ພາກພື້ນ ASEAN ສືບຕໍ່ແມ່ນຈຸດໝາຍປາຍທາງດຶງດູດ FDI
ໃນສະພາບ ການຄ້າທົ່ວໂລກ ມີຄວາມຊຸດໂຊມຍ້ອນການຂັດແຍ່ງດ້ານພູມີສາດ ການເມືອງ ແລະ ສິ່ງທ້າທາຍອື່ນໆ, ພາກພື້ນອາຊີຕາເວັນອອກສ່ຽງໃຕ້ ຍັງຄົງເປັນຈຸດໝາຍປາຍທາງ ທີ່ເຕັມໄປດ້ວຍຄວາມຫວັງ ຂອງ ບັນດານັກລົງທຶນຕ່າງປະເທດ.
30 ປີຜ່ານມາ, ASEAN ໄດ້ເຫັນກັບຕາ ການລົງທຶນໂດຍກົງຈາກຕ່າງປະເທດ ທີ່ອຸດົມສົມບູນ (FDI) ຍ້ອນມີທ່າແຮງເຕີບໂຕອັນໃຫຍ່ຫຼວງ, ສັນຍາການຄ້າຫຼາຍສະບັບໄດ້ລົງນາມ ແລະ ຂະບວນການຫັນປ່ຽນດ້ານໂຄງປະ ກອບພວມໄຂຂຶ້ນຢ່າງບໍ່ຢຸດຢັ້ງ... ເຖິງຢ່າງໃດກໍຕາມ, ສິ່ງສຳຄັນທີ່ສຸດຍັງແມ່ນແຮງຈູງໃຈ ທີ່ບັນດາປະເທດອາຊີຕາເວັນອອກສ່ຽງໃຕ້ ໃຫ້ແກ່ນັກລົງທຶນ. ລັດຖະບານຂອງບັນ ດາປະເທດເຫຼົ່ານີ້ຍາມໃດກໍ່ເອົາໃຈໃສ່ເຖິງການດຶງດູດແຫຼ່ງເງິນລົງທຶນ, ໃນນັ້ນບຸລິມະສິດ ໃຫ້ແກ່ບັນດາຂົງເຂດ ສຳຄັນຄື: ການຫັນປ່ຽນພະລັງງານ, ເສດຖະກິດ ດີຈີຕອນ, ການຄ້າຂາຍສົ່ງ ແລະ ຂາຍຍ່ອຍ.
ປີ 2022, ຍອດເງິນລົງທຶນ FDI ເຂົ້າພາກພື້ນ ASEAN ບັນລຸ ໄດ້ 224 ຕື້ ໂດລາສະຫະລັດ - ກວມ 17% ຍອດຈຳນວນທຶນ FDI ທົ່ວໂລກ. ພິເສດ, ໝາກຜົນນີ້ ນັບມື້ນັບພົ້ນເດັ່ນ ເມື່ອສະພາບເສດຖະກິດໂລກຖົດຖອຍຢ່າງຮ້າຍແຮງ, ເງິນທຶນ FDI ໃນທົ່ວໂລກໄດ້ຫຼຸດລົງ 12% ຍ້ອນບັນດາສິ່ງທ້າທາຍນັບບໍ່ຖ້ວນຄື: ຄວາມຂັດແຍ່ງດ້ານພູມີສາດການເມືອງ, ສະບຽງອາຫານ ແລະ ພະລັງງານ ທ່ີມີລາຄາ ເພີ່ມຂຶ້ນ...
