ແພພື້ນເມືອງ ຂອງ ຊາວເຜົ່າ ປ່າແຖນ
ຊົນເຜົ່າ ປ່າແຖນ ແມ່ນໜຶ່ງໃນ 54ຊົນເຜົ່າ ຂອງ ຫວຽດນາມ, ດຳ ລົງຊີວິດຮ່ວມກັນຢູ່ແຂວງ ຮ່າຢາງ ແລະ ຕວຽນກວາງ. ຜ່ານຫຼາຍລຸ້ນຄົນ, ຊາວເຜົ່າ ປ່າແຖນ ໄດ້ສ້າງ ແລະ ຮັກສາວັດທະນະທຳ ທີ່ຫຼາກຫຼາຍ ແລະ ອຸດົມສົມບູນ ເຊິ່ງໃນນັ້ນ ອາຊີບຕໍ່າແພພື້ນເມືອງແມ່ນພົ້ນເດັ່ນກວ່າໝູ່. ນີ້ແມ່ນຈຸດພິເສດ ທາງດ້ານວັດທະນະທຳ ທີ່ສະແດງໃຫ້ເຫັນຢ່າງຊັດເຈນ ເຖິງຊີວິດທາງດ້ານຈິດໃຈ ແລະ ຍັງແມ່ນຄວາມພາກພູມໃຈ ຂອງ ຊາວເຜົ່າ ປ່າແຖນ ອີກດ້ວຍ.
ນາງ ຫຼີທິຕວ່ານ ເຜົ່າ ປ່າແຖນ, ຕາແສງ ຮົ່ງກວາງ, ເມືອງ ເລີມບິ່ງ, ແຂວງ ຕວຽນກວາງ ໄດ້ກ່າວວ່າ: “ບັນພະບູລຸດໄດ້ເລົ່າໃຫ້ຟັງວ່າ ມີຍິງສາວ ກຳພ້າຄົນໜ່ຶງ ເຜົ່າ ປ່າແຖນ ໄດ້ໄປງານຕະຫຼາດນັດ ລະດູບານໃໝ່, ເມື່ອເຫັນຊາວເຜົ່າອື່ນ ນຸ່ງຊຸດອາພອນ ປະຈຳເຜົ່າ, ນາງຮູ້ສຶກ ເສົ້າໃຈຫຼາຍ ແລະ ຄິດວ່າ ຕ້ອງມີຊຸດອາພອນ ປະຈຳເຜົ່າ ຕົນ. ໂດຍຄວາມບັງເອີນ, ນາງ ໄດ້ເຫັນນົກບິນ ຢູ່ເທິງຕົ້ນໄມ້ທີ່ມີຫຼາກຫຼາຍສີສັນ: ສີຟ້າ, ສີແດງ, ສີມ່ວງ ໃນຂະນະນັ້ນ ໃນໃຈຂອງນາງ ໄດ້ປະກົດຂຶ້ນສີ ຂອງ ຊຸດອາພອນ ປະຈຳເຜົ່າ ຂອງຕົນ. ເນື່ອງຈາກວ່າ ນາງ ເປັນເດັກກໍາພ້າ, ສະນັ້ນ ນາງ ປາດຖະໜາ ຢາກມີຄົນຮັກ ໜຶ່ງຄົນ, ເຮືອນຫຼັງໜຶ່ງ ແລະ ໝາໂຕໜຶ່ງ ເພື່ອປົກປ້ອງນາງ, ປ່າ ທີ່ນາງອາໄສຢູ່ ມີຕົ້ນແຊວຂາວຫຼາຍ, ດັ່ງນັ້ນ ນາງ ຈຶ່ງນຳຮູບຊົງຂອງໝາກແຊວ ເຂົ້າໃນຊຸດຂອງນາງ ເພື່ອເຮັດໃຫ້ ມັນມີຊີວິດຊີວາກວ່າ, ຖ້າມີສັດ ແລະ ຕົ້ນໄມ້, ຊີວິດກໍ່ຈະດີ ແລະ ສົດຊື່ນກວ່າ”.
ເພາະສະນັ້ນ, ຊຸດອາພອນ ຂອງ ຊາວເຜົ່າ ປ່າແຖນ ຈະມີຮູບ ຂົວ ທີ່ຕາງໜ້າໃຫ້ຄວາມຮັກ, ເຮືອນ ທີ່ຕາງໜ້າໃຫ້ຄວາມສຸກ ແລະ ການເສຍສະຫຼະ, ໝາ ເປັນສັນຍາລັກແຫ່ງການປົກປັກຮັກສາ ເຊິ່ງກັນ ແລະ ກັນ, ຮູບໝາກແຊວ ຕາງໜ້າ ໃຫ້ຄວາມປາດຖະໜາ ມີຊີວິດການເປັນຢູ່ທີ່ດີ ແລະ ບໍລິສຸດ.
