ຮ່ວມມືປົກປັກຮັກສາຕົ້ນນໍ້າແມ່ນ້ຳຂອງ
ປະເຊີນໜ້າກັບສິ່ງທ້າທາຍອັນໃຫຍ່ຫຼວງເຊັ່ນ: ຜົນກະທົບ ຂອງການປ່ຽນແປງດິນຟ້າອາກາດ, ມົນລະພິດດ້ານສິ່ງແວດລ້ອມ, ການຂະ ຫຍາຍຕົວຂອງປະຊາກອນ, ການຂຸດຄົ້ນແລະນຳໃຊ້ນ້ຳທີ່ບໍ່ຍືນຍົງແລະຊັບພະຍາກອນ ທີ່ກ່ຽວຂ້ອງໃນອ່າງແມ່ນໍ້າຂອງ. ຫວ່າງມໍ່ໆມານີ້, ບັນດາປະເທດສະມາຊິກຄະນະກຳມະການແມ່ນ້ຳ ຂອງ ປະກອບມີ ກໍາປູເຈຍ, ລາວ, ໄທ ແລະຫວຽດນາມ ໄດ້ພົບປະກັນຢູ່ລາວ, ເຫັນດີເປັນເອກະພາບ ການປະດິດສ້າງ ແລະການຮ່ວມມືເພື່ອຮັບປະກັນຄວາມໝັ້ນຄົງດ້ານແຫຼ່ງນ້ຳ ແລະການພັດທະນາແບບຍືນຍົງ ຂອງອ່າງ ແມ່ນ້ຳຂອງ.
ກອງປະຊຸມໄດ້ເຫັນດີເປັນເອກະສັນ ກ່ຽວກັບຂໍ້ຕົກລົງ/ແຜນການເພື່ອບັນລຸຜົນ ຂອງ ຍຸດທະສາດ ພັດທະນາພາກພື້ນລຸ່ມແມ່ນ້ຳຂອງ ໄລຍະ2021-2030, ໂດຍມີ5ບຸລິມະສິດ ປະກອບມີ: ປັບປຸງລະ ບົບນິເວດແມ່ນ້ຳຂອງ ເພື່ອສະພາບແວດລ້ອມທີ່ປອດໃສ ແລະປະ ຊາຄົມ ມີກຳລັງການຜະລິດສູງ; ປັບປຸງຄວາມສາມາດເຂົ້າເຖິງແລະ ນຳໃຊ້ນ້ຳແລະ ຊັບພະຍາກອນ ທີ່ກ່ຽວຂ້ອງເພື່ອສະຫວັດດີການຂອງຊຸມຊົນ; ເພີ່ມທະວີການພັດທະນາແບບຍືນຍົງຕໍ່ການເຕີບໂຕເສດຖະກິດລວມ; ປັບປຸງຄວາມທົນທານຕໍ່ຄວາມສ່ຽງດ້ານດິນຟ້າອາກາດແລະ ໄພພິບັດແລະເພີ່ມທະວີການຮ່ວມມືໃນພາກພື້ນຈາກທັດສະນະໃນທົ່ວລຸ່ມແມ່ນໍ້າ.
ຄຽງຄູ່ກັບບັນດາຜົນງານທີ່ບັນລຸໄດ້, ບັນດາປະເທດໄດ້ແລກປ່ຽນກ່ຽວກັບບັນດາມາດຕະການແກ້ໄຂຢ່າງມີປະສິດທິຜົນກ່ຽວກັບການພັດທະນາແບບຍືນຍົງ ແລະການຄຸ້ມຄອງສິ່ງແວດລ້ອມຂອງອ່າງແມ່ນ້ຳຂອງ. ໃນຊຸມປີມໍ່ໆມານີ້, ໃນຖານະເປັນປະເທດຢູ່ເຂດລຸ່ມ ແມ່ນ້ຳຂອງ, ຫວຽດນາມສືບຕໍ່ເປັນສະມາຊິກ ທີ່ຕັ້ງໜ້າ ແລະມີຄວາມຮັບຜິດຊອບ, ຊຸກຍູ້ການພົວພັນຮ່ວມມືກັບບັນດາປະເທດສະມາຊິກຄະນະກຳມະການແມ່ນ້ຳຂອງ, ຄູ່ຮ່ວມມືສາກົນ ເພື່ອເພີ່ມທະວີ ການນຳໃຊ້ນ້ຳ ແລະບັນດາຊັບຜະຍາກອນທີ່ກ່ຽວຂ້ອງຂອງແມ່ນຳ້ຂອງ ຢ່າງມີປະສິດທິຜົນ, ປະກອບສ່ວນເຂົ້າໃນການພັດທະນາເສດຖະກິດ - ສັງຄົມຂອງປະເທດ, ໂດຍສະເພາະແມ່ນເຂດທົ່ງພຽງແມ່ນ້ຳຂອງ.
ຫວຽດນາມ ໄດ້ກໍ່ສ້າງລະບົບຊົນລະປະທານກາຍເລີນ–ກາຍແບແລະປະຕູນ້ຳ ຢູ່ຕົ້ນຄອງຫງວຽນເຕິດແທ່ງ, ມີໜ້າທີ່ປ້ອງກັນນໍ້າເຄັມ, ເກັບນ້ຳຈືດ, ປ້ອງກັນນ້ຳທະເລ ຍື່ງຂຶ້ນສູງ ເພື່ອຮັບໃຊ້ນ້ຳຈືດໃນຊີວິດປະຈຳວັນ ແລະການຜະລິດໃຫ້ປະຊາຊົນຢູ່ບັນດາແຂວງຄື: ກຽນຢາງ, ເຮົ້າຢາງ, ຊອກຈັງ,ບາກລຽວ, ກ່າເມົາ, ຕ່ຽນຢາງ, ລອງອານ ແລະດົ່ງທາບ. ບັນດາກິດຈະກຳເຫຼົ່ານີ້ ສົມທົບກັບລະບົບຄັນຄູທະເລ ສ້າງເປັນກຸ່ມວຽກງານຕອບສະໜອງການປ່ຽນແປງຂອງດິນຟ້າອາກາດຢ່າງຕັ້ງໜ້າ, ຫຼຸດຜ່ອນຄວາມເສຍຫາຍຈາກໄພທຳມະຊາດໃນລະດູແລ້ງໃຫ້ແກ່ຮູບແບບການຜະລິດໃນພາກພື້ນ. ພ້ອມກັນນັ້ນ, ຍັງສະໜອງນ້ຳຈືດ ໃນລະດູຝົນໃຫ້ແກ່ພາກພື້ນ, ສ້າງເງື່ອນໄຂຊຸກຍູ້ການພັດທະນາເສດຖະກິດ-ສັງຄົມໃນພາກພື້ນ. ຜ່ານນັ້ນ ຍັງຈະແກ້ໄຂຄວາມຂັດແຍ່ງກັນລະຫວ່າງເຂດລ້ຽງສິນໃນນ້ຳແຄມທະເລ ແລະ ເຂດຜະລິດກະສິກຳ.
ຄຽງຄູ່ກັນນັ້ນ, ຫວຽດນາມໄດ້ຄົ້ນຄວ້າແລະບັນດາວິທີແກ້ໄຂ ປັບ ປຸງດິນສົ້ມ ໃຫ້ແກ່ປະຊາຊົນ ຢູ່ເຂດທົ່ງພຽງແມ່ນ້ຳຂອງ ຢ່າງມີປະສິດທິຜົນ, ປະກອບສ່ວນຍົກສູງ ສະມັດຕະພາບຂອງການປູກພືດໃນພາກພື້ນ. ຍູ້ແຮງການປະຕິບັດຮູບແບບການປູກຝັງ “ຕາມທຳມະຊາດ” ເຊັ່ນ: ໝູນວຽນເຂົ້າ-ກຸ້ງ... ຈາກນັ້ນ, ມຸ່ງໄປເຖິງເປົ້າໝາຍໄລ ຍະຍາວເພື່ອຊ່ວຍຊາວກະສິກອນ ທ້ອງຖິ່ນປ່ຽນແນວຄິດຈາກການຜະລິດກະສິກຳ ມາເປັນແນວຄິດເຮັດເສດຖະກິດກະສິກຳ, ກໍ່ສ້າງຜະລິດຕະພັນມີຄຸນຄ່າ ຖືເຄື່ອງໝາຍການຄ້າສະເພາະ. ໃນເວລານັ້ນ, ທ້ອງຖິ່ນຈະກາຍເປັນເຂດກະສິກຳ ປອດສານພິດແບບພິເສດ, ດຶງດູດນັກທ່ອງທ່ຽວ ຈາກທົ່ວໂລກມາຢ້ຽມຢາມ, ພັກເຊົາ ແລະປະ ສົບກັບການທ່ອງທ່ຽວ ກະສິກຳປອດສານພິດ.
ຮັບປະກັນຄວາມໝັ້ນຄົງດ້ານນ້ຳ ແລະ ການພັດທະນາແບບຍືນຍົງຂອງອ່າງແມ່ນໍ້າ ກາຍເປັນວຽກງານອັນຮີບດ່ວນ, ສະນັ້ນຕ້ອງປ່ຽນໃໝ່ແນວຄິດ, ມີຫົວຄິດປະດິດສ້າງໃນການຮ່ວມມືລະຫວ່າງບັນດາປະເທດຢູ່ແຄມແມ່ນຳ້, ຮ່ວມມືກັບບັນດາຄູ່ຮ່ວມມືພັດທະນາ, ສືບຕໍ່ຮ່ວມມືກັບບັນດາຄູ່ຮ່ວມມືທີ່ມີທ່າແຮງບົ່ມຊ້ອນ, ເພີ່ມທະວີການເຂົ້າຮ່ວມຂອງປະຊາຄົມໃນການອອກຂໍ້ຕົກລົງ; ປ່ຽນໃໝ່ໃນບັນດາກົນໄກລະດົມຊັບພະຍາກອນ.
ບົດ: VNP - ພາບ: VNA - ແປໂດຍ: ຢືຟຽນ