ເສັ້ນລ້ອນ ມັນສາຄູ ບັກກ້ານ
ຍ້ອນດິນຟ້າອາກາດທີ່ເອື້ອອໍານວຍ, ແນວພັນ ມັນສາຄູ (ວັດຖຸດິບໃນການເຮັດເສັ້ນລ້ອນ) ທີ່ປູກຢູ່ແຂວງ ບັກກ້ານ ເຕີບໂຕ ໄດ້ດີ, ທັງໄດ້ຜັນຂະຫຍາຍຈາກນະໂຍບາຍບຸລິມະສິດ ຂອງແຂວງ ໃນການຊ່ວຍພັດທະນາ, ຜະລິດຕະພັນເສັ້ນລ້ອນ ມັນສາຄູ ບັກກ້ານ ໄດ້ຮັບການຈຳໜ່າຍຢ່າງກວ້າງຂວາງ ຢູ່ຕະຫຼາດພາຍໃນ ແລະ ສົ່ງອອກໄປຍັງ ເອີຣົບ.
ຜູ້ທີ່ມີສ່ວນຮ່ວມ ຜູ້ທໍາອິດ ໃນການນຳເອົາການປູກ ແລະ ປຸງແຕ່ງເສັ້ນ ລ້ອນ ມັນສາຄູ ຢູ່ແຂວງ ບັກກ້ານ ແມ່ນອະດີດລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ຫງວຽນຊວນເກື່ອງ ເມື່ອເພິ່ນດຳ ລົງຕຳແໜ່ງເປັນເລຂາຄະນະພັກແຂວງ ບັກກ້ານ. ໃນເວລານັ້ນ, ທ່ານ ຫງວຽນຊວນເກື່ອງ ເຫັນໄດ້ຄວາມສາມາດບົ່ມຊ້ອນ ຂອງ ເສັ້ນລ້ອນ ມັນສາຄູ ບັກກ້ານ ແລະ ຊີ້ນຳທຸກຂັ້ນ, ສາຂາ ແລະ ທ້ອງຖິ່ນປະຕິບັດຢ່າງຕັ້ງໜ້າ. ນັບແຕ່ນັ້ນມາ, ການປູກ ແລະ ປຸງແຕ່ງ ເສັ້ນລ້ອນ ມັນສາຄູ ຢູ່ແຂວງ ບັກກ້ານ ໄດ້ມີບາດກ້າວທຳອິດໃນການຜະລິດເປັນສິນ ຄ້າແບບຍືນຍົງ. ໄລຍະ 2015 - 2020, ແຂວງ ບັກກ້ານ ໄດ້ມີເນື້ອທີ່ປູກມັນສາຄູ ຢ່າງໝັ້ນຄົງ ໂດຍມີເປົ້າໝາຍສ້າງຕ່ອງໂສ້ມູນຄ່າຜະລິດ ຕະພັນເສັ້ນລ້ອນ ຈາກ ມັນສາຄູ ຢ່າງຄົບວົງຈອນ, ບໍ່ປູກ ເພື່ອຂາຍຫົວມັນສາຄູ ແລະ ແປ້ງ ໄປຍັງຕ່າງແຂວງ.
ຢູ່ຕາແສງ ຟຸກລົກ (ເມືອງ ບາເບ), ມັນສາຄູ ສ່ວນຫຼາຍໄດ້ປູກ ຢູ່ 5 ໝູ່ບ້ານຄື: ນ່າມາ, ຟຽງຈີ, ເຟຍຟ້າ, ກົກມ່ວຍ, ກົກຢ້ຽນ ແລະ ພວມກາຍເປັນພືດ ທີ່ສ້າງລາຍຮັບ ທີ່ດີມາໃຫ້ແກ່ພໍ່ແມ່ປະຊາຊົນຢູ່ທີ່ນີ້.
ໃນຊຸມປີ 2017 - 2018, ລາຄາແປ້ງ ມັນສາຄູ ເພີ່ມຂຶ້ນ, ຫຼາຍຄອບຄົວ ມີລາຍຮັບແຕ່ 400 - 500 ລ້ານດົ່ງຈາກການປູກ ມັນສາຄູ ແລະ ສາມາດຊື້ດິນເພື່ອ ຍ້າຍເຮືອນ ຈາກເຂດພູດອຍ ມາຢູ່ໃຈກາງຕາແສງ.
