ໂຮງຮຽນມິດຕະພາບ T78: ຂົວເຊື່ອມຕໍ່ ຫວຽດນາມ-ລາວ
ປີ 2022 ເປັນປີພິເສດ ສະເຫຼີມສະຫຼອງ 60 ປີແຫ່ງວັນສ້າງຕັ້ງສາຍພົວພັນທາງການທູດ ລະຫວ່າງ ຫວຽດນາມ - ລາວ (ວັນທີ 5 ກັນຍາ1962 – ວັນທີ 5 ກັນຍາ 2022) ແລະ 45 ປີແຫ່ງວັນເຊັນ ສົນທິ ສັນຍາມິດຕະພາບ ແລະ ການຮ່ວມມືຫວຽດນາມ - ລາວ (ວັນທີ 18 ກໍລະກົດ 1977 – ວັນທີ 18 ກໍລະກົດ 2022) ຍັງເປັນປີ ທີ່ມຸ່ງໄປເຖິງ ການສະເຫຼີມສະຫຼອງ 65 ປີວັນສ້າງຕັ້ງໂຮງຮຽນມິດຕະພາບ T78 (ວັນທີ 1 ມັງກອນ 1958 – 1 ມັງກອນ 2023).
ກວ່າ 60 ປີ ທີ່ຜ່ານມາ, ຈາກໂຮງຮຽນແຫ່ງນີ້, ມີນັກຮຽນ ລາວ ເກືອບ 30.000 ຄົນໄດ້ເຕີບໃຫຍ່, ກາຍເປັນພະນັກງານຫຼັກແຫຼ່ງ ແລະ ດຳ ລົງຕຳແໜ່ງສຳຄັນ ໃນການນຳພາ ຂອງ ພັກ ແລະ ລັດ, ປະກອບ ສ່ວນອັນໃຫຍ່ຫຼວງ ເຂົ້າໃນພາລະກິດປົກປັກຮັກສາ ແລະ ສ້າງສາ ປະເທດ ລາວ ອ້າຍນ້ອງ.
ທ່ານ ເລຝູ໋ຖັ໋ງ, ເລຂາຄະນະພັກ, ຜູ້ອໍານວຍການໂຮງຮຽນ ໃຫ້ຮູ້ວ່າ ພາຍຫຼັງກວ່າເຄິ່ງສະຕະວັດ, ຄຳແນະນຳ ຂອງລຸງ ໂຮ່ ເມື່ອມາຢ້ຽມ ຢາມໂຮງຮຽນ ຍັງມີຄວາມໝາຍປະຫວັດສາດ ແລະ ຍຸກສະໄໝທີ່ເລິກເຊິ່ງ. ລຸງເວົ້າວ່າ: “ຕ້ອງເປີດປະຕູໂຮງຮຽນ ໃຫ້ນັກຮຽນ ໄດ້ຕິດຕໍ່ກັບທ້ອງຖິ່ນ, ໃຊ້ປະຊາຊົນ ປົກປັກຮັກສາ ຄວາມລັບຂອງ ໂຮງຮຽນ, ແຕ່ບໍ່ແມ່ນປິດປະຕູ ເພື່ອລັອກນັກຮຽນ ໃນໂຮງຮຽນ ແລ້ວເອີ້ນວ່າ ເປັນຄວາມລັບ”. ເຊື່ອມຊຶມຄຳສັ່ງສອນຂອງລຸງ ໂຮ່, ບໍ່ວ່າຈະຢູ່ໃສ, ໃນສະພາບການໃດ, ໃນສະໄໝສົງຄາມ ກໍຄື ໃນສະໄໝສັນຕິພາບ, ໂຮງຮຽນຍາມໃດກໍ່ໄດ້ “ໃຊ້ຊີວິດໃນຄວາມຮັກແພງຈາກພັກ, ຈາກປະຊາຊົນ”.
ຊາວ ຫວຽດນາມ ມັກເອີ້ນໂຮງຮຽນແຫ່ງນີ້ວ່າ “ໂຮງຮຽນ ລາວ” ເພາະນັບແຕ່ມື້ທຳອິດແຫ່ງການສ້າງຕັ້ງ, ໂຮງຮຽນໄດ້ຮັບມອບໝາຍໜ້າທີ່ສອນພາສາ ຫວຽດ (ປີກຽມ) ແລະ ວັດທະນະທຳ ຫວຽດນາມ ໃຫ້ແກ່ນັກຮຽນ ລາວ. ປັດຈຸບັນ, ໂຮງຮຽນ ຍັງປະຕິບັດໜ້າທີ່ສຶກສານັກຮຽນ ຊັ້ນມັດທະຍົມຕອນປາຍ ໃຫ້ນັກຮຽນຢູ່ເຂດພູດອຍທາງພາກເໜືອ ຫວຽດນາມ. ສົກຮຽນ 2021-2022 ເປັນປີທຳອິດ ທີ່ທາງໂຮງຮຽນ ຮັບເອົາ ນັກຮຽນ ຊັ້ນມັດທະຍົມຕອນປາຍ ຈາກ ລາວ ຈໍານວນ 20 ຄົນ. ນ້ອງ ຈົວຊົ່ງ ບົວສີເນັ່ງມາ ກ່າວວ່າ: “ເນື່ອງຈາກການແຜ່ລະບາດໂຄວິດ-19 ເຮັດໃຫ້ສົກຮຽນໄດ້ເລື່ອນໄປ 3 ເດືອນ, ແຕ່ຍ້ອນຄວາມເອົາໃຈໃສ່ ຈາກຄູອາຈານ, ພວກນ້ອງໄດ້ຜ່ານຜ່າໄລຍະການແຜ່ລະ ບາດຂອງພະຍາດຢ່າງວ່ອງໄວ ແລະ ໄດ້ສຸມໃສ່ຮຽນພາສາ ຫວຽດ, ຍິ່ງໄປກວ່ານັ້ນ ພວກນ້ອງຍັງໄດ້ທາງໂຮງຮຽນພາໄປທ່ຽວອ່າວ ຮ້າລອງ, ງາມຫຼາຍ!”.
