ສ້າງປະຊາຄົມ ASEAN ທີ່ມີຄວາມເຂັ້ມແຂງດ້ວຍຕົນເອງ ແລະ ມີໄຫວພິບ
ກອງປະຊຸມລັດຖະມົນຕີການຕ່າງປະເທດASEAN ຄັ້ງທີ 56 (AMM) ຫາກໍ່ໄຂຂຶ້ນຢູ່ ອິນໂດເນເຊຍ ໄດ້ສຸມໃສ່ປຶກສາຫາລືກ່ຽວກັບຂະບວນການສ້າງປະຊາຄົມASEAN, ປະຕິບັດ ວິໄສທັດ ASEAN ກ່ຽວກັບມະຫາສະໝຸດ ອິນເດຍ - ປາຊີຟິກ, ການພົວພັນຕ່າງປະເທດ ແລະ ໂຄງສ້າງພາກພື້ນ.
ມຸ່ງສູ່ “ຄວາມເປັນໜຶ່ງດຽວ ຂອງ ASEAN: ສູນກາງແຫ່ງການເຕີບໂຕ”, AMM 56 ຢືນຢັນບົດບາດໃຈກາງ ຂອງ ASEAN ໃນທຸກຂະບວນການພາກພື້ນ, ນັບແຕ່ການເຕີບໂຕ, ພັດທະນາເສດຖະກິດ, ການປ່ຽນແປງໃໝ່ໃນການເຮັດວຽກ, ວິທີປະຕິບັດ ບັນດາຄຳຕັດສິນ ຂອງ ASEAN ໄປຈົນເຖິງວິທີແກ້ໄຂ ບັນດາບັນຫາພາກພື້ນ ແລະ ສາກົນ.
ຄາດວ່າ ASEAN ຈະກາຍເປັນສູນກາງການເຕີບໂຕ, ດຶງດູດການລົງທຶນ ແລະ ແຫຼ່ງກຳລັງ ຮັບໃຊ້ການພັດທະນາ. ASEAN ສືບຕໍ່ເປັນຈຸດທີ່ສົດໃສ ດ້ວຍການຄາດຄະເນການຂະຫຍາຍຕົວ ທາງເສດຖະກິດ ໃນປີ 2023 ຢູ່ທີ່ລະດັບ 4,7%. ເມື່ອທຽບໃສ່ຮູບພາບທົ່ວໄປຂອງເສດຖະກິດໂລກ, ASEAN ຍັງຄົງຮັກສາຈັງ ຫວະການເຕີບໂຕ ໂດຍມີສັນຍານ ທີ່ດີໃນການຊົມໃຊ້ ພາຍໃນ, ການສົ່ງອອກ ແລະ ການຟື້ນຕົວຂອງຂະແໜງບໍລິການ.
ເພື່ອບັນລຸໄດ້ຄວາມຄາດໝາຍທີ່ກ່າວມາຂ້າງເທິງ, ບັນດາລັດ ຖະມົນຕີ ໄດ້ເປັນເອກະສັນກັນວ່າ ຈະເພີ່ມທະວີຄວາມເຂັ້ມແຂງ ດ້ວຍຕົນເອງ ແລະ ການປັບຕົວຢ່າງມີໄຫວພິບ ຂອງ ASEAN ໃນທຸກໂອກາດ ແລະ ສິ່ງທ້າທາຍທີ່ເກີດຂຶ້ນໃນພາກພື້ນ. ໃນສະ ພາບແວດລ້ອມຍຸດທະສາດທີ່ຜັນແປ, ຄວາມສາມັກຄີ ແລະ ຄວາມເປັນໃຈກາງ ຂອງ ASEAN ຕ້ອງໄດ້ຮັບການຢືນຢັນຕື່ມອີກ. ASEAN ຄວນເປັນເຈົ້າການໃນການສ້າງໂຄງປະກອບພາກພື້ນທີ່ເປີດ, ໂປ່ງໃສ, ກວມລວມ ແລະ ອີງໃສ່ກົດລະບຽບ ດ້ວຍການເຂົ້າຮ່ວມຢ່າງຕັ້ງໜ້າ ແລະ ມີຄວາມຮັບຜິດຊອບຂອງຄູ່ຮ່ວມມື ເພື່ອສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງຢູ່ພາກພື້ນ.
ການຮ່ວມມືໃນບັນດາຂົງເຂດຄື: ສະຖຽນລະພາບດ້ານການເງິນ, ສ້າງຄວາມເຂັ້ມແຂງດ້ວຍຕົນເອງ ດ້ານການສະໜອງ, ການຮັກ ສາສຸຂະພາບດີຈີຕອນ, ຄວາມໝັ້ນຄົງດ້ານພະລັງງານ, ຄວາມໝັ້ນຄົງ ດ້ານສະບຽງອາຫານ ແລະ ອື່ນໆ ສືບຕໍ່ຊຸກຍູ້ບັນດາຊ່ອງທາງຂະແໜງສະເພາະ ຂອງ ASEAN, ປະກອບສ່ວນຍົກສູງຄວາມສາມາດ ແລະ ຄວາມພ້ອມຂອງ ASEAN ເພື່ອຕອບສະ ໜອງ ແລະ ຮັບມືກັບຄວາມທ້າທາຍໃນປັດຈຸບັນ ແລະ ອະນາຄົດ.
