ລອງອານ ຊຸກຍູ້ການກໍ່ສ້າງຊົນນະບົດໃໝ່
ຈົນເຖິງຂະນະນີ້, ຂະບວນການປະຕິບັດໂຄງການເປົ້າໝາຍແຫ່ງຊາດ ກ່ຽວກັບການກໍ່ສ້າງຊົນນະບົດໃໝ່ ໄດ້ຊ່ວຍໃຫ້ແຂວງ ລອງອານ ໄດ້ຮັບຜົນດີ, ພິເສດແມ່ນການປັບປຸງພື້ນ ຖານໂຄງລ່າງ ແລະ ກະສິກຳ ຊົນນະບົດ ໃຫ້ນັບມື້ນັບພັດ ທະນາ ຢ່າງມີຄຸນນະພາບ, ປະກອບສ່ວນຢ່າງໃຫຍ່ຫຼວງເຂົ້າໃນການປັບປຸງຊີວິດການເປັນຢູ່ ແລະ ເສດຖະກິດຂອງປະຊາຊົນ, ນຳມາຄວາມເບີກບານສຳລານໃຈ ແລະ ຄວາມມີຊີວິດຊີວາ ໃໝ່ ສູ່ດິນແດນ ປະຕູສູ່ ພາກຕາເວັນຕົກສ່ຽງໃຕ້.
ພາຍຫຼັງ 10 ປີແຫ່ງການກໍ່ສ້າງຊົນນະບົດໃໝ່, “ໂສມໜ້າ” ຊົນນະບົດ ຂອງແຂວງ ລອງອານ ສ່ວນຫຼາຍແມ່ນມີຄວາມ ກວ້າງຂວາງ, ສະອາດ, ນັບແຕ່ຖະໜົນສາຍຫຼັກ ແລະ ເສັ້ນ ທາງພາຍໃນ ລ້ວນແຕ່ໄດ້ຮັບການກໍ່ສ້າງຢ່າງແໜ້ນໜາ ເພື່ອປະກອບສ່ວນສ້າງຄວາມສະດວກສະບາຍໃນຄວາມ ຕ້ອງການເດີນທາງໄປມາ ແລະ ການຂົນສົ່ງສິນຄ້າ ກະສິກຳຂອງ ປະຊາຊົນ. ຖະໜົນຫົນທາງໃນຕາແສງ ໄດ້ຮັບການ ຍົກລະດັບ ແລະ ຂະຫຍາຍ, ສ້າງເງື່ອນໄຂສະດວກໃຫ້ ປະ ຊາຊົນ ໃນການເດີນທາງ, ຂົນສົ່ງ ແລະ ແລກປ່ຽນສິນຄ້າ. ໂຮງຮຽນ, ສະຖານີ, ໄຟຟ້າ, ນໍ້າສະອາດ ... ໄດ້ຮັບການລົງ ທຶນກໍ່ສ້າງຕາມມາດຕະຖານແຫ່ງຊາດ. ທ່ານ ເລມິນຕູ (ອາ ໄສຢູ່ຕາແສງ ດຶກຮວ່າຮ້າ, ເມືອງ ດຶກຮວ່າ) ກ່າວວ່າ: “ຖ້າ ວ່າ ເມື່ອຫຼາຍປີກ່ອນ, ການເດີນທາງ ຍັງຫຍຸ້ງຍາກ ຍ້ອນ ເສັ້ນທາງ ຍັງມີຂໍ້ຈຳກັດ ແລະ ລະບົບການ ຄົມມະນາຄົມ ກໍ່ບໍ່ຫຼາກຫຼາຍ, ແຕ່ປັດຈຸບັນ, ຈາກຖະໜົນສາຍຫຼັກ, ເສັ້ນ ທາງ ເຊື່ອມຕໍ່ຕາແສງ, ເສັ້ນທາງ ເຊື່ອມບ້ານ ຈົນເຖິງ ບັນ ດາເສັ້ນທາງພາຍໃນ ບ້ານ ອອກໄປຫາເສັ້ນ ທາງຫຼວງ ລ້ວນແຕ່ ໄດ້ປູຢາງ ຢ່າງແໜ້ນໜາ. ການພັດທະນາລະບົບຄົມມະນາຄົມ ພາກລັດ ແລະ ເອກະຊົນ ໄດ້ຊ່ວຍໃຫ້ປະ ຊາຊົນ ມີທາງເລືອກທີ່ເໝາະສົມກວ່າ, ເວລາເດີນທາງຈາກບ້ານໄປນະຄອນ ໂຮ່ຈີມິນ ໃຊ້ເວລາສັ້ນລົງ ແລະ ສະດວກສະບາຍ ຂຶ້ນ. ຍ້ອນແນວນັ້ນ, ຊີວິດທາງດ້ານວັດຖຸ ແລະ ຈິດໃຈຂອງປະ ຊາຊົນ ໄດ້ຮັບການປັບປຸງ ຫຼາຍ ເມື່ອທຽບໃສ່ເມື່ອກ່ອນ”.