ໃນຊຸມປີມໍ່ໆ ມານີ້, ໂຮງຮຽນໄດ້ມີການປ່ຽນໃໝ່ ວິທີການສອນ ແລະ ຈັດຕັ້ງບັນດາການເຄື່ອນໄຫວນອກຫຼັກສູດ ໃຫ້ນັກຮຽນ ລາວ ຢູ່ສະ ເໝີ ເພື່ອຍົກສູງຄວາມຮູ້ ແລະ ຄວາມເຂົ້າໃຈ ກ່ຽວກັບວັດທະນະທຳ ຫວຽດ, ພ້ອມກັນນັ້ນກໍຊ່ວຍເຫຼືອປະຊາຊົນ ຢູ່ທ້ອງຖິ່ນເວົ້າສະເພາະ ແລະ ທົ່ວປະເທດເວົ້າລວມ ສືບຕໍ່ເພີ່ມທະວີຄວາມສາມັກຄີແບບພິເສດ ແລະ ຄວາມສັດຊື່ບໍລິສຸດ ລະຫວ່າງສອງປະເທດ.
ແນໃສ່ສືບທອດຜົນສຳເລັດທີ່ບັນລຸໄດ້ ຈາກໂຄງການ Homestay - “ນຳນັກຮຽນ ໄປທັດສະນະສຶກສາຢູ່ນໍາເຮືອນ ປະຊາຊົນ”, ເລີ່ມຕົ້ນປີນີ້, ໂຮງຮຽນ ໄດ້ຈັດຕັ້ງໂຄງການ ຄອບຄົວ ຫວຽດ ກັບນັກສຶກສາ ລາວ - ເປັນກິດຈະກຳ ທີ່ມີຄວາມໝາຍ ຢ່າງເລິກເຊິ່ງ ເພື່ອແນໃສ່ຮັດແໜ້ນນ້ຳໃຈສາມັກຄີ, ຄວາມສະໜິດຕິດພັນ ລະຫວ່າງປະຊາຊົນ, ວິສາຫະກິດ ຫວຽດ ກັບ ນັກຮຽນ ລາວ.
ນອກຈາກນີ້, ໃນໂອກາດງານບຸນ ຫຼື ບຸນປີໃໝ່ ປະຈຳຊາດຂອງສອງປະເທດ, ນັກຮຽນ ລາວ ແລະ ນັກຮຽນ ຫວຽດ ໄດ້ມາເຕົ້າໂຮມກັນ ເພື່ອການພົບປະແລກປ່ຽນ ແລະ ຜ່ານປະສົບການຕົວຈິງ ໃນກິດຈະກຳຕ່າງໆ ເຊັ່ນ: ຫໍ່ເຂົ້າຕົ້ມໃນບຸນປີໃໝ່ ປະຈຳຊາດ ຫວຽດນາມ, ເຮັດເຂົ້າໜົມຫວານ - ເຂົ້າໜົມບົວລອຍ ໃນບຸນເຕັດ ຮ່ານ, ຫົດນ້ຳໃນບຸນປີໃໝ່ ລາວ... ຫວ່າງມໍ່ໆ ມານີ້, ທາງໂຮງຮຽນ ຍັງໄດ້ຈັດຕັ້ງການເສັງທາງອອນລາຍ ເພື່ອຊອກຮູ້ ກ່ຽວກັບສາຍພົວພັນມິດຕະພາບ ແລະ ການຮ່ວມມື ລະຫວ່າງ ຫວຽດນາມ-ລາວ ເຊິ່ງໄດ້ນໍາເອົາຄວາມຮູ້ທີ່ມີຄຸນປະໂຫຍດຫຼາຍຢ່າງມາໃຫ້ແກ່ນັກຮຽນ.
ເປັນທີ່ຮູ້ກັນວ່າ ໃນໄລຍະຈະມາເຖິງ, ໂຮງຮຽນ ຈະພະຍາຍາມເພື່ອກາຍເປັນໂຮງຮຽນມິດຕະພາບສາກົນ ທີ່ມີຄຸນນະພາບສູງ, ປະກອບ ສ່ວນປະຕິບັດວຽກງານ ການເມືອງອັນສູງສົ່ງ ລະຫວ່າງສອງພັກ ແລະ ສອງລັດ ໃນການປົກປັກຮັກສາ ແລະ ເພີ່ມພູນຄູນສ້າງຄວາມສາມັກ ຄີ ຫວຽດນາມ-ລາວ ນັບມື້ນັບເລິກເຊິ່ງ, ແໜ້ນແຟ້ນ, ສົມເປັນສັນຍາລັກແຫ່ງການພົວພັນມິດຕະພາບ ຫວຽດນາມ - ລາວ.
ບົດ: ຂ່າວພາບ ຫວຽດນາມ - ພາບ: ຫວຽດເກື່ອງ - ເຕັກນິກກະຣາຟິກ: ຈາງຍູງ - ແປໂດຍ: ບິກລຽນ