ສຳຫຼວດ ຫໍພິພິທະພັນ ສິລະປະ ວັດທະນະທຳ ອິນດູຈີນ
ປັດຈຸບັນ, ຫໍພິພິທະພັນ ສິລະປະ ວັດທະນະທຳ ອິນດູຈີນ (ນະ ຄອນ ຫາຍຟ່ອງ) ກຳລັງເກັບຮັກສາ ແລະ ວາງສະແດງ ວັດຖຸພັນກວ່າ 15.000 ສິ້ນ ທີ່ມີອາຍຸ ຫຼາຍຮ້ອຍປີ ເຖິງຫຼາຍພັນປີ. ນີ້ແມ່ນຫໍພິພິທະພັນ ເອກະຊົນ ທີ່ຖືກສ້າງຂຶ້ນ ຈາກຄວາມຫຼົງໄຫຼໃນດ້ານ ປະຫວັດສາດ ແລະ ຄວາມຮັກມັກ ສິລະປະ ຂອງ ນັກທຸລະກິດ ກາວວັນຕ໋ວນ.
ເຖິງວ່າວຽກຕົ້ນຕໍ ແມ່ນເຮັດທຸລະກິດ, ແຕ່ນັກທຸລະກິດ ກາວວັນ ຕ໋ວນ (ອາຍຸ 62 ປີ ຢູ່ນະຄອນ ຫາຍຟ່ອງ) ຍັງມີຄວາມຫຼົງໄຫຼຢ່າງແຮງກ້າ ກັບສິລະປະ ວັດທະນະທຳ. ທ່ານ ເລີ່ມເກັບກຳວັດຖຸບູຮານ ແລະ ຜົນການປະດິດແຕ່ງ ລະບາຍສີ, ແກະສະຫຼັກ ຕັ້ງແຕ່ອາຍຸ 20 ປີ. ໃນເບື້ອງຕົ້ນ, ມັນພຽງແຕ່ ເຄື່ອງຂອງ ແລກປ່ຽນ ລະຫວ່າງ ຜູ້ທີ່ມີຄວາມມັກດຽວກັນ ຫຼື ຊອກຊື້ຈາກ ຜູ້ເປັນເຈົ້າຂອງ ຊື້ຂາຍຂອງເກົ່າ. ຕໍ່ມາ, ເມື່ອການເຮັດທຸລະກິດ ພັດທະນາຂຶ້ນ, ທ່ານ ຈຶ່ງມີໂອກາດ ທີ່ຈະເກັບກໍາຫຼາຍກວ່າ ຈາກການພົວພັນ ໃກ້ຊິດ ກັບນັກຈິດຕະກອນ, ນັກສະສົມຫຼາຍຄົນ. ຕັ້ງແຕ່ຕົ້ນ, ທ່ານ ຕ໋ວນ ໄດ້ກຳນົດທັດສະນະ ສະສົມ ຂອງຕົນຢ່າງຈະແຈ້ງວ່່າ ແມ່ນຄວາມລະອຽດ ກ່ຽວກັບ ຕົ້ນກຳເນີດ, ຊີວະປະຫວັດຫຍໍ້ ແລະ ເລື່ອງລາວ ທີ່ກ່ຽວພັນ ເຖິງວັດຖຸບູຮານ ນັ້ນໆ.
ມາຮອດປັດຈຸບັນ, ນອກຈາກຮູບແຕ້ມ 300 ແຜ່ນ, ໃນນັ້ນມີບັນ ດາຮູບແຕ້ມ ຂອງ ນັກຈິດຕະກອນ ສິລະປະ ອິນດູຈີນ ທີ່ມີຊື່ສຽງແລ້ວ, ໃນຊຸດສະສົມຂອງທ່ານ ກາວວັນຕ໋ວນ ຍັງມີວັດຖຸພັນ ເຖິງ 15.000 ສິ້ນ, ມີວັດຖຸບູຮານ ທີ່ຫາຍາກ ປະມານ 2.000 ສິ້ນ. ນີ້ແມ່ນໝາກຜົນຂອງການສະສົມ ໃນຕະຫຼອດ ຊ່ວງເວລາຫຼາຍສິບປີ ທີ່ເພິ່ນໄດ້ເດີນທາງໄປທົ່ວປະເທດ ເພື່ອຊອກຫາວັດຖຸບູຮານ ແລະ ເປັນພື້ນຖານ ໃນການສ້າງ ຫໍພິພິທະພັນ ສິລະປະ ວັດທະ ນະທຳ ອິນດູຈີນ ກວ້າງກວ່າ 1.000 ມ2 ໃນສວນ ພື້ນທ່ີກວ້າງກວ່າ 1,3 ເຮັກຕາ.
