ເຊື່ອມຕໍ່ການຄ້າລະຫວ່າງ ຮ່າໂນ້ຍ ກັບບັນດາແຂວງ, ນະຄອນ
ເພື່ອສືບຕໍ່ຊຸກຍູ້ການຄ້າລະຫວ່າງ ນະຄອນ ຮ່າໂນ້ຍ ກັບບັນດາແຂວງ ມຸ່ງໄປເຖິງການສົ່ງອອກຜະລິດຕະພັນກະສິກຳ, ປ່າໄມ້, ການປະມົງ, ຜະລິດຕະພັນຫັດຖະກຳລະຫວ່າງນະຄອນ ຮ່າໂນ້ຍ ກັບບັນດາແຂວງ, ພະແນກກະສິກຳ ແລະ ພັດທະນາຊົນນະບົດຮ່າໂນ້ຍ ສົມທົບກັບກົມພັດທະນາຄຸນນະພາບ, ປຸງແຕ່ງແລະ ພັດທະນາການຕະຫຼາດ ແລະ ກຸ່ມບໍລິສັດ Central Retail ຊຸກຍູ້ການເຄື່ອນໄຫວວາງສະແດງ, ແນະນຳແລະ ສົ່ງເສີມຜະລິດຕະພັນກະສິກຳ, ປ່າໄມ້ແລະ ສິນໃນນ້ຳ ທີ່ປອດໄພຂອງນະຄອນ ຮ່າໂນ້ຍ ແລະ ບັນດາແຂວງ, ນະຄອນໃນທົ່ວປະເທດ.
ທ່ານ ຫງວຽນຍືຕ້ຽບ, ຫົວໜ້າກົມພັດທະນາຄຸນນະພາບ, ປຸງແຕ່ງ ແລະ ພັດທະນາການຕະຫຼາດ ໃຫ້ຮູ້ວ່າ: ໂຄງການຮ່ວມມືເຊື່ອມຕໍ່ຜະລິດຕະພັນກະສິກຳ, ປ່າໄມ້ ແລະ ສິນໃນນຳ້ ຂອງ ຮ່າໂນ້ຍ ແລະ ບັນດາແຂວງ ໄດ້ຮັບການຮັບຮອງຈາກກະຊວງກະສິກຳ ແລະ ພັດທະນາຊົນນະບົດ ນະຄອນ ຮ່າໂນ້ຍ ໄດ້ລົງນາມໃນ 9 ປີ, ມາຮອດປະຈຸບັນ, ບັນດາທ່າແຮງຂອງນະຄອນໄດ້ຮັບການຂຸດຄົ້ນ ແລະ ພັດທະນາ, ເໝາະສົມກັບທ່າແຮງຂອງ ຮ່າໂນ້ຍ ເປັນສະຖານທີ່ເຊື່ອມຕໍ່ ແລະ ຊົມໃຊ້ຜະລິດຕະພັນ.
ຮ່າໂນ້ຍ ຍັງມີ 250 ວິສາຫະກິດ ຜະລິດ ແລະ ປຸງແຕ່ງຜະລິດຕະພັນກະເສດ, ປ່າໄມ້ ແລະ ສິນໃນນຳ້, ວິສາຫະກິດ ໂດຍພື້ນຖານແລ້ວ ຂຸດຄົ້ນບັນດາຈຸດພິເສດຂອງບັນດາພາກພື້ນໃນທົ່ວປະເທດ. ປີ 2023, ວິສາຫະກິດ 250 ແຫ່ງນີ້ ສົ່ງອອກກວ່າ 1,8 ຕື້ ໂດລາສະຫະລັດ. ດ້ວຍທ່າໄດ້ປຽບ, ເພື່ອຜັນຂະຫຍາຍໂຄງການລົງນາມເພື່ອຮັບປະກັນຄວາມປອດໄພດ້ານສະບຽງອາຫານ, ຍົກສູງຄຸນນະພາບການຄ້າ ຜະລິດຕະພັນກະສິກຳ, ປ່າໄມ້ ແລະ ສິນໃນນຳ້ລະຫວ່າງ ຮ່າໂນ້ຍ ກັບບັນດາແຂວງ, ນະຄອນ, ພະແນກກະສິກຳ ແລະ ພັດທະນາຊົນນະບົດ ຮ່າໂນ້ຍ ໄດ້ລົງນາມໃນສັນຍາຮ່ວມມືກັບ 43 ແຂວງ, ນະຄອນ, ພັດທະນາຕ່ອງໂສ້ການສະໜອງກວ່າ 1.000 ແຫ່ງເພື່ອຜະລິດສິນຄ້າກະສິກຳ, ປ່າໄມ້, ສິນໃນນຳ້ ທີ່ປອດໄພຢູ່ຕະຫຼາດນະຄອນ ຮ່າໂນ້ຍ ດ້ວຍແຫຼ່ງສະໜອງກວມ 20% ຍອດຜະລິດຕະພັນກະສິກຳ, ປ່າໄມ້ ແລະ ສິນໃນນຳ້ໃນທົ່ວປະເທດ. ການພັດທະນາຕ່ອງໂສ້ບໍ່ພຽງແຕ່ປະກອບສ່ວນຄວາມໂປ່ງໃສຂອງແຫຼ່ງກໍາເນີດເພື່ອຮັບປະກັນຄວາມປອດໄພດ້ານສະບຽງອາຫານເທົ່ານັ້ນ, ແຕ່ຍັງປະກອບສ່ວນເຂົ້າໃນການເພີ່ມຕໍາແໜ່ງການຜະລິດກະສິກໍາໃນສະພາບການໃນປະຈຸບັນ.
