ງານວາງສະແດງລະດູໃບໄມ້ຫຼົ່ນ ຄັ້ງທີ 1 ປີ 2025 - ຂົວຕໍ່ສິນຄ້າຫວຽດ ແລະ ສາກົນ ໃນຍຸກແຫ່ງການຂະຫຍາຍຕົວຂອງຊາດ
ດ້ວຍຫົວຂໍ້ “ການເຊື່ອມໂຍງຄົນກັບການຜະລິດ ແລະ ທຸລະກິດ”, ງານວາງສະແດງລະດູໃບໄມ້ຫຼົ່ນ ຄັ້ງທີ 1 - 2025 ໄດ້ຖືກຈັດຂຶ້ນດ້ວຍຂະໜາດໃຫຍ່ທີ່ສຸດ ເທົ່າທີ່ເຄີຍມີມາ, ເຊິ່ງໄດ້ເຕົ້າໂຮມບັນດາບໍລິສັດ ທັງພາຍໃນ ແລະ ຕ່າງປະເທດຫຼາຍພັນແຫ່ງ ພ້ອມດ້ວຍກິດຈະກຳວາງສະແດງ, ການສົ່ງເສີມການຄ້າ ແລະ ການແລກປ່ຽນວັດທະນະທຳຢ່າງຫຼວງຫຼາຍ.
ເຫດການຄັ້ງນີ້ ບໍ່ພຽງແຕ່ປະກອບສ່ວນສຳຄັນ ໃນການຫັນເປັນຈິງນະໂຍບາຍໃຫຍ່ ຂອງລັດຖະບານ ກ່ຽວກັບການຊຸກຍູ້ການຄ້າພາຍໃນ ແລະ ການໂຄສະນາເຜີຍແຜ່ຍີ່ຫໍ້ລະດັບຊາດ, ແຕ່ຍັງເປັນການເປີດເວທີການຄ້າສາກົນ ທີ່ຄຶກຄື້ນ, ເຊິ່ງປະກອບສ່ວນເຊື່ອມຕໍ່ສິນຄ້າຫວຽດກັບຕະຫຼາດທົ່ວໂລກ.
ທີ່ເຂດວາງສະແດງເຕັກໂນໂລຊີ, ທ່ານ ປອ ຫວູ ຫງອກ ເຟືອງ, ປະທານສະພາວິທະຍາສາດ ແລະ ເຕັກໂນໂລຊີ, ບໍລິສັດ ຮຸ້ນສ່ວນກຸ່ມຊັບພະຍາກອນມະນຸດ ເຕັກໂນໂລຊີສູງ ແລະ ຫຸ່ນຍົນອັດສະລິຍະ VTG, ໄດ້ນຳເອົາສີສັນໃໝ່ ດ້ວຍຫຸ່ນຍົນຮູບຊົງຄົນ ທີ່ຄົ້ນຄວ້າ ແລະ ພັດທະນາໂດຍວິສະວະກອນ ຫວຽດນາມ. ທ່ານ ເຟືອງ ໄດ້ແບ່ງປັນວ່າ: “ພວກເຮົາຕ້ອງການແນະນຳຜະລິດຕະພັນຫຸ່ນຍົນ ຫວຽດນາມໃຫ້ລູກຄ້າສາກົນຈຳນວນຫຼວງຫຼາຍ, ພ້ອມທັງຊອກຫາຄູ່ຮ່ວມງານເພື່ອພັດທະນາເຕັກໂນໂລຊີພາຍໃນປະເທດໄປພ້ອມກັນ”.
ຈາກທົ່ວສາມພາກຂອງປະເທດ, ຫຼາຍຮ້ອຍບໍລິສັດ, ສະຫະກອນ ແລະ ຊ່າງຫັດຖະກຳ ໄດ້ມາເຕົ້າໂຮມ, ນຳເອົາຈຸດເດັ່ນຂອງການອອກແຮງງານ, ຄວາມຄິດສ້າງສັນ ແລະ ຄວາມພາກພູມໃຈ ຂອງຊາດ ຫວຽດນາມ, ພ້ອມທັງເຜີຍແຜ່ຈິດໃຈ “ຄົນ ຫວຽດນາມ ຄວນໃຫ້ຄວາມສຳຄັນໃນການຊົມໃຊ້ສິນຄ້າ ຫວຽດນາມ”. ບັນດາຮ້ານວາງສະແດງ ໄດ້ຖືກອອກແບບ ຢ່າງທັນສະໄໝ ແລະ ສ້າງສັນ, ແນະນຳເຕັກໂນໂລຊີ, ຜະລິດຕະພັນ ແລະ ວິທີການແກ້ຫຼ້າສຸດ, ປະກອບສ່ວນ ຢັ້ງຢືນ ຖານະຂອງສິນຄ້າ ຫວຽດນາມ ໃນລະບົບຕ່ອງໂສ້ ການສະໜອງທົ່ວໂລກ.