ນັບຕັ້ງແຕ່ເລີ່ມຫຼົງຮັກ ວັດຖຸບູຮານ, ທ່ານ ຕ໋ວນ ຈິ່ງໄດ້ເກີດ ແນວຄິດສ້າງຫໍພິພິທະພັນ, ຈົນເຖິງຊຸມປີມໍ່ໆ ມານີ້ ແນວຄວາມຄິດນັ້ນຈຶ່ງໄດ້ກາຍເປັນຈິງ. ຍ່າງຜ່ານຫ້ອງຕ່າງໆ ທີ່ໄດ້ຮັບການ ວາງສະແດງ ຕາມຫົວເລື່ອງຂອງຫໍພິພິທະພັນ, ພວກເຮົາຈຶ່ງສາມາດຮູ້ສຶກໄດ້ເຖິງ ຄວາມພະຍາຍາມຂອງທ່ານ ກາວວັນ ຕ໋ວນ. ລະບົບແສງໄຟ ພາຍໃນພື້ນທີ່ວາງສະແດງ ໄດ້ຖືກຈັດລຽງ ຢ່າງພິຖີພິຖັນ, ເຮັດໃຫ້ບັນດາຜົນງານ ຮູບແຕ້ມ, ຄວັດສະຫຼັກ ແລະ ວັດຖຸບູຮານ ປາກົດຂຶ້ນ ເປັນປະກາຍ ແລະ ລະອຽດອ່ອນ. ໃນຂະບວນການສ້າງສຳເລັດຫໍພິພິທະພັນ, ທ່ານ ຕ໋ວນ ຕ້ອງໄດ້ທາບທາມຄວາມເຫັນ ຂອງ ຜູ້ຊ່ຽວຊານຫຼາຍຄົນ, ນັບແຕ່ການນຳໃຊ້ແສງສະຫວ່າງ, ການຈັດວາງວັດຖຸບູຮານ ແຕ່ໄລຍະເວລາ ຫຼື ພື້ນທີ່ ແລະ ການເຊື່ອມຕໍ່ ຂອງບັນດາວັດຖຸບູຮານ ໃນເວລາຈັດວາງ…
ຕາມການອະທິບາຍຂອງທ່ານ ຕ໋ວນ, ຊຸດສະສົມເຄື່ອງປັ້ນດິນເຜົາ ແຕ່ສະໄໝ ດົງເຊີນ ເຖິງສະຕະວັດທີ XX ຖືກຈັດວາງຕາມເວລາ. ໃນຂະນະດຽວກັນ, ບັນດາວັດຖຸພັນ ທີ່ເປັນເຄື່ອງບູຊາ, ຮູບປັ້ນບູຮານ ໄດ້ຖືກຈັດວາງຕາມພື້ນທີ່.
ຫໍພິພິທະພັນ ສິລະປະ ວັດທະນະທຳ ອິນດູຈີນ ໄດ້ຮັບອະນຸຍາດ ເຄື່ອນໄຫວ ດ້ວຍຮູບການຫໍພິພິທະພັນ ນອກລັດ ຈາກຄະນະກຳ ມະການ ປະຊາຊົນ ນະຄອນ ຫາຍຟ່ອງ ພາຍໃຕ້ການຄຸ້ມຄອງ ຂອງພະແນກ ວັດທະນະທຳ ແລະ ກິລາ ນະຄອນ ຫາຍຟ່ອງ ແລະ ອຳນາດການປົກຄອງ ທ້ອງຖິ່ນ. ປັດຈຸບັນ, ຫໍພິພິທະພັນໄດ້ເປີດ ໃຫ້ນັກທ່ອງທ່ຽວ ເຂົ້າຊົມໂດຍບໍ່ເສຍຄ່າ ແລະ ຫວັງວ່າຈະກາຍເປັນຈຸດສົນໃຈສຳລັບນັກທ່ອງທ່ຽວ ໃນການຊອກຮູ້ ສິລະປະ ວັດທະນະທຳ ອິນດູຈີນ.
ບົດ: ກົງດາດ, ແທງຢາງ - ແປໂດຍ: ບິກລຽນ