ນອກຈາກນັ້ນ, AMM ຄັ້ງທີ 56 ໄດ້ຕົກລົງໃນການສົ່ງເສີມ ການ ດໍາເນີນການ ຕາມວິໄສທັດ ASEAN ກ່ຽວກັບ ມະຫາສະໝຸດ ອິນເດຍ - ປາຊີຟິກ ຢ່າງມີປະສິດທິຜົນ, ສົ່ງເສີມບັນດາຄູ່ຮ່ວມມື ຢ່າງເປັນຮູບປະທໍາ ແລະ ໃນທາງປະຕິບັດຕົວຈິງ ກັບ ASEAN ໃນບັນດາຂົງເຂດ ບູລິມະສິດ ກ່ຽວກັບການເຊື່ອມຕໍ່, ການຮ່ວມ ມືທາງທະເລ, ການພັດທະນາແບບ ຍືນຍົງ ແລະ ເສດຖະກິດ, ສະໜັບສະໜູນ ASEAN ໃນການສ້າງປະຊາຄົມ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງ ຂອງພາກພື້ນ.
ທ່ານລັດຖະມົນຕີການຕ່າງປະເທດ ຫວຽດນາມ ບຸ່ຍແທງເຊີນ ໄດ້ແບ່ງປັນ ທັດສະນະລວມ ກ່ຽວກັບໂລກທີ່ນັບມື້ນັບສັບສົນ ແລະ ບໍ່ສາມາດຄາດຄະເນໄດ້, ໂດຍເນັ້ນໜັກວ່າ ASEAN ບໍ່ ສາມາດຫຼີລ້ຽງ ການປະເຊີນໜ້າ ກັບບັນດາສິ່ງທ້າທາຍທັງພາຍໃນ ແລະ ພາຍນອກ. ເຖິງຢ່າງໃດກໍຕາມ, ດ້ວຍການຊຸບຫຼໍ່ ໃນຕະຫຼອດ 56 ປີ ຜ່ານມາ, ASEAN ມີພື້ນຖານພຽງພໍ ທີ່ຈະພາກ ພູມໃຈ ແລະ ເຊື່ອໝັ້ນຕໍ່ປະຊາຄົມ ASEAN ທີ່ເຂັ້ມແຂງ ແລະ ສາມັກຄີ.
ທ່ານເອກອັກຄະລັດຖະທູດ ຫວູໂຮ່ - ຫົວໜ້າ SOM ASEANຫວຽດນາມ ໃຫ້ຮູ້ວ່າ ທະເລຕາເວັນອອກ ໄດ້ກາຍເປັນຫົວຂໍ້ສົນທະນາລວມຂອງບັນດາປະເທດເຂົ້າຮ່ວມ. ທີ່ AMM-56, ບັນດາປະເທດໄດ້ຮັບຮູ້ຄວາມຄືບໜ້າໃນການຜັນຂະຫຍາຍປະມວນກົດລະບຽບ ການປະພຶດຕໍ່ຂອງຝ່າຍຕ່າງໆ ຢູ່ທະເລຕາເວັນອອກ (COC) ແລະ ລ້ວນແຕ່ຖືວ່າ ນີ້ແມ່ນບັນດາບາດກ້າວພັດທະນາ ແລະ ແມ່ນສັນຍານທີ່ດີ, ຜ່ານນັ້ນໄດ້ຮ່ວມກັນສ້າງຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ຊຸກຍູ້ການພົວພັນທາງການທູດ ເພື່ອໄກ່ເກ່ຍ ທຸກການພົວພັນ ແລະ ຜົນປະໂຫຍດ, ຮັບປະກັນສັນຕິພາບ ແລະ ສະຖຽນລະພາບ ຢູ່ພາກພື້ນ.
ເພື່ອໃຫ້ ASEAN ກາຍເປັນຈຸດສຸມ ແລະ ເປັນກຳລັງຊຸກຍູ້ການເຕີບໂຕຂອງພາກພື້ນ ແລະ ໃນທົ່ວໂລກ, ຕາມການກຳນົດທິດ ຂອງປະທານ ASEAN ໝູນວຽນ ປີ 2023 ອິນໂດເນເຊຍ ແລ້ວ, ASEAN ໃຫ້ບຸລິມະສິດ ການເຊື່ອມໂຍງເສດຖະກິດ, ການຮ່ວມ ມືຮອບດ້ານ ແລະ ຜັນຂະຫຍາຍສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ຢ່າງມີປະສິດທິຜົນ, ຮັບປະກັນຄວາມໝັ້ນຄົງດ້ານສະບຽງອາຫານ, ເປັນເຈົ້າຕົນເອງ ດ້ານພະ ລັງງານ ແລະ ສະຖຽນລະພາບ ດ້ານການເງິນ.
ບົດ: VNP - ພາບ: VNA - ແປໂດຍ: ຢືຟຽນ