ໂດຍອາໄສ ຄວາມມານະພະຍາຍາມ ອະນຸລັກຮັກສາ ວັດທະນະທຳ ເມື່ອງ, ໃນປີ 2020, ນັກຈິດຕະກອນ ຫວູດຶກຮ໋ຽວ ໄດ້ຮັບລາງວັນ Jeonju International Award, ໂດຍນະຄອນ Jeonju (ສ ເກົາຫຼີ) ເປັນຜູ້ອຸປະຖຳ ເພື່ອສະໜັບສະໜູນ ແລະ ຊຸກຍູ້ ການເຄື່ອນໄຫວ ໂຄສະນາ ເຜີຍແຜ່ ແລະ ອະນຸລັກຮັກສາ ມໍລະດົກວັດທະນະທຳ ທີ່ເປັນນາມມະທຳ ສະຫງວນໃຫ້ທຸກເປົ້າໝາຍໃນທົ່ວໂລກ. ລາງວັນດັ່ງ ກ່າວ ແມ່ນການຮັບຮູ້ ຄວາມມານະພະຍາຍາມ ຢ່າງບໍ່ຢຸດຢັ້ງ ຂອງນັກສິລະປິນ ຫວຽດນາມຄົນໜຶ່ງ ທີ່ໄດ້ ຕາມຫາຈົນຈົບ ຄວາມມຸ່ງມາດປາດຖະໜາ ຢາກ ປົກປັກຮັກສາ ວັດທະນະທຳ ເຜົ່າ ເມື່ອງ.

ອະນຸລັກຮັກສາ ແລະ ເສີມຂະຫຍາຍ ຄຸນຄ່າ ວັດທະນະທຳເຜົ່າ ເມື່ອງ

ປັດຈຸບັນ, ຍ້ອນຜົນກະທົບຂອງ ວັນເວລາ, ຊີວິດການເປັນຢູ່, ຄຸນຄ່າ ວັດທະນະທຳ ຫຼາຍຢ່າງ ຂອງ ຊາວເຜົ່າ ເມື່ອງ ພວມຢືນຢູ່ຕໍ່ໜ້າ ການສູນຫາຍ. ຕໍ່ໜ້າສະພາບການດັ່ງກ່າວ, ອຳນາດການປົກຄອງ ແຂວງ ຮ່ວາບິ່ງ ໄດ້ດຳເນີນປະຕິບັດ ຫຼາຍມາດຕະການ ເພື່ອອະນຸລັກຮັກສາ ແລະ ຜັນຂະຫຍາຍ ບັນດາຄຸນຄ່າວັດທະນະທຳ ຢ່າງມີປະສິດທິຜົນ.

ທ່ານ ຫງວຽນຟີລອງ, ເລຂາຄະນະພັກແຂວງ ຮ່ວາບິ່ງ ໃຫ້ຮູ້ວ່າ: ເຖິງວ່າແຂວງ ຍັງປະສົບກັບ ຄວາມຫຍຸ້ງຍາກ ຢ່າງຫຼວງຫຼາຍ ກ່ຽວກັບ ແຫຼ່ງກຳລັງແຮງ, ແຕ່ທາງແຂວງ ຍັງຖືວ່າ ນີ້ແມ່ນວຽກງານຮີບດ່ວນທີ່ສຸດ ເພື່ອຜັນຂະຫຍາຍ, ລະດົມແຫຼ່ງກຳລັງລົງທຶນ, ຄຸ້ມຄອງຮັກສາ, ຂຸດຄົ້ນ ແລະ ເສີມຂະຫຍາຍຄຸນຄ່າ, ມໍລະດົກ ວັດທະນະທຳພື້ນ ເມືອງ, ມໍລະດົກວັດທະນະທຳ ບູຮານຄະດີ ຕິດພັນກັບ ພັດທະນາ ການທ່ອງທ່ຽວແບບຍືນຍົງ, ປະກອບສ່ວນ ຊຸກຍູ້ ພັດທະນາ ເສດຖະ ກິດ-ສັງຄົມ, ປັບປຸງຊີວິດດ້ານວັດຖຸ ແລະ ຈິດໃຈ ຂອງ ປະຊາຊົນ; ລົງ ທຶນເຂົ້າບັນດາແຫຼ່ງກຳລັງ, ພື້ນຖານວັດຖຸ ໃຫ້ການຄົ້ນຄວ້າ, ສະສົມ, ອະນຸລັກຮັກສາ ແລະ ເສີມຂະຫຍາຍ ບັນດາມໍລະດົກ ວັດທະນະທຳ ຂອງ ຊາວເຜົ່າ ເມື່ອງ ແລະ “ພື້ນຖານ ວັດທະນະທຳ ຮ່ວາບິ່ງ”.  

