ການດຳລົງຊີວິດ ເທິງເກາະ ຊອງຕື໋ໄຕ
ທະຫານ ແລະ ປະຊາຊົນ ຕາແສງເກາະ ຊອງຕື໋ໄຕ (ຂຶ້ນ ກັບເມືອງເກາະ ເຈື່ອງຊາ, ແຂວງ ແຄ໋ງຮ່ວາ) ຮ່ວມກັບປະ ຊາຊົນ ໃນທົ່ວປະເທດ ພວມຕ້ອນຮັບລະດູບານໃໝ່ ດ້ວຍຄວາມຮັກ ແລະ ຄວາມຫວັງໃໝ່.
ລະດູການນີ້ ມີຄື້ນທະເລແຮງ, ກຳປັ່ນໝາຍເລກ 571 (ກອງບັນຊາການກອງທັບເຮືອເຂດ 4) ໄດ້ແລ່ນຜ່ານຄື້ນຟອງສີຂາວ ເພື່ອເດີນທາງໄປ ຢ້ຽມຢາມເກາະ ຊອງຕື໋ໄຕ. ທະ ຫານຢູ່ເທິງເກາະ ໄດ້ຮ່ວມກັນໃຊ້ເຊືອກເພື່ອດຶງກຳປັ່ນຂຶ້ນຝັ່ງ, ຂົນສິນຄ້າລົງຈາກກໍາປັ່ນເຂົ້າເກາະ. ການທັກທາຍ, ການຈັບມືຢ່າງໜັກແໜ້ນ, ສາຍຕາ ທີ່ເບີກບານມ່ວນຊື່ນ ແລະ ສຽງຫົວ ທີ່ມີຄວາມສຸກ ໄດ້ຕ້ອນຮັບແຂກແຕ່ດິນຕໍ່ ແຜ່ນ ມາຢາມເກາະ ດ້ວຍຄວາມ ຮັກແພງ ແລະ ມ່ວນຊື່ນ.
ຄວາມເບີກບານມ່ວນຊື່ນ ໃນການຕ້ອນຮັບປີໃໝ່ ຢູ່ບ່ອນ “ຫົວຄື້ນ ຍອດລົມ” ເບິ່ງຄືວ່າ ເພີ່ມຂຶ້ນຫຼາຍເທົ່າເນື່ອງໃນໂອກາດ ນີ້, ຂອງຂວັນປີໃໝ່ ແຕ່ດິນຕໍ່ແຜ່ນ ຊຶ່ງກຳປັ່ນ ໝາຍເລກ 571 ໄດ້ນໍາມາຢ້ຽມຢາມ, ມອບ ແລະ ອວຍພອນ ປີໃໝ່, ປະກອບສ່ວນເຮັດໃຫ້ ບຸນປີໃໝ່ ຂອງ ບັນດາພະນັກງານ, ນັກຮົບ ແລະ ປະຊາຊົນ ຢູ່ບັນດາເກາະຫ່າງໄກ ມີຄວາມອົບອຸ່ນ ຍິ່ງຂຶ້ນ.
ທ່ານພັນໂທ ຫງວຽນວັນເຖາະ, ຮອງຜູ້ບັນຊາການກອງພົນ ນ້ອຍ 146, ກອງທັບເຮືອເຂດ 4, ຫົວໜ້າຄະນະ ປະຕິບັດ ງານ ໃຫ້ຮູ້ວ່າ: ແຕ່ລະປີ ເມື່ອເຖິງລະດູບານໃໝ່ ແລະ ບຸນປີໃໝ່, ພັກ, ລັດ ແລະ ປະຊາຊົນ ຍາມໃດກໍ່ເອົາໃຈໃສ່ ເຖິງ ເຈື່ອງຊາ, ມີການກະກຽມທີ່ດີ ທາງດ້ານວັດຖຸ ແລະ ຈິດໃຈ ເພື່ອຈັດຕັ້ງການເຄື່ອນໄຫວ ຢ້ຽມຢາມ ແລະ ປຸກລະດົມ ກຳລັງໃຈ ບັນດາພະນັກງານ, ນັກຮົບ ແລະ ປະຊາຊົນ ຢູ່ເທິງເກາະ.