ໃນຂະນະທີ່ ສິງກະໂປ, ມາເລເຊຍ ແລະ ຫວຽດນາມ ແມ່ນສາມປະເທດ ທີ່ມີຜົນງານດີເດັ່ນໃນຂົງເຂດ ເຕັກໂນໂລຊີ, ອິນໂດເນເຊຍ ແລະ ໄທ ແມ່ນ 2 ປະເທດ ທີ່ໄດ້ຮັບຜົນປະໂຫຍດຕົ້ນຕໍໃນຂົງເຂດລົດໄຟຟ້າ; ປັດຈຸບັນ, ມາເລເຊຍ ກວມເອົາ 45% ຂອງອັດຕາສ່ວນກວມ ຂອງຕະ ຫຼາດໃນທົ່ວໂລກ ໃນຂະແໜງການເຄິ່ງຊັກນຳ ໄຟຟ້າ. ນອກຈາກຂະແໜງການຜະລິດແລ້ວ, ຂະແໜງການບໍລິການການເງິນຂອງ ASEAN ຍັງໄດ້ຮັບການຂະຫຍາຍຕົວ, ແຕ່ຍັງສຸມໃສ່ຢູ່ ສິງກະໂປ ເປັນຕົ້ນຕໍ.
ໃນຊຸມປີມໍ່ໆ ມານີ້, ສິງກະໂປ ໄດ້ນຳໜ້າພາກພື້ນໃນວົງເງິນ FDI ດຶງດູດໄດ້ນັກລົງທຶນຕ່າງປະເທດ, ເພາະວ່າ ລະບົບກົດໝາຍຂອງປະເທດດັ່ງກ່າວ ມີຄວາມກ້າວໜ້າ, ສົມ ບູນແບບ, ມີຄວາມຍຸຕິທຳ ແລະ ໂປ່ງໃສ. ສິງກະໂປ ໄດ້ກໍານົດສາມຂົງເຂດສໍາຄັນເພື່ອດຶງດູດການລົງທຶນ, ລວມທັງຂະແໜງ ການຜະລິດໃໝ່, ການສົ່ງອອກ ແລະ ແຮງງານ.
ສະພາການລົງທຶນ ໄທ (BOI) ປະກາດຂໍ້ມູນສະແດງໃຫ້ເຫັນວ່າ: ປີ 2023, ປະເທດນີ້ ດຶງດູດ FDI ໄດ້ 18,5 ຕື້ ໂດລາສະຫະລັດ, ເພີ່ມຂຶ້ນ 72% ເມື່ອທຽບໃສ່ໄລຍະດຽວກັນ, ໄທ ມີນະໂຍບາຍພິເສດດ້ານພາສີຫຼາຍຢ່າງ, ເຊັ່ນ: ການຍົກເວັ້ນ ແລະ ຫຼຸດຜ່ອນພາສີນຳເຂົ້າ ກ່ຽວກັບເຄື່ອງຈັກ ແລະ ອຸປະກອນ; ການຍົກເວັ້ນ ແລະ ຫຼຸດຜ່ອນພາສີລາຍໄດ້ຂອງວິສາຫະກິດ; ຍົກເວັ້ນ ພາສີນໍາເຂົ້າວັດຖຸ ທີ່ຈໍາເປັນ ເພື່ອນຳໃຊ້ເພື່ອຜະລິດ ສິນຄ້າສົ່ງອອກ.
ກ່ອນໜ້ານີ້, ການເບີກຈ່າຍ FDI ເຂົ້າ ອິນໂດເນເຊຍ ບັນ ລຸ 45,6 ຕື້ ໂດລາສະຫະລັດ ໃນປີ 2022, ແມ່ນລະດັບສູງສຸດໃນປະຫວັດສາດຂອງພື້ນຖານເສດຖະກິດໃຫຍ່ສຸດຢູ່ ອາຊີຕາເວັນອອກສ່ຽງໃຕ້.
ຕາມການຄາດຄະເນ ຂອງ IMF, ດ້ວຍການເຕີບໂຕ GDP 6,1% ໃນປີ 2024, ກຳປູເຈຍ ກາຍເປັນພື້ນຖານເສດຖະກິດ ທີ່ເຕີບໂຕໄວທີ່ສຸດໃນ ອາຊີຕາເວັນອອກສ່ຽງໃຕ້. ປະເທດນີ້ ໄດ້ເພີ່ມທະວີການພົວພັນຮ່ວມມື ຜ່ານສັນຍາການຄ້າເສລີ ຫຼາຍສະບັບກັບ ສປ ຈີນ ແລະ ສ ເກົາຫຼີ.
