຍແມັບ-ທິຫວາຍ, ແຂວງ ບ່າເຣ້ຍ-ຫວຸ໊ງເຕົ່າ ແລະ ກະຊວງຄົມ ມະນາຄົມ ຂົນສົ່ງ ໄດ້ເຫັນດີກ່ຽວກັບບັນດາເປົ້າໝາຍ, ການສົມ ທົບ ແລະ ສຸມທຸກແຫຼ່ງກຳລັງ ລົງທຶນ ເພື່ອພັດທະນາລະບົບທ່າກຳປັ່ນທະເລ ແຫ່ງນີ້ ໃຫ້ກາຍເປັນທ່າກຳປັ່ນ ຂົນສົ່ງສາກົນ ລະ ດັບພິເສດ ຂອງ ປະເທດ. ຕາມການກຳນົດທິດພັດທະນາຂອງທ້ອງຖິ່ນ, ຂະແໜງທ່າກຳປັ່ນ ແລະ ພະລາທິການ ຈະໄດ້ພັດ ທະນາໃຫ້ກາຍເປັນຂະແໜງເສດຖະກິດ ປາຍແຫຼມຂອງແຂວງ, ຕິດພັນກັບການຮັບປະກັນການປ້ອງກັນປະເທດ, ຄວາມໝັ້ນຄົງທາງທະເລ.
ພິເສດ, ກຸ່ມທ່າກຳປັ່ນ ກາຍແມັບ-ທິຫວາຍ ດ້ວຍຄວາມສາມາດສະໜອງກຳປັ່ນ ຂົນສົ່ງ ຕູ້ຄອນເທນເນີ ໂດຍກົງໄປຍັງ ເອີຣົບ ແລະ ທະວີບ ອາເມລິກາ, ໄດ້ສ້າງຄວາມສາມາດແຂ່ງຂັນອັນໃຫຍ່ຫຼວງແກ່ໃຫ້ຫວຽດນາມ ໃນຕ່ອງໂສ້ການສະໜອງທົ່ວໂລກ.
ໃນອະນາຄົດ ອັນໄກ້ນີ້, ເລື່ອງບັນດາໂຄງການກໍ່ສ້າງພື້ນຖານໂຄງລ່າງຄົມມະນາຄົມຂະໜາດໃຫຍ່ໄດ້ຮັບການຜັນຂະຫຍາຍຈາກບັນດາທ້ອງຖິ່ນບ້ານໃກ້ເຮືອນຄຽງຄື: ເສັ້ນທາງດ່ວນ ເບັ່ນ ລຶກ-ລອງແທ່ງ, ເຢົ່າໄຢ-ຟານທຽດ, ເສັ້ນທາງດ່ວນ ບຽນຮວ່າ-ຫວຸ໊ງເຕົ່າ, ສະໜາມບິນສາກົນ ລອງແທ່ງ..., ຈະປະກອບສ່ວນ ຍູ້ແຮງກຳລັງການຂຸດຄົ້ນສິນຄ້າຂອງກຸ່ມທ່າກຳປັ່ນ ກາຍແມັບ-ທິຫວາຍ, ຜ່ານນັ້ນ ກາຍເປັນທ່າກຳປັ່ນຂົນສົ່ງສາກົນ ທີ່ສຳຄັນ, ມີປະສິດທິຜົນ ແລະ ມີລະດັບສາກົນ, ພ້ອມກັນນັ້ນ ຢືນຢັນທີ່ຕັ້ງທ່າກຳປັ່ນທະເລຂອງຫວຽດນາມ ຢູ່ໃນແຜນທີ່ການຂົນສົ່ງທາງທະເລໂລກ.
ບົດ: VNP/ເຊີນເງ້ຍ - ພາບ: ຮວິ່ນເຊີນ - ແປໂດຍ: ຢືຟຽນ