ທີ່ເຂດຮ້ານວາງສະແດງ OCOP, ສະຫະກອນ ເຄື່ອງໜັງ ຫາຍເຊືອງ ໄດ້ດຶງດູດນັກທ່ອງທ່ຽວ ດ້ວຍເກີບໜັງຫັດຖະກຳ ທີ່ໄດ້ຮັບການຢັ້ງຢືນ OCOP 3 ດາວ, ເຊິ່ງຜະລິດດ້ວຍມືຢ່າງສົມບູນ ຜ່ານ 17 ຂັ້ນຕອນ ທີ່ປານີດ ດ້ວຍໜັງງົວທຳມະຊາດ. ໜຶ່ງໃນເກີບ ທີ່ໂດດເດັ່ນຄືຮູບແບບທີ່ຖືກຟື້ນຟູ ຕາມການອອກແບບຂອງ ຝຣັ່ງເມື່ອ 100 ປີກ່ອນ, ເຊິ່ງປັດຈຸບັນທົ່ວປະເທດມີຊ່າງຫັດຖະກຳທີ່ສາມາດເຮັດໄດ້ພຽງ 10 ຄົນເທົ່ານັ້ນ. ທ່ານ ຫງວຽນວ໋ຽດຫວໍ ຮອງປະທານປະຈຳການ ທັງເປັນເລຂາທິການໃຫຍ່ ສະມາຄົມ ເຄື່ອງໜັງ ນະຄອນ ຫາຍເຟືອງ, ທັງເປັນປະທານສະຫະກອນເຄື່ອງໜັງ ຫາຍເຊືອງ ໄດ້ກ່າວວ່າ: “ພວກເຮົາຫວັງວ່າຄົນ ຫວຽດນາມຈະໃຫ້ບຸລິມະນິດໃນການຊົມໃຊ້ສິນຄ້າ ຫວຽດນາມ. ເກີບທີ່ງາມຈະນຳພາຄົນໄປສູ່ບ່ອນທີ່ດີທີ່ສຸດ.”
ຈຸດເດັ່ນທີ່ສຸດຂອງງານວາງສະແດງປີນີ້ ຄືເຂດຮ້ານວາງສະແດງສາກົນ, ເຊິ່ງໄດ້ເຕົ້າໂຮມບໍລິສັດຫຼາຍຮ້ອຍແຫ່ງ ຈາກ 20 ປະເທດ ແລະ ເຂດແຄວ້ນເຊັ່ນ: ສປ ຈີນ, ຍີ່ປຸ່ນ, ກຳປູເຈຍ, ສ ອາເມຣິກາ, ນິວຊີແລນ, ອິນເດຍ, ອີຣານ, ອົດສະຕຣາລີ, ແບນຊິກ, ສິງກະໂປ, ລາວ... ແຕ່ລະຮ້ານວາງສະແດງ ບໍ່ພຽງແຕ່ແນະນຳຜະລິດຕະພັນພິເສດເທົ່ານັ້ນ, ແຕ່ຍັງສະແດງໃຫ້ເຫັນ ວັດທະນະທຳ ການບໍລິໂພກ ແລະ ເອກະລັກສະເພາະຂອງແຕ່ລະປະເທດ, ປະກອບສ່ວນ ສ້າງຮູບພາບຫຼາຍສີສັນ ຂອງການຮ່ວມມື ແລະ ການເຊື່ອມໂຍງທົ່ວໂລກ.
ງານວາງສະແດງລະດູໃບໄມ້ຫຼົ່ນ 2025 ໂດຍ ກະຊວງອຸດສາຫະກຳ ແລະ ການຄ້າ ເປັນເຈົ້າພາບຈັດຕັ້ງ, ປະສານສົມທົບ ກັບບັນດາກະຊວງ, ຂະແໜງການ, ທ້ອງຖິ່ນ ແລະ ກຸ່ມບໍລິສັດ Vingroup. ດ້ວຍພື້ນທີ່ລວມກວ່າ 130.000 ມ2 ດ້້ວຍ 5 ເຂດຫົວຂໍ້, ຮ້ານວາງສະແດງເກືອບ 3.000 ຮ້ານ, ເຂດວັດທະນະທຳ - ອາຫານ ພ້ອມດ້ວຍໂຄງການດົນຕີ, ສິລະປະ ແລະ ປະສົບການວັດທະນະທຳພິເສດ.
