Pro. G Academy: ສະຖານທີ່ຝຶກອົບຮົບນັກເຕັ້ນ ຫວຽດນາມ
ສູນກິລາ ສິລະປະ Pro. G Academy ໄດ້ກາຍເປັນບ່ອນຝຶກຝົນຫຼໍ່ຫຼອມ ເຍົາວະຊົນ ໃນຫຼາຍປະເພດ ກິລາເຕັ້ນ, ຮິບຮັອບ ເພື່ອຕອບສະໜອງຄວາມມັກ ຂອງເຂົາເຈົ້າ ແລະ ຄວ້າຫຼຽນ ລາງວັນ ມາໄດ້ຫຼາຍລາຍການ ໃນການແຂ່ງຂັນ ລະດັບຊາດ ແລະ ສາກົນ.
ສ້າງຕັ້ງຂຶ້ນໃນເດືອນ ກັນຍາ 2013, ໃນເບື້ອງຕົ້ນເປັນພຽງສູນຂະ ໜາດນ້ອຍ ສໍາລັບການຝຶກເຕັ້ນ ຮິບຮັອບ, ກິລາເຕັ້ນ ສໍາລັບເດັກ ນ້ອຍອາຍຸລະຫວ່າງ 5-15 ປີເທົ່ານັ້ນ. ຄວາມສຳເລັດມາພ້ອມດ້ວຍຊື່ສຽງ ເມື່ອບັນດານັກເຕັ້ນ ທີ່ມີພອນສະຫວັນ ຈາກສູນ Pro Dance ຄ່ອຍໆ ຢືນຢັນຕົນເອງ ໃນລາຍການໂທລະພາບ ທີ່ມີຊື່ ເຊັ່ນ: ດັງກວານ, ບ໋າວຫງອກ, ຢາລິງ, ຢາບ໋າວ (Vietnam's Got Talent), ອຽນຍີ (ການເຕັ້ນ ຂອງ ເດັກ), ຢາຍື (ພອນສະຫວັນ ນ້ອຍໆ), ໝີ໋ເຈີມ, ຮ່າໝີ… ຫຼື ຊື່ຂອງ ນັກເຕັ້ນໜຸ່ມ ໃນເວທີສາກົນຄື: ແອ໋ງດຶກ, ຢາຍື, ຢາລິງ, ຢາບ໋າວ, ທືກີ່, ຕວ໋ນລິງ, ດ້າຍເຫງຍ... ເຖິງປີ 2016, ສູນ Pro Dance ໄດ້ປ່ຽນຊື່ເປັນສູນກິລາສິລະປະ Pro. G Academy, ກາຍເປັນໜຶ່ງໃນບັນດາສູນຝຶກອົບຮົມພອນສະຫວັນຊັ້ນນຳ ຂອງ ຫວຽດນາມ.
ປັດຈຸບັນ, ສູນກິລາ ສິລະປະ Pro. G Academy ໄດ້ແບ່ງອອກເປັນ 2 ພາກສ່ວນ. ພາກສ່ວນໜຶ່ງ ສຳລັບໃຫ້ປະຊາຊົນ ໃນເຂດທີ່ຢູ່ອາໄສ, ສ່ວນຫຼາຍແມ່ນຜູ້ໃຫຍ່ ມາຝຶກເພື່ອ ສຸຂະພາບ. ສ່ວນໃຫຍ່ສູນ Pro. G Academy ໄດ້ສຸມໃສ່ຝຶກນັກເຕັ້ນ ໄວໜຸ່ມ ຫວຽດນາມ ເຂົ້າຮ່ວມການແຂ່ງຂັນຢູ່ພາຍໃນ ແລະ ຕ່າງປະເທດ. ຢູ່ສູນຝຶກນັກເຕັ້ນ ໄວໜຸ່ມໃຫ້ແກ່ ຫວຽດນາມ ແຫ່ງນີ້, Pro. G Academy ຈະແບ່ງອອກເປັນ 4 ຂັ້ນຕອນ ຂອງການຝຶກ ນັບແຕ່ຂັ້ນພື້ນຖານ ໄປຈົນເຖິງກາຍເປັນນັກເຕັ້ນ ທີ່ສາມາດ ເຂົ້າຮ່ວມການແຂ່ງຂັນຢູ່ພາຍໃນ ແລະ ຕ່າງປະເທດ.