ໃນຊຸມມື້ນີ້, ບັນດາການເຄື່ອນໄຫວກະກຽມຕ້ອນຮັບປີໃໝ່ ຂອງກອງທັບ ແລະ ປະຊາຊົນ ຢູ່ທີ່ນີ້ ດຳເນີນໄປຢ່າງຟົດຟື້ນ. ບັນດາຄອບຄົວ ພວມຫຍຸ້ງຢູ່ໃນການສ້ອມແປງ, ທໍາຄວາມສະອາດ, ປະດັບປະດາເຮືອນຢູ່, ກວາດເດີ່ນບ້ານ ເພື່ອຕ້ອນຮັບບຸນເຕັດ. ບັນດາພະນັກງານ ແລະ ທະຫານ ພ້ອມກັນທໍາຄວາມສະອາດ, ປະດັບປະດາທຸງ ແລະ ດອກ ໄມ້ ຢູ່ຖະໜົນຫົນທາງ ແລະ ຢູ່ບັນດາກິດຈະກຳ ສາທາລະ ນະ ເຊັ່ນ: ວິຫານ ຊອງຕື໋ໄຕ, ຮູບປັ້ນ ຮຶງດ້າວ ເວືອງ ເຈິ່ນກວັກຕວ໋ນ, ສຳນັກງານ ຄະນະກຳມະການ ປະຊາຊົນ, ສຳ ນັກບັນຊາ, ເຮືອນຮັບແຂກ...
ຕາມປົກກະຕິ, ເນື່ອງໃນໂອກາດປີໃໝ່ ຈະມີພິທີສວນ ສະໜາມ ແລະ ເຄົາລົບທຸງ ຕ້ອນຮັບປີໃໝ່ ເຊິ່ງໄດ້ຈັດ ຂຶ້ນ ຢູ່ຫຼັກໝາຍອະທິປະໄຕ ໂດຍມີການເຂົ້າຮ່ວມຂອງກອງທັບ ແລະ ປະຊາຊົນ ຢູ່ເທິງເກາະ; ອ່ານຈົດໝາຍອວຍພອນ ປີ ໃໝ່ ຂອງ ຫົວໜ້າກອງບັນຊາການທະຫານເຂດ. ຫຼັງຈາກນັ້ນ, ທຸກຄົນໄດ້ພ້ອມກັນໄປຢ້ຽມຢາມວັດ ຊອງຕື໋ໄຕ ໃນຕົ້ນ ປີໃໝ່.
ມີການເຄື່ອນໄຫວກິລາ ແລະ ການຫຼິ້ນພື້ນເມືອງ ຢ່າງຟົດຟື້ນຄື: ບານເຕະ, ບານສົ່ງ, ຍູ້ໄມ້, ໂດດເປົາປ່ານ...ໄດ້ດຶງດູດປະຊາຊົນ ເຂົ້າຮ່ວມ ແລະ ເຊຍຢ່າງຟົດຟື້ນ. ພິເສດ, ຕາແສງເກາະ ຊອງຕື໋ໄຕ ມັກຈັດຕັ້ງການແຂ່ງຂັນຫໍ່ເຂົ້າຕົ້ມ ລະ ຫວ່າງ ບັນດາຫົວໜ່ວຍຢູ່ເທິງເກາະ. ນອກຈາກເຄື່ອງປະ ກອບທີ່ຄຸ້ນເຄີຍໃນການຫໍ່ເຂົ້າຕົ້ມເຊັ່ນ: ເຂົ້າໜຽວ, ຖົ່ວຂຽວ, ຊີ້ນໝູ, ໃບຕອງ, ໃບກ້ວຍ, ງານປະກວດຍັງໄດ້ນຳໃຊ້ໃບ ຈາ໋ (ຕົ້ນໄມ້ຊະນິດໜຶ່ງມີຫຼາຍຢູ່ເທິງເກາະ ຊອງຕື໋ໄຕ) ແລະ ໃບຫູກວາງ ສີ່ລ່ຽມ-ເປັນພືດທຳມະຊາດ ຢູ່ເທິງເກາະ, ນຳໃຊ້ເພື່ອຫໍ່ເຂົ້າຕົ້ມ. ໃນຕອນແລງ, ຈະລາຍການສະແດງ ສິ ລະປະ ແລະ ລາຍການເກັບດອກໄມ້ ປະຊາທິປະໄຕ. ຄະ ນະສິລະປະ ຕາແສງ ຊອງຕື໋ໄຕ ແລະ ນັກຮຽນໂຮງຮຽນປະ ຖົມ ຊອງຕື໋ໄຕ ໄດ້ນຳເອົາບັນດາລາຍ ການສະແດງທີ່ມີຄວາມຟົດຟື້ນ ແລະ ມີຄຸນນະພາບ ມາປະກອບສ່ວນສ້າງບັນຍາກາດເບີກບານມ່ວນຊື່ນໃນໄລຍະປີໃໝ່.
ບົດ ແລະ ພາບ: VNP/ເຊີນເຫງ້ຍ - ແປໂດຍ: ຢືຟຽນ