ໃນຊຸມປີ ຜ່ານມາ, ຍ້ອນເຮັດວຽກງານອະນຸລັກຮັກສາ ແລະ ເສີມຂະ ຫຍາຍ ບັນດາຄຸນຄ່າວັດທະນະທຳ ເຜົ່າ ເມື່ອງ ໄດ້ດີ, ເມືອງ ລາກເຊີນ ໄດ້ສ້າງສະພາບແວດລ້ອມແຫ່ງ ວັດທະນະທຳ ອັນດີງາມ ແລະ ເຕັມໄປດ້ວຍສີສັນ ຂອງ ຊົນເຜົ່າ, ຈາກນັ້ນປະກອບສ່ວນ ສຶກສາອົບຮົມ ມູນເຊື້ອ ປະຫວັດສາດ ໃຫ້ປະຊາຊົນ. 

ທ່ານ ບຸ່ຍວັນເຢືອງ, ຮອງປະທານ ຄະນະກຳມະການ ປະຊາຊົນ ເມືອງ ລາກເຊີນ ໃຫ້ຮູ້ວ່າ: “ປັດຈຸບັນ, ຄວາມຮັບຮູ້ ຂອງປະຊາຊົນ ກ່ຽວກັບຄຸນຄ່າວັດທະນະທຳ ຂອງຊາດ ຖືກຍົກໃຫ້ສູງຂຶ້ນ, ເພາະສະ ນັ້ນ, ອຳນາດການປົກຄອງເມືອງ ຈິ່ງໄດ້ວາງຄາດໝາຍວ່າ ຮອດປີ 2025 ຈະມີ 20% ຊາວເຜົ່າ ເມື່ອງ ຮູ້ຂຽນຕົວໜັງສື ເມື່ອງ, 85% ຊາວເຜົ່າ ເມື່ອງ ຮູ້ວິທີ ນຸ່ງຖື ຊຸດພື້ນເມືອງຂອງເຜົ່າ ເມື່ອງ ແລະ ໃຊ້ເປັນປະຈຳ ໃນໂອກາດງານບຸນ, ເທດສະການ. ນັກຮຽນຂອງໂຮງຮຽນ ມັດທະຍົມຕອນຕົ້ນ ແລະ ມັດທະຍົມຕອນປາຍ ນຸ່ງຊຸດປະຈຳເຜົ່າ ເມື່ອງ ຢ່າງໜ້ອຍ 2 ວັນ/ອາທິດ. ເມືອງ ລາກເຊີນ ຈະເປີດກວ້າງ ຂອບ ຂະໜາດການຈັດຕັ້ງ ເຫດການ ວັດທະນະທຳ, ກິລາ, ບຸນວັນ ຊາດ, ລົງທຶນພັດທະນາ  ຕົວແບບ ອະນຸລັກຮັກສາ ໝູ່ບ້ານວັດທະນະ ທຳພື້ນເມືອງ ຕິດພັນກັບ ພັດທະນາການທ່ອງທ່ຽວ ຊຸມຊົນ...”.  

ພົ້ນເດ່ັນ ແມ່ນໂຮງຮຽນມັດທະຍົມຕອນປາຍ ກວ໋ຽດຖັ໋ງ ຂອງ ເມືອງ ລາກເຊີນ. ນັບແຕ່ປີ 2019 ເປັນຕົ້ນມາ, ໂຮງຮຽນ ໄດ້ສ້າງຕັ້ງສະໂມສອນ ອະນຸລັກຮັກສາ ສີສັນວັດທະນະທຳ ເຜົ່າ ເມື່ອງ, ດຳເນີນ ໃນ 6 ພາກເນື້ອໃນຕົ້ນຕໍຄື: ເພງພື້ນເມືອງ, ຊຸດອາພອນພື້ນເມືອງ, ເຄື່ອງດົນຕີ, ອາຫານການກິນ, ການລະຫຼິ້ນພື້ນເມືອງ, ວັດທະນະທຳພື້ນເມືອງ. ນອກຈາກນັ້ນ, ສະໂມສອນ ຍັງໄດ້ຈັດຕັ້ງການສອນໜັງສື ເມື່ອງ ໃຫ້ແກ່ສະມາຊິກ. ມາຮອດປັດຈຸບັນ, ສະໂມສອນ ມີສະມາຊິກກວ່າ 300 ຄົນ, ສະແດງເປັນປົກກະຕິ ໃນໂອກາດບຸນເຕັດ, ງານບຸນວັດທະນະທຳ ຂອງໂຮງຮຽນ ແລະ ທ້ອງຖິ່ນ.