ທ່ານປະທານຄະນະກຳມະການປະຊາຊົນ ຕາແສງ ຟຸກລົກ ໂນງວັນເຍືອກ ໃຫ້ຮູ້ວ່າ ເມື່ອທຽບໃສ່ຕົ້ນເຂົ້າ, ສາລີ, ໃນຊຸມປີມໍ່ໆ ມານີ້, ມັນສາຄູ ນຳມາເຊິ່ງປະສິດທິພາບດ້ານເສດຖະກິດ ສູງກວ່າຫຼາຍເທົ່າ ແລະ ກາຍເປັນພືດ ທີ່ເຂັ້ມແຂງຂອງຕາແສງ. ເພາະສະນັ້ນ, ໃນປີ 2022, ທົ່ວຕາແສງ ມີເນື້ອທີ່ປູກ ມັນສາຄູ 95,7 ເຮັກຕາ, ເພີ່ມຂຶ້ນ 30 ເຮັກຕາ ເມື່ອທຽບໃສ່ປີ 2021; ປັດຈຸບັນ, ທົ່ວຕາແສງ ມີ 39 ຄອບຄົວທີ່ປຸງແຕ່ງແປ້ງ ມັນສາຄູ.
ດ້ວຍທ່າແຮງ, ຄວາມໄດ້ປຽບຂອງດິນ ແລະ ເງື່ອນໄຂສະພາບອາກາດ ໃນການພັດທະນາ ມັນສາຄູ, ຄະນະກຳມະການ ປະຊາຊົນ ແຂວງ ໄດ້ເລືອກເອົາ ມັນສາຄູ ເປັນໜຶ່ງໃນບັນດາປະເພດພືດຕົ້ນຕໍ ແລະ ຜະລິດຕະພັນ ເສັ້ນລ້ອນ ມັນສາຄູ ເປັນຜະລິດຕະພັນຫຼັກ ຂອງແຂວງ. ປັດຈຸບັນ, ມັນສາຄູ ໄດ້ປູກຢູ່ 73 ຕາແສງ ໃນ 7 ເມືອງຂອງແຂວງ ບັກກ້ານ ດ້ວຍເນື້ອທີ່ 445 ເຮັກຕາ. ຄາດວ່າຮອດປີ 2025, ແຂວງ ຈະພະຍາຍາມ ຮັກສາເນື້ອທີ່ປູກມັນສາຄູໃຫ້ໝັ້ນຄົງແຕ່ 800 - 1.000 ເຮັກຕາ/ປີ, ໃຫ້ໄດ້ຜົນຜະລິດ 59.000 ໂຕນ.
ດ້ວຍເປົ້າໝາຍນັ້ນ, ແຂວງ ບັກກ້ານ ໄດ້ນຳໃຊ້ແຫຼ່ງກຳລັງ ຂອງບັນດາໂຄງການຕ່າງໆ ເພື່ອລົງທຶນ, ຊ່ວຍເຫຼືອບັນດາສະຫະກອນ, ໜ່ວຍງານຜະລິດ, ບໍລິໂພກ ເສັ້ນລ້ອນ ກວ່າ 1.000 ໂຕນ, ສ້າງລາຍຮັບນັບຮ້ອຍຕື້ດົ່ງຕໍ່ປີ. ພ້ອມກັນນັ້ນ, ແຂວງ ຍາມໃດກໍ່ເອົາໃຈໃສ່ ຊີ້ນຳການສ້າງ ເຄື່ອງໝາຍການຄ້າ, ຍົກສູງຄຸນນະພາບ, ປັບປຸງເຄື່ອງຫຸ້ມຫໍ່, ການອອກແບບ ແລະ ຊຸກຍູ້ການຄ້າ ເພື່ອໃຫ້ຜະ ລິດຕະພັນ ເສັ້ນລ້ອນ ມັນສາຄູ ບັກກ້ານ ສາມາດຢືນຢັນໄດ້ ເຄື່ອງໝາຍການຄ້າ ຢູ່ຕະຫຼາດ ນັບມື້ນັບໝັ້ນຄົງ. ຮອດປີ 2022, ແຂວງ ບັກກ້ານ ມີໂຮງງານປຸງແຕ່ງເສັ້ນລ້ອນ 50 ກວ່າແຫ່ງ, ໃນນັ້ນ ມີບັນດາໂຮງງານປຸງແຕ່ງເສັ້ນລ້ອນ ມັນສາຄູ ຄົບວົງຈອນ.
ຜ່ານການແລກປ່ຽນ ແລະ ເຮັດວຽກກັບສະຖານທູດ ຫວຽດນາມ ແລະ ສະມາຄົມຊາວ ຫວຽດນາມ ປະຈຳ ສາທາລະນະລັດ ເຊັກ, ແຂວງ ບັກກ້ານ ໄດ້ກຳແໜ້ນຄວາມຕ້ອງການ ແລະ ຄວາມສາມາດ ຕອບສະໜອງຕະຫຼາດ ເອີຣົບ. ແຂວງ ໄດ້ເຫັນດີເລືອກເອົາສະຫະກອນ ຕ່າຍຮວານ, ຕາແສງ ກົນມິນ, ເມືອງ ນາຣີ ເປັນຄູ່ຮ່ວມມືສົ່ງອອກ ເສັ້ນລ້ອນ ໄປຍັງ ເອີຣົບ ແລະ ຊ່ວຍເຫຼືອສະຫະກອນແຫ່ງນີ້ ກໍ່ສ້າງໂຮງງານປຸງແຕ່ງໃຫ້ສົມບູນແບບ. ແຂວງ ຊ່ວຍເຫຼືອ 2 ຕື້ດົ່ງ ໃຫ້ສະຫະກອນ ໃນການຈັດຊື້ເຄື່ອງຈັກ, ອຸປະກອນ, ເຮືອນອົບແຫ້ງເສັ້ນລ້ອນ... ກຳລັງປຸງແຕ່ງຂອງໂຮງງານ ໄດ້ເພີ່ມຂຶ້ນຈາກ 10 ໂຕນ/ປີ ເປັນກວ່າ 300 ໂຕນ/ປີ.