ການຈັດຕັ້ງ “ສັບປະດາວາງສະແດງ, ແນະນຳ ແລະ ຊຸກຍູ້ບັນດາຜະລິດຕະພັນກະສິກຳ, ປ່າໄມ້ ແລະ ສິນໃນນຳ້ທີ່ປອດໄພຂອງນະຄອນ ຮ່າໂນ້ຍ ແລະ ບັນດາແຂວງ, ນະຄອນ ໃນປີ 2024” ຢູ່ສູນການຄ້າ Big C ທັງລອງ (ຮ່າໂນ້ຍ) ແມ່ນໂອກາດເພື່ອໃຫ້ບັນດາວິສາຫະກິດ, ສະຫະກອນ ແລະ ພື້ນຖານຜະລິດຢູ່ ຮ່າໂນ້ຍ ແລະ ບັນດາແຂວງ, ນະຄອນ ແລກປ່ຽນປະສົບການໃນການຈັດຕັ້ງການຜະລິດ, ປັບປຸງມູນຄ່າເພີ່ມໃຫ້ບັນດາຜະລິດຕະພັນ, ເພີ່ມທະວີການພົວພັນດ້ານການຄ້າ, ການໂຄສະນາ, ຊຸກຍູ້ການຄ້າ, ຊອກຫາລູກຄ້າ, ເຂົ້າເຖິງຕະຫຼາດ, ກະຕຸ້ນຄວາມຕ້ອງການພາຍໃນປະເທດ, ເພີ່ມທະວີການຂາຍຍ່ອຍຜະລິດຕະພັນກະສິກຳ, ປ່າໄມ້ ແລະ ສິນໃນນຳ້, ຍົກສູງທີ່ຕັ້ງຂອງຜະລິດຕະພັນກະສິກຳຢູ່ຕະຫຼາດທົ່ວປະເທດ ແລະ ມຸ່ງໄປເຖິງການສົ່ງອອກ.
ພິເສດ, ການລົງນາມໃນບົດບັນທຶກຊ່ວຍຈຳລະຫວ່າງກຸ່ມບໍລິສັດ Central Retail ແມ່ນກຸ່ມຄ້າຂາຍຍ່ອຍແຖວໜ້າຂອງ ໄທ, ດຳເນີນທຸລະກິດຢູ່ ຫວຽດນາມ ນັບແຕ່ປີ 2012 ດ້ວຍກວ່າ 340 ຮ້ານ ແລະ ສູນການຄ້າຢູ່ທົ່ວ 42 ແຂວງ ດ້ວຍບັນດາວິສາຫະກິດ ແລະ ສະຫະກອນຜະລິດກະສິກຳ, ປ່າໄມ້ ແລະ ສິນໃນນຳ້ຂອງນະຄອນ ຮ່າໂນ້ຍ ແລະ ບັນດາແຂວງອື່ນໆ ແມ່ນຈຸດໝາຍສຳຄັນເພື່ອໃຫ້ກຸ່ມບໍລິສັດ ຊຸກຍູ້ການເຈລະຈາ ແລະ ເຊັນສັນຍາຢ່າງເປັນທາງການ. ຈາກນັ້ນ, ນຳບັນດາຜະລິດຕະພັນກະເສດມີຄຸນນະພາບ, ສິນໃນນ້ຳ, ຜະລິດຕະພັນປຸງແຕ່ງ, ສິນຄ້າພິເສດຂອງພາກພື້ນຈາກບັນດາຂະແໜງການຜະລິດ, ດຳເນີນທຸລະກິດຢູ່ ຮ່າໂນ້ຍ ແລະ ບັນດາແຂວງຕ່າງໆ ໄປຈຳໜ່າຍໃນບັນດາລະບົບ Go Big C ແລະ Top Market ໃນທົ່ວປະເທດ, ກໍ່ຄືກາລະໂອກາດສົ່ງອອກສິນຄ້າຂອງ ຫວຽດນາມ ຜ່ານເຄືອຂ່າຍຂາຍຍ່ອຍສາກົນຂອງ Central Retail. /.
ບົດ: VNP/ເງິນຮ່່າ - ພາບ: ແຄ໋ງລອງ- ແປໂດຍ: ຢືຟຽນ