ບັນດານັກຮຽນ ຢູ່ ໂຮງຮຽນມັດທະຍົມຕອນປາຍ ກວ໋ຽດຖັ໋ງ ສັງກັດ ສະໂມສອນ ວັດທະນະທຳເຜົ່າ ເມື່ອງ (ເມືອງ ລາກເຊີນ, ແຂວງ ຮ່ວາບິ່ງ) ໃນຊົ່ວໂມງຮຽນຮູ້ ກ່ຽວກັບເຮືອນຮ້ານ ຂອງ ຊາວ ເຜົ່າ ເມື່ອງ ຜ່ານບັນດາຕົວແບບໃນຫ້ອງຮຽນ. ພາບ: ຮວ່າງຮ່າ/VNP

 

ທ່ານນາງ ບຸ່ຍທິເຮືອງ, ຫົວໜ້າສະໂມສອນ ອະນຸລັກຮັກສາ ສີສັນ ວັດ ທະນະທຳ ເຜົ່າ ເມື່ອງ ຂອງ ໂຮງຮຽນ ກວ໋ຽດຖັ໋ງ ໃຫ້ຮູ້ວ່າ: “ສະໂມ ສອນ ໄດ້ຮັບການສ້າງຕັ້ງ ເພື່ອຈຸດປະສົງ ສຶກສາອົບຮົມ ຈິດສຳນຶກ ໃນການອະນຸລັກຮັກສາ ແລະ ເສີມຂະຫຍາຍ ວັດທະນະທຳ ທີ່ເປັນເອກະລັກ ຊາວເຜົ່າ ເມື່ອງ”. ຜ່ານນັ້ນ ບຳລຸງສ້າງຄວາມຮັກ ແລະ ຄວາມຮັບຜິດຊອບ ຂອງ ນັກຮຽນ ກ່ຽວກັບວຽກງານ ອະນຸລັກ ຮັກສາ ຄຸນຄ່າດັ້ງເດີມ”.

ເປັນທີ່ຮູ້ກັນວ່າ, ໃນປີ 2023, ແຂວງ ຮ່ວາບິ່ງ ໄດ້ປະກາດໃຊ້ ແຜນ ຮ່າງອະນຸລັກຮັກສາ ແລະ ເຊີດຊູ ຄຸນຄ່າວັດທະນະທຳ ຂອງ ຊາວ ເຜົ່າ ເມື່ອງ ແລະ ພື້ນຖານ “ວັດທະນະທຳ ຮ່ວາບິ່ງ ໄລຍະ 2023- 2030 ເພື່ອສືບຕໍ່ຄົ້ນຄວ້າ, ອະນຸລັກຮັກສາ, ເສີມຂະຫຍາຍ ບັນດາ ຄຸນຄ່າ ມໍລະດົກວັດທະນະທຳ ແລະ ຮີດຄອງປະເພນີອັນດີງາມ ຂອງຊາວເຜົ່າ ເມື່ອງ; ປະກອບສ່ວນໂຄສະນາ ແລະ ແນະນຳ ກ່ຽວກັບແຜ່ນດິນ ແລະ ຜູ້ຄົນແຂວງ ຮ່ວາບິ່ງ, ສ້າງບັນດາຜະລິດຕະພັນ ທ່ອງທ່ຽວ ທີ່ເປັນເອກະລັກ  ເພື່ອດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ.

 ໃນໄລຍະຈະມາເຖິງ, ແຂວງ ຮ່ວາບິ່ງ ຈະສຸມໃສ່ບູລະນະ ສ້ອມແປງ ພູມພາບ ເຂດບູຮານສະຖານ ແຫ່ງຊາດ ຖຳ້ ຊ໋ອມຈ້າຍ (ຕາແສງ ເຕິນເລິບ) ແລະ ມ໋າຍດ໋າ ໝູ່ບ້ານ ແວ່ງ (ຕາແສງ ອຽນຝູ໋) ເມືອງ ລາກເຊີນ, ແມ່ນຮ່ອງຮອຍ ປະຫວັດສາດ ທີ່ເປັນຕົວແທນ ຂອງ ພື້ນຖານວັດທະນະທຳ ຮ່ວາບິ່ງ ເພື່ອສ້າງເອກະສານສຳເນົາ ຍື່ນຕໍ່ ນາຍົກລັດ ຖະມົນຕີ ຂໍຈັດໃຫ້ເປັນ ເຂດບູຮານສະຖານແຫ່ງຊາດພິເສດ, ກ້າວໄປເຖິງຍື່ນສະເໜີໃຫ້ UNESCO ນໍາເຂົ້າບັນຊີລາຍຊື່ ມໍລະດົກ ວັດ ທະນະທຳ ຂອງ ມວນມະນຸດ.

ບົດ: ຮວ່າງຮ່າ -​ ພາບ: ຮວ່າງຮ່າ, ແທງຢາງ - ເຕັກນິກກະຣາຟິກ: ດັງຕ໋ຽນ - ແປໂດຍ: ບິກລຽນ