ທ່ານ ຫງວຽນທິຮວານ ຜູ້ອຳນວຍການສະຫະກອນ ເສັ້ນລ້ອນ ມັນສາຄູ ຕ່າຍຮວານ ໃຫ້ຮູ້ວ່າ: ເພື່ອສົ່ງອອກຜະລິດຕະພັນ ເສັ້ນລ້ອນ ມັນສາຄູ ໄປຍັງຕະຫຼາດ ເອີຣົບ, ສະຫະກອນ ໄດ້ໃຊ້ເວລາກວ່າ 3 ເດືອນ ເພື່ອຜ່ານການກວດກາຄຸນນະພາບ ຢ່າງເຂັ້ມງວດ. ເຖິງເດືອນ ສິງຫາ 2020, ສະຫະກອນ ໄດ້ສົ່ງອອກເສັ້ນລ້ອນ ຊຸດທຳອິດ 5,3 ໂຕນໄປຍັງ ສາທາລະນະລັດ ເຊັກ ດ້ວຍມູນຄ່າການສັ່ງຊື້ ເກືອບ 15.000 ໂດລາສະຫະລັດ. ໃນເດືອນ ພຶດສະພາ 2021, ສະຫະກອນ ໄດ້ສືບຕໍ່ສົ່ງອອກເສັ້ນລ້ອນ ອີກ 10,5 ໂຕນໄປຍັງ ສາທາລະນະລັດ ເຊັກ ດ້ວຍມູນຄ່າ ການສັ່ງຊື້ 29.000 ໂດລາສະຫະລັດ. ໃນປີ 2022, ສະຫະກອນ ຕ່າຍຮວານ ໄດ້ສົ່ງອອກເສັ້ນລ້ອນ ເກືອບ 10 ໂຕນໄປຍັງ ເອີຣົບ.ປັດຈຸບັນ, ເສັ້ນລ້ອນ ມັນສາຄູ ຂອງ ສະຫະກອນ ຕ່າຍຮວານ ແມ່ນຜະລິດຕະພັນດຽວ ຂອງແຂວງ ບັກກ້ານ ທີ່ໄດ້ຮັບການຮັບຮອງ OCOP 5 ດາວແຫ່ງຊາດ. ການທີ່ສະຫະກອນແຫ່ງໜຶ່ງ ຂອງຊາວເຜົ່າສ່ວນໜ້ອຍ ຢູ່ເຂດຫ່າງໄກສອກຫຼີກ ສາມາດສົ່ງອອກຜະລິດຕະພັນໄປຕະຫຼາດທ່ີເອົາໃຈຍາກເຊັ່ນ ເອີຣົບ ໄດ້ສ້າງ “ການຊຸກຍູ້” ອັນໃຫຍ່ຫຼວງ ໃຫ້ແກ່ການປູກ ແລະ ປຸງແຕ່ງເສັ້ນລ້ອນ ມັນສາຄູ ຂອງ ແຂວງ ບັກກ້ານ.
ປັດຈຸບັນ, ເສັ້ນລ້ອນ ມັນສາຄູ ຂອງ ສະຫະກອນ ຕ່າຍຮວານ ແມ່ນຜະລິດຕະພັນດຽວ ຂອງແຂວງ ບັກກ້ານ ທີ່ໄດ້ຮັບການຮັບຮອງ OCOP 5 ດາວແຫ່ງຊາດ. ການທີ່ສະຫະກອນແຫ່ງໜຶ່ງ ຂອງຊາວເຜົ່າສ່ວນໜ້ອຍ ຢູ່ເຂດຫ່າງໄກສອກຫຼີກ ສາມາດສົ່ງອອກຜະລິດຕະພັນໄປຕະຫຼາດທ່ີເອົາໃຈຍາກເຊັ່ນ ເອີຣົບ ໄດ້ສ້າງ “ການຊຸກຍູ້” ອັນໃຫຍ່ຫຼວງ ໃຫ້ແກ່ການປູກ ແລະ ປຸງແຕ່ງເສັ້ນລ້ອນ ມັນສາຄູ ຂອງ ແຂວງ ບັກກ້ານ.
- ບົດ ແລະ ພາບ: ອານແທ່ງດາດ - ແປໂດຍ: ຢືຟຽນ