ດ້ວຍການເຂົ້າຮ່ວມຂອງ 34 ແຂວງ, ນະຄອນ, ກວ່າ 2.500 ອົງການຈັດຕັ້ງ ແລະ ບໍລິສັດທັງພາຍໃນ ແລະ ຕ່າງປະເທດ, ງານວາງສະແດງລະດູໃບໄມ້ຫຼົ່ນ 2025 ແມ່ນຖືກຄາດຫວັງວ່າ ຈະກາຍເປັນສັນຍາລັກ ໃໝ່ ຂອງຈິດໃຈການເຊື່ອມໂຍງ ແລະ ຄວາມປາຖະໜາ ທີ່ຈະກ້າວອອກສູ່ໂລກຂອງສິນຄ້າ ຫວຽດ.
ທ່ານ Kenneth Leong, ຜູ້ອຳນວຍການ ກອງທຶນ ການລົງທຶນ Taiki Capital New Zealand, ໄດ້ແບ່ງປັນວ່າ: “ພວກເຮົາໄດ້ມາຮ່ວມງານວາງສະແດງ ລະດູໃບໄມ້ຫຼົ່ນຄັ້ງນີ້ ເພື່ອຊອກຫາໂອກາດ ເປີດການພົວພັນທາງດ້ານການຄ້າ ແລະ ການຮ່ວມມືໄລຍະຍາວຢູ່ ຫວຽດນາມ - ເປັນຕະຫຼາດທີ່ຂະຫຍັນຂັນເຄື່ອນ ແລະ ອຸດົມສົມບຸນທ່າແຮງບົ່ມຊ້ອນ”.
ທ່າມກາງບັນຍາກາດ ທີ່ເຕັມໄປດ້ວຍ ສີສັນ ອັນທັນສະໄໝ, ຮ້ານວາງສະແດງສິລະປະ, ແຟຊັ່ນ ແລະ ສິລະປະຫັດຖະກຳ ບໍ່ພຽງແຕ່ແນະນຳຜະລິດຕະພັນ ທີ່ສ້າງສັນເທົ່ານັ້ນ, ແຕ່ຍັງປຸກລະດົມ ຄວາມພາກພູມໃຈ ກ່ຽວກັບສີສັນວັດທະນະທຳ ແຫ່ງຊາດ, ຍົກຍ້ອງ ສີມື ທີ່ຊຳນານ ແລະ ປັນຍາສ້າງສັນຂອງຊ່າງຫັດຖະກຳ ຫວຽດນາມ.
ຕະຫຼອດໄລຍະເວລາແຕ່ວັນທີ 25 ຕຸລາ ຫາ ວັນທີ 4 ພະຈິກ, ຫຼາຍໂຄງການສິລະປະທີ່ເປັນເອກະລັກ ແລະ ການສະແດງແຟຊັ່ນໄດ້ຖືກຈັດຂຶ້ນ, ເຊິ່ງເຮັດໃຫ້ປະຊາຊົນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດມີໂອກາດໄດ້ຊື່ນຊົມຄວາມງາມ ອັນອຸດົມສົມບູນຂອງວັດທະນະທຳ ຫວຽດນາມຢ່າງຄົບຖ້ວນ. ທັງໝົດນີ້ ໄດ້ປະສານກັນ, ສ້າງເປັນພື້ນທີ່ທີ່ມີຊີວິດຊີວາ ແລະ ສົດໃສ ບ່ອນທີ່ໄດ້ໂຄສະນາເຜີຍແຜ່ຈຸດເດັ່ນຂອງວັດທະນະທຳ ຫວຽດນາມ, ແລະ ຍັງເປີດປະສົບການການຊື້ເຄື່ອງ, ການບໍລິໂພກ ແລະ ການຄົ້ນພົບຜະລິດຕະພັນ ວັດທະນະທຳ ແລະ ການທ່ອງທ່ຽວທີ່ດຶງດູດໃຈອີກດ້ວຍ.
ໃນການຢ້ຽມຢາມງານວາງສະແດງລະດູໃບໄມ້ຫຼົ່ນ ຄັ້ງທີ 1 – 2025, ທ່ານນາງ ຫງວຽນທິແຮ້ງ ໄດ້ໃຫ້ຮູ້ວ່າ: “ບັນດາຮ້ານວາງສະແດງໄດ້ຖືກຈັດວາງຢ່າງມີລະບົບ, ສວຍງາມ ແລະ ງ່າຍຕໍ່ການທ່ຽວຊົມ ແລະ ຄົ້ນຄວ້າ. ຂ້າພະເຈົ້າຫວັງວ່າຈະມີງານວາງສະແດງແບບນີ້ ຈັດຂຶ້ນເລື້ອຍໆ ເພື່ອໃຫ້ປະຊາຊົນມີໂອກາດຫຼາຍຂຶ້ນ ໃນການສຳຜັດ ກັບຜະລິດຕະພັນ ຫວຽດນາມ ແລະ ຊື້ເຄື່ອງໄດ້ຢ່າງສະດວກສະບາຍ”.
ບົດ: ເງິນຮ່າ - ພາບ: ຫວຽດເກື່ອງ/VNP - ແປໂດຍ: ບິກລຽນ