ດ້ວຍການປະຕິບັດ ທີ່ເໝາະສົມ ແລະ ຄົບຊຸດ, ໃນໄລຍະຜ່ານມາ, ການປະຕິບັດ ຫຼາຍວິທີແກ້ໄຂ ແລະ ບົດບາດເປັນ ເຈົ້າ ຂອງ ປະຊາຊົນ ໄດ້ເສີມຂະຫຍາຍຢ່າງແທ້ຈິງ, ປະ ກອບສ່ວນເຮັດໃຫ້ການສ້າງຊົນນະບົດໃໝ່ ຂອງ ລອງອານ ກ້າວເຂົ້າສູ່ການເຄື່ອນໄຫວຢ່າງເລິກເຊິ່ງ ແລະກວ້າງຂວາງ, ດຶງດູດປະຊາຊົນຈາກທຸກຊັ້ນວັນນະເຂົ້າຮ່ວມ. ພ້ອມກັນນັ້ນ, ໂຄງການສ້າງຊົນນະບົດໃໝ່ກໍ່ເຮັດໃຫ້ຊີວິດການເປັນຢູ່ຂອງປະຊາຊົນຢູ່ເຂດຊົນນະບົດ ໃກ້ຊິດກັບຕົວເມືອງ ກວ່າ. ພິເສດ, ລອງອານ ສຸມໃສ່ຈັດຕັ້ງການຜະລິດຕາມລະບົບຄຸ້ມຄອງຄຸນຄ່າ, ຊ່ວຍປະຊາຊົນ ເລືອກເຟັ້ນ ລົງທຶນ ບັນ ດາແນວປູກ, ລ້ຽງສັດ ຕົ້ນຕໍ ເພື່ອຫຼຸດຜ່ອນຕົ້ນທຶນ, ເຊື່ອມໂຍງການຜະລິດກັບການບໍລິໂພກ, ຍົກສູງຄຸນນະພາບ ແລະ ຄຸນ ຄ່າຜະລິດຕະພັນກະເສດ ຜ່ານການນຳໃຊ້ວິທະຍາສາດ - ເຕັກນິກ ທີ່ກ້າວໜ້າ, ເຕັກໂນໂລຊີສູງໃນ ການ ຜະລິດ ແລະ ການບໍລິໂພກ ຜະລິດຕະພັນ.
ຖ້າ 5 ປີກ່ອນ, ພວກຂ້າພະເຈົ້າໄດ້ໄປຢ້ຽມຢາມຮູບແບບປູກຜັກສະອາດ - ຜັກປອດສານພິດ ຢູ່ສະຫະກອນ ກະສິກຳ ຜະລິດການຄ້າ ແລະ ການບໍລິການ ເຟືອກທິງ (ເມືອງ ເກິ່ນ ຢວກ), ສະຫະກອນ ຜັກປອດສານພິດ ເຟືອກຮວ່າ (ເມືອງ ເກິ່ນເດຶອກ) ແມ່ນສະຫະກອນ ທີ່ເຂັ້ມແຂງ, ມີຄຸນນະພາບ ໃນການຜະລິດ ແລະ ປຸງແຕ່ງຜັກ - ຫົວ - ໝາກໄມ້ ໃຫ້ມີຄວາມປອດໄພ ແລະ ຄຸນນະພາບ, ໝູນໃຊ້ວິທະຍາສາດ ເຕັກໂນໂລຊີ ໃນການປູກຝັງ ແລະ ປຸງແຕ່ງເບື້ອງຕົ້ນ, ມາຮອດປັດຈຸບັນ, ບັນດາຫົວໜ່ວຍໄດ້ເພີ່ມທະວີຄວາມສາ ມາດ ບົ່ມຊ້ອນຂອງຕົນ ພ້ອມກັບການກຳນົດທິດຂອງລັດ ໃນໄລຍະ ສ້າງຊົນນະບົດໃໝ່. ພິເສດ, ສະຫະກອນ ເຟືອກ ຮວ່າ ໄດ້ຂະຫຍາຍເນື້ອທີ່ ການຜະລິດ ແລະ ຄຸນນະພາບ ຜະລິດຕະພັນ ເນື່ອງຈາກ ປັດຈຸບັນມີ 41 ປະເພດຜັກ ແລະ ໝາກໄມ້ ໄດ້ມາດຕະຖານ VietGap, ໄດ້ຮັບການຮັບຮອງ ຈາກຄະນະຄຸ້ມຄອງ ຄວາມ ປອດໄພດ້ານສະບຽງອາຫານ ນະຄອນ ໂຮ່ຈີມິນ ແລະ ລອງອານ. ຜະລິດຕະພັນຂອງ ສະ ຫະກອນ ຕອບສະໜອງ ລະບົບຕ່ອງໂສ້ຄວາມປອດ ໄພ ດ້ານສະບຽງອາຫານ ແລະ ມີຢູ່ ໃນຮ້ານສັບພະສິນຄ້າ ແລະ ຫົວໜ່ວຍຂາຍຍ່ອຍ ຫຼາຍແຫ່ງ ໃນພາກໃຕ້. ສິ່ງດັ່ງກ່າວ ໄດ້ປະກອບສ່ວນຢ່າງໃຫຍ່ຫຼວງເຂົ້າໃນການປັບປຸງ ແລະ ເພີ່ມທະວີ ຊີວິດການເປັນຢູ່ຂອງຊາວກະສິກອນ, ສືບຕໍ່ຕິດພັນ ແລະ ຊຸກຍູ້ອາຊີບກະສິກຳ “ປູກຜັກ” ທີ່ເປັນເອກະລັກສະເພາະ ແລະ ມີຊື່ສຽງຂອງທ້ອງຖິ່ນ.
ດ້ວຍຄວາມເຫັນດີເຫັນພ້ອມຂອງການນຳ ແລະ ປະຊາຊົນ, ລອງອານ ຄາດວ່າ ຈະສືບຕໍ່ປະຕິບັດບັນດາຈຸດໝາຍ ສ້າງຊົນນະບົດໃໝ່ຢ່າງສຳເລັດຜົນ, ດ້ວຍຄວາມປາດຖະໜາຢາກປະກອບສ່ວນສຳຄັນເຂົ້າໃນການຊຸກຍູ້ ຊີວິດການເປັນ ຢູ່ຂອງ ປະຊາຊົນ ໃຫ້ນັບມື້ດີຂຶ້ນ, ໂສມໜ້າຂອງຊົນນະບົດນັບມື້ນັບໄດ້ຮັບການປັບປຸງ, ປະກອບສ່ວນເຂົ້າໃນຜົນສຳເລັດລວມຂອງໂຄງການ ສ້າງຊົນນະບົດໃໝ່ແຫ່ງຊາດ.
ປັດຈຸບັນ ທົ່ວແຂວງມີ 121/161 ຕາແສງ ບັນລຸມາດຖານຊົນນະບົດໃໝ່, (ກວມ 75,2% ຈໍານວນຕາແສງໃນແຂວງ), ບັນລຸ 85,2% ເມື່ອທຽບກັບແຜນການໄລຍະ 2021-2025; 30 ຕາແສງບັນລຸມາດຖານຊົນນະບົດໃໝ່ ທີ່ກ້າວໜ້າ, ບັນ ລຸ 52,6% ເມື່ອທຽບກັບແຜນການໄລຍະ 2021-2025. ຄາດ ວ່າ ໃນປີ 2023, ລອງອານ ຈະມີອີກ 08 ຕາແສງ ບັນລຸມາດຖານຊົນນະບົດໃໝ່, ຮອດທ້າຍປີ 2023 ຈະມີ 127/161 ຕາແສງບັນລຸມາດຖານຊົນນະບົດໃໝ່, ບັນລຸ 78,9% ຕາແສງບັນລຸມາດຖານ ແລະ ມີອີກ 12 ຕາແສງບັນລຸມາດຖານຊົນນະບົດໃໝ່ ທີ່ກ້າວໜ້າ. (ຕາມການລາຍງານຂອງຄະນະກຳມະການປະຊາຊົນແຂວງ ລອງອານ).
ບົດ: VNP/ເຊີນເຫງ້ຍ - ພາບ: ຫງວຽນລວນ - ແປໂດຍ: ຢືຟຽນ