ເພື່ອໃຫ້ມີຊຸດອາພອນ ທີ່ມີຄວາມລະອຽດຖີ່ຖ້ວນ, ຮຽກຮ້ອງ ໃຫ້ຂັ້ນຕອນການຕໍ່າຜ້າ, ຖັກແສ່ວລວດລາຍ, ການຕໍ່ແພພື້ນເມືອງ ຂອງຊາວເຜົ່າ ປ່າແຖນ ຕ້ອງເຮັດຕາມແບບ ຫັດຖະກຳພື້ນເມືອງ. ໃນເມື່ອກ່ອນ, ວັດຖຸດິບ ທີ່ນຳໃຊ້ໃນການຖັກແສ່ວ ແມ່ນຜະລິດຈາກຕົ້ນຝ້າຍ ແລະ ຕົ້ນປ່ານ. ຫຼັງຈາກຍ້ອມສີແລ້ວ, ເສັ້ນຝ້າຍ ຈະໄດ້ຕໍ່າເປັນແພພື້ນເມືອງ. ໂດຍສະເພາະ, ບັນດາລາຍດອກສີແດງ ເປັນສີ ຕົ້ນຕໍ ຂອງ ຊຸດເຄື່ອງນຸ່ງຂອງແມ່ຍິງ. ສີແດງ ໃນຊຸດອາພອນ ປະຈຳເຜົ່າຂອງຊາວ ປ່າແຖນ ແມ່ນໄດ້ສົມທຽບກັບສີຂອງ ນົກໄຟ.
ສິ່ງທີ່ໜ້າສົນໃຈກ່ຽວກັບສີສັນ ທີ່ແຕກຕ່າງກັນ ໄດ້ປະສານສົມທົບ ຢູ່ໃນເຄື່ອງນຸ່ງຫົ່ມຂອງຊາວເຜົ່າ ປ່າແຖນ ເຊິ່ງເຮັດໃຫ້ເຂົາເຈົ້າກາຍເປັນທີ່ສວຍງາມຄື ແມງກະເບື້ອ ທີ່ຫຼາກຫຼາຍສີສັນ. ເພື່ອຈະໄດ້ຊຸດອາພອນທີ່ສວຍງາມ, ແມ່ຍິງຊາວເຜົ່າ ປ່າແຖນ ຕ້ອງອອກແຮງເຮັດວຽກຢ່າງຕັ້ງໜ້າ ເປັນເວລາຫຼາຍເດືອນ ເພາະວ່າ ເຄື່ອງນຸ່ງ ຂອງເຂົາເຈົ້າແມ່ນຮຽກຮ້ອງມີຄວາມລະອຽດຖີ່ຖ້ວນ ໃນທຸກຈຸດປາຍເຂັມ ແລະ ໃນທຸກລວດລາຍຂອງເສື້ອຜ້າ.
ແມ່ຍິງເຜົ່າ ປ່າແຖນ ຍາມໃດກໍ່ຮູ້ສຶກພາກພູມໃຈຕໍ່ ຊຸດອາພອນ ປະ ຈຳເຜົ່າ ຂອງຕົນເອງ. ດ້ວຍສີມື ທີ່ມີຄວາມຊຳນິຊຳນານ ແລະ ມີພອນສະຫວັນ ແລະ ຄວາມດຸໝັ່ນຂະຫຍັນພຽນ, ແມ່ຍິງ ຊາວເຜົ່າ ປ່າແຖນ ຜະລິດອອກມາເສື້ອຜ້າທີ່ເປັນເອກະລັກ ສະເພາະ ແລະ ບັນດາຊຸດ ທີ່ສວຍງາມ, ບໍ່ພຽງແຕ່ເຊີດຊູຄວາມງາມດ້ານວັດທະນະ ທຳ ຂອງ ເຜົ່າ ຕົນເທົ່ານັ້ນ, ຫາກຍັງໄດ້ເຊີດຊູຄວາມງາມຂອງແມ່ ຍິງ ຫວຽດນາມ ອີກດ້ວຍ.
ບົດ: VNP/ຖາວວີ - ພາບ: ແທງຢາງ - ແປໂດຍ: ຢືຟຽນ