ສ ອາເມລິກາ ແມ່ນນັກລົງທຶນແຖວໜ້າໃນບັນດາໂຄງ ການຢູ່ອາຊີຕາເວັນອອກສ່ຽງໃຕ້, ຮອງລົງມາແມ່ນ ສປຈີນ, ບັນດາປະເທດ ASEAN, ສ ເກົາຫຼີ ແລະ ຍີ່ປຸ່ນ... ທີ່ໄດ້ລົງ ທຶນເຂົ້າໃນຂົງເຂດການຜະລິດ, ເປັນຂົງເຂດກະ ດູກສັນ ຫຼັງຂອງພາກພື້ນ.
ຫວຽດນາມ ກໍ່ແມ່ນຈຸດພົ້ນເດັ່ນໃນພາກພື້ນ. ທ່ານ Lawrence Yeo, CEO AsiaBIZ Strategy (ສິງກະໂປ ໄດ້ສັງເກດວ່າ: “ຫວຽດນາມ ຍັງຄົງເປັນແມ່ເຫຼັກດຶງດູດ FDI ຍ້ອນຄ່າຈ້າງ ຕໍ່າ, ແຮງງານທີ່ອຸດົມສົມບູນ, ໄດ້ຮັບ ການຝຶກອົບຮົມ, ປະຊາກອນໜຸ່ມ, ທີ່ຕັ້ງພູມສາດໃກ້ກັບ ຈີນ ແລະ ການຫັນປ່ຽນໄປສູ່ລະບົບຕ່ອງໂສ້ມູນຄ່າເສດ ຖະກິດເຕັກໂນໂລຊີສູງ”.
ເປັນທ່ີໜ້າສັງເກດ, ທ່າອ່ຽງ ຂອງ ການຍົກຍ້າຍຕ່ອງໂສ້ການຜະລິດ/ການສະໜອງ ມາເຂົ້າໃກ້ບ້ານກວ່າ ຫຼື ໄປຫາບັນດາກຸ່ມ ພັນທະມິດ (ໂດຍສະເພາະ ແມ່ນພາຍຫຼັງການຂັດແຍ້ງດ້ານພູມີສາດການເມືອງ, ບັງຄັບໃຫ້ບັນດາປະເທດຕ້ອງເລືອກເອົາຝ່າຍ) ຈະເຫັນໄດ້ຊັດເຈນກວ່າໃນປີ 2024 ແລະ ໃນຊຸມປີຕໍ່ໄປ ເມື່ອນັກລົງທຶນຊອກຫາຄວາມປອດໄພໃນການລົງທຶນຂອງຕົນ.
ໂດຍໄດ້ຮັບຮູ້ເຖິງຄວາມສຳຄັນ ຂອງ ການດຶງດູດແຫຼ່ງທຶນ FDI ເພື່ອພັດທະນາເສດຖະກິດ ແລະ ປັບປຸງຊີວິດສັງຄົມ, ບັນດາປະເທດ ອາຊີຕາເວັນອອກສ່ຽງໃຕ້ ຈະສືບຕໍ່ຜັນຂະຫຍາຍບັນດານະໂຍບາຍໜູນຊ່ວຍນັກລົງທຶນຕ່າງປະເທດຕື່ມອີກ, ມຸ່ງໄປສູ່ການສ້າງສະພາບແວດລ້ອມແຫ່ງການດຳເນີນທຸລະກິດທີ່ໝັ້ນຄົງ, ລະບົບກົດ ໝາຍຍຸຕິທຳ ແລະ ມີປະສິດທິຜົນ, ບໍ່ມີການຈຳແນກ ປະພຶດຕໍ່.
- ບົດ: VNP - ພາບ: VNA - ແປໂດຍ: ຢືຟຽນ