ໃນຫ້ອງຮຽນພື້ນຖານ, ນັກຮຽນ ຈະຮຽນປະມານ 3 ເດືອນ. ຫຼັງຈາກ 3 ເດືອນ, ນັກຮຽນ ຈະໄດ້ສອບເສັງ, ຖ້າພວກເຂົາຜ່ານ, ເຂົາເຈົ້າຈະຖືກໂອນເຂົ້າຊັ້ນສູງ. ເມື່ອນັກຮຽນ ໄປຫ້ອງຮຽນ ຂັ້ນສູງ, ເຂົາເຈົ້າຈະໄດ້ຮຽນຮູ້ເພີ່ມເຕີມ ກ່ຽວກັບເຕັກນິກການເຕັ້ນ ທີ່ດີ ເພື່ອເຕັ້ນ ໄດ້ງາມຂຶ້ນ.
ເພື່ອກາຍເປັນນັກເຕັ້ນ ມືອາຊີບ, ນັກຮຽນຕ້ອງ ໃຊ້ເວລາຮຽນ 4-5 ປີ ເພື່ອຮຽນຮູ້ ໂດຍສະເລ່ຍ 2-3 ຄັ້ງຕໍ່ອາທິດ.
ນາງ ກວິ່ງຈາງ - ຜູ້ຮ່ວມກໍ່ຕັ້ງ Pro. G Academy ໃຫ້ຮູ້ວ່າ: ປັດຈຸບັນ ສິລະປະການເຕັ້ນ ໄດ້ຖືກຮັບຮອງວ່າ ແມ່ນກິລາ ຢ່າງເປັນທາງການ ແລະ ໄດ້ນຳເຂົ້າໃນລະບົບການແຂ່ງຂັນລະດັບຊາດ. ສະນັ້ນ ສູນ Pro G Academy ຍັງເປັນບ່ອນຝຶກ ນັກເຕັ້ນໄວໜຸ່ມ ຈົນອາຍຸພໍທີ່ຈະເຂົ້າ ແຂ່ງຂັນ ເຊິ່ງຈະໄດ້ຮັບການ ຄັດເລືອກຈາກບັນດາພະແນກ ແລະ ອົງການຕ່າງໆ ເພື່ອຄັດເລືອກ ຜູ້ທ່ີ ມີຄວາມສາມາດເຂົ້າຮ່ວມການແຂ່ງຂັນ.
ນາງ ກວິ່ງຈາງ ໃຫ້ຮູ້ວ່າ: “ຂ້າພະເຈົ້າຫວັງວ່າ ຈະນຳບັນດານັກເຕັ້ນ ຫວຽດນາມ ຂຶ້ນສູ່ລະດັບສາກົນ, ພ້ອມທັງເຊີນນັກເຕັ້ນອາຊີບຕ່າງປະເທດມາ ຫວຽດນາມ ສອນໃຫ້ນັກເຕັ້ນ ຫວຽດນາມ ເພື່ອໃຫ້ເຂົາ ເຈົ້າໄດ້ຮັບຮອງໃນສະໜາມແຂ່ງຂັນສາກົນ. ນີ້ກໍ່ແມ່ນວິທີເພື່ອໃຫ້ຫຼາຍຄົນມີທັດສະນະໃນແງ່ດີກ່ຽວກັບການເຕັ້ນ”.
ປັດຈຸບັນ, Pro. G Academy ໄດ້ຝຶກ ນັກເຕັ້ນ ເພື່ອຄວ້າລາງວັນ ແລະ ຫຼຽນຄຳ ໃນງານແຂ່ງຂັນພາຍໃນປະເທດເຊັ່ນ: ງານມະຫາກໍາກິລາ ຫວຽດນາມ, ການແຂ່ງຂັນ ກິລາເຕັ້ນ ເປີດກວ້າງທົ່ວປະເທດ, Sea Game ແລະ ອື່ນໆ.
